1, 2. Pirang’o imaru Yehova Mungu?

NYO imaru Mungu? Ecicopere nia imare lee mandha uketho ithieriri ire. Saa moko inwang’u nia etie jarimbi ma ber m’uloyo zoo. Ento ma fodi imaru ngo Yehova, nwang’u dong’ emeri. Biblia uyero kumae: “Wamaru, kum elar emaruwa.”​—1 Yohana 4:19.

² Kepar kite ma tung’ tung’ ma Yehova unyutho ko nia emaruwa. Emio iwa ng’om ma tie kabedo ma leng’ mandha, ku gin mange ceke kara wakwo ku mutoro. (Matayo 5:43-48; Lembanyutha 4:11) Emito wabed ku winjiri ma ceng’ini kude, man etimo gin ceke wek kara waponj lembe i wie. Ka wabesomo Biblia, eca nwang’u wabewinjo Yehova. Man en lundo ewinjowa kinde ma waberwo i bang’e. (Zaburi 65:2) Etelo wiwa man emio iwa kero nikadhu kud i tego mi tipo pare maleng’. (Luka 11:13) Eoro bende Wode m’emaru akeca iwi ng’om kara egonywa kud i dubo man tho.​—Som Yohana 3:16; Jurumi 5:8.

3. Ukwayu watim ang’o kara wabed ku mer ma ceng’ini ku Yehova?

 ³ Kepar nyanok pi jarimbi moko ma ceng’ini, m’ubedo kudi i saa mi mutoro man bende i saa mi can. Ubekwayu nitimo kero ma lee dit pi nibedo ku mer ma kumeno. Etie bende kumeno pi mer mwa ku Yehova ma tie Jarimbwa ma ceng’ini m’usagu zoo. Mer mwa kude copo nirio rondo ku rondo. Pieno Biblia ubeyero iwa kumae: “Wukuru giwu i mer pa Mungu.” (Yuda 21) Wacopo nibedo nenedi i merne? Biblia udwoko kumae: “Kum maeni en e mer pa Mungu, nia wawor cik pare: man cik pare gi pek ungo.”​—1 Yohana 5:3.

4, 5. (a) Wec ma nia “mer pa Mungu” ubenyutho ang’o? (b) Mer m’imaru ko Yehova ucaku nidongo nenedi?

⁴ Biblia ubemito niyero ang’o kinde m’ewacu nia “mer pa Mungu”? Wec maeno ubenyutho ngo mer ma Mungu umaru kowa en, ento ebenyutho mer ma wamare ko wan. Nyo ibepoi i kum ceng’ ma mer pa Mungu ucaku nidongo i adundeni?

⁵ Kepoi kite m’iwinjiri ko kinde m’iponjo wang’ ma kwong’a nia Yehova ubemito ikwo rondo ku rondo i ng’om ma nyen. Iponjo lembe ceke m’etimo kara lembuno ucopere iri, man inyang’ nia etie giramia ma lee dit ma Yehova umio iwa kinde m’eoro Wode iwi ng’om. (Matayo 20:28; Yohana 8:29; Jurumi 5:12, 18) Kinde m’inyang’ nia Yehova umeri lee, adundeni ucweli man icaku nimare bende.​—Som 1 Yohana 4:9, 10.

6. Nimaru ng’atini uketho i ie ang’o? Mer m’imaru ko Mungu ucweli nitimo ang’o?

 ⁶ Mer maeno m’imaru ko Mungu ubino kende kende acaki. Ku lapor, ka wamaru ng’atu moko, wajik ungo niyero kende kende nia “ameri.” Mer cwaluwa nitimo gin ma nyayu anyong’a i ng’atuca. Kumeno bende, mer m’imaru ko Yehova uketho imito ikwo kwo ma nyayu anyong’a i ie. Kinde ma mer perine ubemedere, inwang’u nia ukwayu ithieriri ire man imak batizo. Ing’olo nia ibitimo ire rondo ku rondo. (Som Jurumi 14:7, 8.) Icopo pong’o lembang’ola peri maeno nenedi?

7. Mer ma wamaru ko Yehova cwaluwa nitimo ang’o? Kekwan cik pa Yehova moko?

⁷ Mer ma wamaru ko Yehova cwaluwa “wawor cik pare.” Ka wabeworo cik pare, eca nwang’u wabewore. I Biblia, waponjo ning’eyo kite ma Yehova ubemito wakwo ko. Ku lapor, enyutho iwa nia etie ber ungo nimer ku kong’o, nikwalu kwo, nicwayu vupo, nitimo ribiri ku ng’atu ma tie ngo jadhogwa mi gamiri, nitimo thier ni ng’atu moko kunoke ni gin moko ci m’uweko Yehova.​—1 Jukorinto 5:11; 6:18; 10:14; Juefeso 4:28; Jukolosai 3:9.

