1. Lembang’o m’ubino dieng’o cwiny Yesu uthieno i wang’ tho pare?

YESU ubino nidieng’ pir anyim mi julub pare uthieno i wang’ tho pare, kum eng’eyo nia ebeciwekogi. Eyero igi kumae: “Wun wu mi ng’om ungo.” (Yohana 15:19) Yor i ng’eye, ekwayu pigi i bang’ Won eyero kumae: “Gi mi ng’om ungo cil calu an de a mi ng’om ungo.” (Yohana 17:15, 16) Yesu umito yero ang’o?

2. “Ng’om” ma Yesu ubino niweco i wie utie ang’o?

² I giragora maeni, wec “ng’om” ubenyutho dhanu ma ging’eyo ngo Mungu man ma gitie i the tela pa Sitani. (Yohana 14:30; Juefeso 2:2; Yakobo 4:4; 1 Yohana 5:19) Wacopo timo ang’o kara ku wabed i thenge ‘mi ng’om’? I wic maeni, wabiponjo lembe ma e: Wamoko kikiki i kum Ker pa Mungu man wakoc ku ng’om, niwacu wabedo ngo i theng lembgamba moko. Wacerara i kum tipo mi ng’om. Wakendo i ayi m’umaku piny man warukara i kadiri ma ber man watio ku sente i ayi ma ber. Waronyo bende jamb ali ceke ma Mungu umio iwa.​—Som Thenge ma jumedo, namba 16.

3. Yesu ubino ku nen makani iwi lembgamba mi ker?

³ Kinde ma Yesu ubino iwi ng’om, eneno dhanu gibesendiri i ayi ma tung’ tung’ man kwo migi ubino yot ungo. Edieng’ pigi man ebino ayika nikonyogi. Nyo edoko jabim migi? Ungo. Eng’eyo nia gin ma dhanu tie ku yenyne nisagu utie Ker pa Mungu, kunoke bimobim pare. Yesu bidoko Rwoth mi Ker maeno man Kerne ubino thiwiwec ma dit mi lembanyong’a m’ebed erweyo. (Daniel 7:13, 14; Luka 4:43; 17:20, 21) Yesu umondo ngo i lembgamba man saa ceke ebed eroyo ngo tiende i ie. Kinde m’ebino i wang’ Pontio Pilato ma tie jabim mi Roma, ewacu kumae: “Ker para en e mi ng’ombuni ngo.” (Yohana 18:36) Julub pare bende gimondo ngo i lembgamba. Buku moko m’uweco iwi suru mi dhanu (On the Road to Civilization) uyero pi Jukristu mi rundi ma kwong’a nia “gibed gitimo ngo tic mi lembgamba.” Tin bende Jukristu mandha gitimo kumeno. Wamoko kikiki i kum Ker pa Mungu man wamondo ngo i lembe mi gamba ker mi ng’om maeni.​—Matayo 24:14.

4. Jukristu mandha gitimo ang’o pi ninyutho nia gibediko cing’gi i kum Ker pa Mungu?

⁴ Ambasader gicungo kaka ng’om migi i ng’om mange, ento gimondo ngo i lembgamba mi ng’om ma ginwang’iri i ie. Jukristu ma juwiro ku tipo, ma gitie ku genogen mi bimo karacelo ku Kristu i polo bende gitimo kumeno. Jakwenda Paulo ugoro ni Jukristu maeno kumae: “Watie judhulembe [ambasader] ka Kristu.” (2 Jukorinto 5:20) Jukristu ma juwiro  ku tipo gicungo kaka Ker pa Mungu. Gimondo ngo i lembgamba mi ker man i lembe ma tung’ tung’ m’uneno gamba mi ng’om. (Jufilipi 3:20) Ento gikonyo milioni mi dhanu dupa kara giponj lembe iwi bimobim pa Mungu. “Rombe mange,” ma gitie ku genogen mi kwo rondo ku rondo i ng’om ma nyen pa Mungu, bende gibediko cing’gi ku Jukristu ma juwiro ku tipo. Gin bende gimondo ngo i lembgamba mi ker. (Yohana 10:16; Matayo 25:31-40) Ubenen kamaleng’ nia, Jakristu mandha ucikere ngo nimondo i gamba ker mi ng’om maeni.​—Som Isaya 2:2-4.

