1, 2. Wacikara ning’eyo lembang’o iwi Sitani ku pajogi?

KWO i ng’om ma nyen pa Yehova bibedo ber mandha. Wabikwo kite ma Mungu ular uketho wakwo ko. Ento pi kawoni fodi wabekwo i ng’om ma Sitani ku pajogi pare re ma gibebimo wie. (2 Jukorinto 4:4) Kadok wacopo neno ngo kumgi de, re ginuti andha man gitie ku tego lee.

² I wic maeni, wabiponjo kite ma wacopo bedo ko ceng’ini ku Yehova man ma wacopo gwokara ko giwa ni Sitani. Yehova ung’olo nia ebikonyowa. Ento wacikara ning’eyo bodho ma Sitani ku pajogi pare gibetio ko pi nicikowa man nimakuwa.

3. Wonabali ubemito etimwa nenedi?

³ Sitani uyero nia dhanu gibetimo ni Yehova pilembe gibenwang’u bero moko man nia ka lembe doko tek, gibiweko nitimo ni Yehova. (Som Yob 2:4, 5.) Ka ng’atu moko ubemito eponj ning’eyo Yehova, Sitani ku pajogi pare gineno man gipimo nicere. Kinde ma ng’atini uthiero kwo pare ni Yehova man emaku batizo, kwinyo makugi. Biblia uporo Wonabali kud “umvor m’ubeywak, . . . m’ebeyenyo  ko ka ng’atu m’ecam.” (1 Petro 5:8) Sitani ubemito enyoth winjiri mwa ku Yehova.​—Zaburi 7:1, 2; 2 Timoteo 3:12.

4, 5. (a) Sitani umbe ku copo mi timo lemb’ang’o? (b) Wacikara nitimo ang’o kara ‘wacerara ni Wonabali’?

⁴ Ento ukwayu lworo kud unegwa i kum Sitani ku pagogi pare. Yehova uketho mupaka i lembe ma gicopo timo i kumwa. Yehova ung’olo nia Jukristu mandha, ma gitie “udul dhanu ma dit,” gibiboth kud i “masendi ma dit.” (Lembanyutha 7:9, 14) Wonabali copo timo ngo gin moko acel de pi nicero lembe  maeno nitimere, pilembe Yehova ubemedere nigwoko dhanu pare.

⁵ Ka wabedo ceng’ini ku Yehova, Sitani bicopo ngo ninyotho winjiri mwa ku Yehova. Lembe pa Mungu utielo cwinywa kumae: “Yehova nikudu, kinde ma wuni kude.” (2 Lemkei 15:2; som 1 Jukorinto 10:13.) Weg bedopwe mapol ma co ku ma mon ma con calu ve Abel, Enok, Noa, Sara man Musa, giceriri ni Wonabali pilembe gibedo ceng’ini ku Yehova. (Juebrania 11:4-40) Wan de wacopo timo kumeno. Lembe pa Mungu uyero kumae: “[Wuceruru] ni wonabali, e ebiringowu.”​—Yakobo 4:7.

6. Sitani ubemito emakwa nenedi?

⁶ Kadok Sitani ung’eyo nia Yehova uketho mupaka pi gin m’ecopo timo i kumwa de, re ebimedere asu nitimo lembe ceke m’ecopo pi ninyotho winjiri mwa ku Mungu. Tin, Wonabali ubemaku dhanu nikadhu kud i yo ma tung’ tung’ man ebetio ku bodho m’ecaku tio ko niai con. Wakeweci iwi bodhone moko.

7. Pirang’o Sitani ubemaku dhanu pa Yehova?

⁷ Jakwenda Yohana ugoro kumae: “Ng’om ngung’ de vuto i ng’atu ma rac.” (1 Yohana 5:19) Sitani ubebimo wi ng’om maeni ma rac man ebemito bende ebim wi dhanu pa Yehova. (Mika 4:1; Yohana 15:19; Lembanyutha 12:12, 17) Wonabali ung’eyo nia nindo udong’ ire nyanok, pieno saa ceke ebekethowa i lembe ma tek kara kud wagwok bedoleng’ mwa ni Mungu. Saa moko Wonabali tio  kud uwic ma nen kamaleng’ pi nimakuwa, ento saa mange etio kud uwic ma nen ungo.

8. Jakristuman ucikere ning’eyo lembang’o?

⁸ Juefeso 6:12 uyero kumae: “Anyego mwa en e . . . kum udul tipo mi dubo i ka mi polo.” Jakristuman utie kud anyego ku Wonabali man ku pajogi. Wacikara ning’eyo nia dhanu ceke ma githieriri ni Yehova gitie i anyego maeno. Jakwenda Paulo ucimo wang’ Jukristu mir Efeso wang’ adek i barua m’ekiewo igi ku wec ma nia ‘gicung ki.’​—Juefeso 6:11, 13, 14.