8, 9. Wacopo ng’eyo nenedi gin ma Yehova ubemito watim i lembe moko ma cik mi Biblia uweco ngo i wie terere? Kemii lapor moko.

⁸ Kara wanyai mutoro i Yehova, ukwayu ngo kende kende wawor cik pare. Emio ngo iwa cik ma jurieyo i wie lembe ceke ma wanwang’ara ko i kwo mwa. Pieno saa moko wacopo nwang’ara i wang’ lembe  moko ma cik mi Biblia uweco ngo i wie terere. Saa maeca wacopo timo ng’iong’ic ma cuu nenedi? (Juefeso 5:17) I Biblia, wanwang’u cik mir ukungu ma ponjowa ning’eyo kite ma Yehova neno ko lembe. Ka wabesomo Biblia, wanyang’ nia Yehova tie Dhanu ma nenedi. Wang’eyo kite m’eparu ko lembe, uketho i ie gin m’emaru ku m’edagu.​—Som Zaburi 97:10; Lembrieko 6:16-19; som Thenge ma jumedo, namba 1.

⁹ Ku lapor, ang’o ma copo konyowa ning’io gin ma wabineno i televizio kunoke i Internet? Yehova unyutho ngo iwa tap tap gin ma wacikara nitimo. Ento cik mir ukungu m’emio iwa bikonyowa nimaku yub ma beco. Galuwang’ mapol tin upong’ ku lembe mi rop man mi tarwang’ i igi. I Biblia, Yehova ubeyero iwa nia ‘ng’eyong’ec pare udagu ju m’umaru rop’ man nia ‘ebipoko lembe iwi weg tarwang’.’ (Zaburi 11:5; Juebrania 13:4) Cik mir ukungu maeno copo konyowa nenedi nimaku yub ma beco? Ka wadaru ning’eyo nia Yehova udagu lembe moko kunoke enene ni gin m’umaku piny ungo, wacikara niurara i kume.

10, 11. Pirang’o wabed waworo Yehova?

¹⁰ Pirang’o wabed waworo Yehova? Wawore ngo kende kende pilembe nia wamito ngo emii iwa matira kunoke kara kud wanwang’ara ku matoke mi yub ma rac ma wamaku. (Jugalatia 6:7) Ento, wawore pilembe wamare. Tap calu m’awiya gimito ginyai mutoro i weggi, wan bende wamito wanyai mutoro i Wegwa m’i polo. Ning’eyo nia mutoro benego  Yehova i kumwa, tie lembe ma ber m’usagu zoo!​—Zaburi 5:12; Lembrieko 12:2; som Thenge ma jumedo, namba 2.

¹¹ Waworo ngo Yehova kende kende kinde ma lembe tie yot iwa kunoke nia dong’ ka timo nedi mbe. Man walondo ngo cik pare ma wabiworo man ma wabiworo ngo. (Poi mi Cik 12:32) Ento, wawore kud adundewa ceke, calu ma jagor zaburi uyero: “Anyong’a binega gira kum [cik] peri m’amaru.” (Zaburi 119:47; Jurumi 6:17) Wamito wabed calu Noa, m’utimo lembe ceke ma Yehova ung’olo ire, pi ninyutho nia emare. Biblia uyero pire nia “etimo [tap] kumeca.” (Thangambere 6:22) Nyo imito Yehova uyer piri de kumeno?

12. Waromo nyayu mutoro i Yehova nenedi?

¹² Yehova bewinjere nenedi ka wabewore? Wanyayu ‘mutoro i adundene.’ (Lembrieko 11:20; 27:11) Kepar nyanok iwi lembuno! Wanyayu mutoro i Jacwii polo ku ng’om ceke kinde ma wabewore. Ento ediyowa adiya ngo. Tung’ ku maeno, emio iwa bed’agonya. Eno nyutho nia watie agonya ning’io timo gin ma ber kunoke gin ma rac. Yehova ubemito mer ma wamare ko re m’ucwalwa nimaku yub ma ber kara wakwo ku mutoro.​—Poi mi Cik 30:15, 16, 19, 20; som Thenge ma jumedo, namba 3.

