Ni dhanu m’umaru Yehova Mungu man Biblia ma tie Lembe pare:

Yesu uwacu kumae: “Wubing’eyo lemandha, e lemandhane bigonyowu.” (Yohana 8:32) Kepar kite m’iwinjiri ko kinde m’inwang’u lemandha wang’ ma kwong’a i Biblia! Ibedo ku mutoro lee mandha ninyang’ nia wacopo ponjo lemandha i ng’om maeni m’upong’ ku vupo.​—2 Timoteo 3:1.

Yehova Mungu ubemito wang’ei lemandha. Man bende calu wamaru dhanu, wamito wayer igi pi Yehova. Ento eno kende uromo ngo pi nitimo ni Mungu. Wacikara niii nikwo i kite ma Jukristu gicikiri nikwo ko pilembe waworo lee mandha cik mir ukungu pa Yehova. Yesu ukoro pi yo ma pire tek ma wacopo nyutho ko ni Mungu nia wamare. Eyero kumae: “Tek wuworo cik para, wubibedo i merna; cil calu aworo cik pa Vwa, abedo de i merne.”​—Yohana 15:10.

Yesu umaru Won lee dit man etimo lembe ceke ma Won ukwayu nia etim. Tekene walubo lapor pa Yesu i kwo mwa, Yehova bimaruwa man wabibedo ku mutoro. Calu ma Yesu uyero, “tek wung’eyo gin maeni, mugisa iwu tek wutimogi.”​—Yohana 13:17.

Watie ku genogen nia buku maeni bikonyi kara ikwo nimakere ku lemandha mi Biblia man idok jarimb Mungu. Warwo nia mer m’imaru ko Mungu udok lee man imediri nibedo “i mer pa Mungu . . . ni kwo ma rondo ku rondo.”​—Yuda 21.