9. Sitani ku pajogi gibepimo nitimowa nenedi?

⁹ Sitani ku pajogi gibepimo niwondowa i ayi ma tung’ tung’. Ka wacerara ni Sitani i yo acel, eno nyutho ngo nia dong’ ecopo voyowa ngo i yo mange. Wonabali ubepimo ning’eyo ng’ico mwa kara eng’ii uwic m’ecopo maku ko wa. Ento wacikara ngo niweko emakwa, pilembe Biblia ubeponjowa iwi uwic pare. (2 Jukorinto 2:11; som Thenge ma jumedo, namba 31.) Acel m’i kind uwicne utie timo mi pajogi.

10. (a) Timo mi pajogi tie ang’o? (b) Yehova neno timo mi pajogi nenedi?

¹⁰ Timo mi pajogi uketho i ie lembe mi thangu ma ketho ng’atini bedo ku winjiri ku pajogi, timo ma calu ve ewolembe ma bibino, lemb ajoga, lemb jei, kunoke nipimo weco ku ju m’utho. Biblia ubeyero iwa nia timo mi pajogi utie “ginmajudagu” man wacopo ngo nimondo i timo mi pajogi man bende nitimo thier ni Yehova. (Poi mi Cik 18:10-12; Lembanyutha 21:8) Jukristu gicikiri niceriri magwei i kum timo moko ci mi pajogi.​—Jurumi 12:9.

11. Nicaku maru lembe mi thangu copo terowa kani?

 ¹¹ Sitani ung’eyo nia ka wacaku maru lembe mi thangu, ebibedo yot ire nitelowa i timo mi pajogi. Ayi timo mi pajogi moko ci copo nyotho winjiri mwa ku Yehova.

12. Sitani ubeii nijebo wiwa nenedi?

¹² Sitani ubeii nijebo wi dhanu. Nok nok, ebelutho jiji i dhanu nitundo gipar nia ‘gin ma ber utie rac, man gin ma rac utie ber.’ (Isaya 5:20) Wonabali ubecwaku paru ma nia juk mi Biblia umbe ku tic man nia wacopo bedo kud anyong’a ka waworo ngo cik pa Mungu.

13. Sitani ugam upimo nenedi nilutho jiji?

¹³ Nilutho jiji i dhanu utie acel m’i kind bodho ma Sitani ubemaku ko dhanu lee mandha. Ecaku tio kude niai con. I podho mir Eden, epimo nilutho jiji i Eva ku penji ma e: “Meno te, Mungu wacu kumae, kud wucam kum nying’ yen ceke m’i podho?” (Thangambere 3:1) I ng’eye, i rundi pa Yob, Sitani upenjo Yehova i wang’ jumalaika kumae: “Yob ulworo Mungu mananu?” (Yob 1:9) I ng’ei batizo pa Yesu, Sitani utio ku wec ma e pi nimulo ie: “Tek in i Wod Mungu, ng’ol nia kidi maeni dok ni kwen.”​—Matayo 4:3.

14. Sitani copo lutho jiji i dhanu nenedi nia timo mi pajogi umbe kud ariti i ie?

¹⁴ Tin, Wonabali ubemedere asu nilutho jiji i dhanu. Edwoko timo moko mi pajogi unen ni gin ma ber i wang’ dhanu, pi nilutho jiji i igi iwi timone kara ku ginene ni gin ma rac. Kadok Jukristu moko  de gicaku nineno ngo ariti mi timone. (2 Jukorinto 11:3) Pieno, wacopo timo ang’o kara wagwokara giwa? Wacopo timo ang’o kara ku wawek Sitani umakwa i uwic pare? Wakeng’ii lembe ario ma wacopo moko i ie: galuwang’ man thieth.

15. Wacopo mondo nenedi i timo mi pajogi nikadhu kud i galuwang’?

¹⁵ Tin, filme dupa, video, program mi televizio, tuko mi ordinater man kusika mir Internet benyutho lembe mi pajogi, maji, man lem thangu i igi. Dhanu ma dupa gineno gin maeno ni galuwang’ ma rac ungo man ginyang’ ungo i ariti ma pajogi copo kelo i kwo migi. Ng’atini copo mondo bende i timo mi pajogi nikadhu kud i lembe ma calu ve pimo bati, nisomo leni mi cing’, kart mi ewolembe man nineno lembe i maraya. Wonabali ubeumo wi ariti man eketho lembe maeno unen ni gin ma wang’u ijo, ma nyang’ujo man ma cuu. Ng’atini copo paru nia racu mbe nineno lembe mi timo mi pajogi kunoke mi lemb thangu ka tekene ebedikere ngo i timone. Pirang’o paru maeno tie kud ariti i ie?​—1 Jukorinto 10:12.

16. Pirang’o wacikara nicerara i kum galuwang’ ma tie ku lembe mi thangu i ie?

¹⁶ Sitani ku pajogi gicopo somo ngo paru mwa. Ento gicopo ng’eyo gin ma wamaru man paru mwa kinde ma gibeneno ng’iong’ic ma watimo piwa giwa man pi juruot mwa, uketho i ie ng’iong’ic mwa iwi galuwang’. Ka wang’io filme, mizik kunoke buku mi lembe mi pajogi, kwayu tipo, weg  tipo, ajoga, karacika kunoke lembe moko ma kumeno, Sitani ku pajogi gicopo ng’eyo nia wamaru timo maeno. E gicopo cwaluwa nimondo akeca i timo mi pajogi.​—Som Jugalatia 6:7.