13, 14. Wang’eyo nenedi nia cik pa Mungu tie tek akeca ngo ma nia worgi uvoiwa? Kemii lapor moko.

¹³ Ka wabeparu nia woro cik pa Yehova tie tek akeca kunoke ebediowa i kum lembe moko ke? Biblia  uwacu kamaleng’ nia “Cik pare gi pek ungo.” (1 Yohana 5:3) Wec mi dhu Jugiriki ma juloko ni “pek,” thelembene tie “ma nurojo.” I giragora mange, jutio ku wec maeno pi ninyutho cik ma woro tek, kunoke dhanu ma gimito gibim wi jumange pi nitimogi rac. (Matayo 23:4; Tic mi Jukwenda 20:29, 30) Biblia moko uloko wec maeno nia “Cik pare ginurowa ngo” (New English Translation). Cik pa Yehova tie “pek” ungo, niwacu gitie tek akeca ngo ma nia worgi uvoiwa. Lembe ceke m’ekwayu i bang’wa, eng’eyo nia wacopo timogi.

¹⁴ Ku lapor, kepar nia ibekonyo jarimbi moko m’ubedok i kabedo mange. Ecoko dhu ter dupa dupa. Terne moko yot man yeyogi de yot, moko ke pek ma dhanu ario re ma romo ting’o there. Nyo jarimbine romo kwayu iyei ter ma pekne kendi? Ungo! Pirang’o? Pilembe ebemito ngo etimi rac. Calu jarimo maeno, Yehova bende copo kwayu ngo nyanok de nia watim gin moko ma tek akeca. (Poi mi Cik 30:11-14) Yehova ung’eyowa ma ber. “Eng’eyo kumwa; epoi ya wan utur.”​—Zaburi 103:14.

15. Pirang’o wayio andha nia cik pa Yehova tie pi bero mwa?

¹⁵ Musa uyero ni thek mir Israel nia cik pa Yehova tie pi ‘bero migi thiri thiri’ man nia woro cikne bikonyogi kara ‘gibed kwo.’ (Poi mi Cik 5:28-33; 6:24) Tin bende kumeno. Gin ceke ma Yehova ubekwayu nia watim tie kara wakwo ma ber. (Som Isaya 48:17.) Yehova Wegwa, ung’eyo gin ceke ma ketho wabedo ku mutoro. (Jurumi 11:33) Biblia uyero nia “Mungu en e mer.” (1 Yohana 4:8) Eno nyutho nia  mer re ma ketho Yehova yero kunoke timo lembe moko.

16. Wang’eyo nenedi nia wacopo woro Mungu kadok nwang’u watie ku kum mi dubo man wabekwo i ng’om ma rac de?

¹⁶ Etie ngo lembe ma yot iwa niworo Mungu saa ceke. Wabekwo i ng’om ma rac ma Wonabali ubetelo wie en. Ebeii nicwalu dhanu gitim gin ma rac. (1 Yohana 5:19) Wacikara bende ninyego i dhu paru man ku kumwa mi dubo m’ubecwaluwa kara kud wawor Mungu. (Jurumi 7:21-25) Mer ma wamaru ko Yehova mio iwa tego mi timo gin m’atira. Eneno kero ceke ma wabetimo pi niwore man ekonyowa ku tego mi tipo maleng’ pare. (1 Samwil 15:22, 23; Tic mi Jukwenda 5:32) Tipo maleng’ konyowa nicego kite ma tung’ tung’ ma ketho edoko iwa yot kara wawor Mungu.​—Jugalatia 5:22, 23.

17, 18. (a) Wabiponjo lembang’o i buku maeni? (b) Wabiponjo lembang’o i wic m’ulubo?

¹⁷ I buku maeni, wabiponjo kite ma waromo nikwo ko kwo ma nyayu mutoro i Yehova. Man kite ma wacopo tio ko ku cik pare mi kurajo i kwo mwa. Poi nia Yehova diyowa ngo adiya nia wawore. Ka wabewore, kwo mwa bidoko ber mandha man wabibedo ku genogen ma ber pi nindo m’ubino. M’usagu zoo, woro mwa biketho Mungu bineno andha nia wamare.​—Som Thenge ma jumedo, namba 4.

¹⁸ Yehova umio iwa pidocwiny, kara ukonywa wang’ii gin ma ber ku gin ma rac. Ka waponjo pidocwinywa cuu, ebikonyowa kara “wawor cik pare.” Pidocwiny utie ang’o man wacopo ponje nenedi? Wakenenu.