17. Sitani copo tio kud ava mwa mi bedo ku leng’kum pi nicikowa nenedi?

¹⁷ Calu ma watie kud ava mi kwo ku leng’kum, Sitani copo tio kud ava maeno pi nicikowa. Tin, dhanu mapol gitie ku remo ma pek. Ng’atini copo pimo ayi thieth ma tung’ tung’ m’umbe ninwang’u alokaloka. (Marko 5:25, 26) Ecopo bende nibayu genogen man eii nitimo lembe moko ci. Ento wa Jukristu, wacikara  nibedo ku wang’wa kara kud wang’ii thieth moko m’utie ku “tego mi maji” i ie.​—Isaya 1:13, NWT.

18. Jakristu ucikere nicerere i kum ayi thieth ma nenedi?

¹⁸ I rundi ma con mir Israel, dhanu moko gibed gitio ku “tego mi maji.” Yehova uyero igi kumae: “Kinde ma wuthang’u cing’wu, abipanu wang’a iwu; eyo, kinde ma wutimo rwo dupa, abiwinjo ngo.” (Isaya 1:15) Kenen nia Yehova copo winjo ngo kadok rwo migi! Wamaru ngo watim gin moko ci ma copo nyotho winjiri mwa ku Yehova man m’ucere nikonyowa, asagene kinde ma waberemo. (Zaburi 41:3) Pieno, wacikara ning’eyo ka nyo thieth moko ma wamito ng’io utie ku winjiri ku timo mi pajogi kunoke ku tego moko mi thangu. (Matayo 6:13) Ka ku yo moko waneno nia etie ku winjiri ku timone, wacikara nicerara i kume.​—Som Thenge ma jumedo, namba 32.

19. Wonabali nyayu lworo nenedi i dhanu mapol?

¹⁹ Jumoko yero nia jubed juparu apara nia Wonabali ku pajogi ginuti, jumange ke lembe ma gikadhu kud i ie uketho giyio nia gitie andha. Dhanu dupa gikwo ku lworo i kum tipo m’ucido man gitie ng’eca mi timo ma tie ku winjiri ku tipo ma reco. Jumange gimewo lworo mi pajogi i dhanu nikadhu kud i lembe mi zungo ma gitadu ma pajogi utimo. Wang’ mapol, lembatada maeno befoyo i dhanu man ecwalugi nikoro lembene ni dhanu mange. Lembatada maeno beketho dhanu gilwor Wonabali.

20. Wacopo nimewo vupo pa Sitani nenedi?

 ²⁰ Kepar iwi lembe ma e, Sitani ubemito dhanu gilwore. (2 Jutesaloniki 2:9, 10) Etie javupo m’ung’eyo kite m’enyotho ko paru mi dhanu m’etelogi i timo mi pajogi man niketho giyii gin mandha ngo. Dhanu maeno gicopo tadu lembe moko ma giparu nia gineno kunoke giwinjo. Kinde ma dhanu gimediri nitadu lembe ma kumeno, gidok gimedo kore dong’ magwei. Wamito ngo watad kit lembe ma kumeno pi nikonyo Sitani ku nyayu lworo i dhanu.​—Yohana 8:44; 2 Timoteo 2:16.

21. Kakare nibekoro lembe iwi pajogi, ukwayu wawec iwi lembang’o?

²¹ Ka Jamulembe pa Yehova moko ular ung’eyo lembe iwi pajogi, ecikere ngo nikoro lembene ni jumange. Ukwayu ngo dhanu pa Yehova gilwor gin moko ci ma Wonabali ku pajogi pare gicopo timo. Ento wacikara nijengara zoo iwi Yesu man iwi tego ma Yehova umio ire. (Juebrania 12:2) Yesu ubed ukoro ngo lembe mi pajogi kinde m’ebenambu ku julub pare. Ento ebed eketho wie zoo i kum lembe mi Ker man i kum “tic ma dwong’ pa Mungu.”​—Tic mi Jukwenda 2:11; Luka 8:1; Jurumi 1:11, 12.

22. Imaku yub mi timo ang’o?

²² Dong’ wiwa kud uwil nia lembakeca pa Sitani utie ninyotho winjiri mwa ku Yehova. Ebipimo nitimo lembe ceke kara lembakeca parene utimere. Ento wang’eyo bodho pa Wonabali man wamaku yub nia wacerara i kum kit timo ceke mi pajogi. Wabimio ngo “kaka ni wonabali” m’ekwi ko yub ma wamaku. (Som Juefeso 4:27.) Ka wacerara ni wonabali, wabipodho ngo i uwic pare ento wabinwang’u bedomoth man gwok pa Yehova.​—Juesefo 6:11.