5. Jukristu gikiedo ngo lwiny pi thelembe acel makani?

⁵ Jukristu mandha gineno juyic wagi mange ceke ni wat migi man gitie i acel kadok nwang’u giai i  ng’om kunoke i suru ma tung’ tung’ de. (1 Jukorinto 1:10) Ka nwang’u wacidho i lwiny, eca nwang’u wabecikiedo i dhu wat mwa, juyic wadwa ma Yesu ung’olo iwa nia wamargi. (Yohana 13:34, 35; 1 Yohana 3:10-12) M’usagu zoo, Yesu ung’olo ni julubne nia gimar cil judegi migi.​—Matayo 5:44; 26:52.

6. Dhanu ma githieriri ni Yehova ginyutho nenedi nia giworo bimobim mi ng’om?

⁶ Kadok wa Jukristu wadikara ngo i lembgamba de, re watimo kero nibedo lwak ma ber mi ng’om. Ku lapor, wanyutho nia waworo bimobim mi ng’om, nwang’u wabeworo cik mi ng’ombe man waculo palatha. Ento watimo kero saa ceke nimio “ni Mungu . . . gin ma pa Mungu.” (Marko 12:17; Jurumi 13:1-7; 1 Jukorinto 6:19, 20) “Gin ma pa Mungu” uketho i ie mer ma wamare ko, woro mwa man thier ma watimo ire. Watie ayika nibayu kadok kwo mwa kakare nikoso woro ni Yehova.​—Luka 4:8; 10:27; som Tic mi Jukwenda 5:29; Jurumi 14:8.

7, 8. “Tipo m’i ng’om” utie ang’o man etie ku matoke makani iwi dhanu?

⁷ Nikoyiri ku ng’om pa Sitani thelembene tie niweko ngo “tipo m’i ng’om” maeni ubim wiwa. Tipo maeno utie ayi mi paru lembe man mi timo m’uai i bang’ Sitani man ebetelo wi dhanu m’utimo ngo ni Yehova. Ento Jukristu giceriri ni timo maeno. Calu ma Jakwenda Paulo uyero, “wajolo, tipo m’i ng’om ungo, ento tipo m’uai ba Mungu.”​—1 Jukorinto 2:12; Juefeso 2:2, 3; som Thenge ma jumedo, namba 17.

⁸ Tipo mi ng’om ubecwalu dhanu gidieng’ pigi  gigi, gibed jukuhaya man gibed jujai. Eketho gipar nia gimbe ku yeny mi woro Mungu. Sitani ubemito dhanu gitim lembe moko ci ma gimaru m’umbe niparu pi matoke mi lembene. Emito dhanu giyii nia “awanya ma rac mi kum kud awanya ma rac mi wang’” re ma pigi tie tek nisagu zoo i kwo. (1 Yohana 2:16; 1 Timoteo 6:9, 10) Wonabali ubetimo kero asagane niwingo jurutic pa Yehova man niwondowa wapar lembe i kite ma en de eparu ko.​—Yohana 8:44; Tic mi Jukwenda 13:10; 1 Yohana 3:8.

9. Tipo mi ng’om romo wingowa nenedi?

⁹ Tipo mi ng’om utiekowa calu yamu ma wayuyo. Ka watimo ngo kero nicerara ni tipone, ecopo wingowa. (Som Lembrieko 4:23.) Ecopo caku i ayi moko ma nen ve tie rac ungo, calu ve ka waweko paru man timo mi dhanu ma giworo ngo Yehova uwing wiwa. (Lembrieko 13:20; 1 Jukorinto 15:33) Kunoke ka wacaku nineno pornografi, nijai i kum yioyic kunoke nimaru tuko m’unyutho aloci mi ng’om.​—Som Thenge ma jumedo, namba 18.

10. Wacopo timo ang’o kara wacerara ni tipo mi ng’om?

¹⁰ Dong’ ke wacopo timo ang’o kara tipo mi ng’om kud ubim wiwa? Wacikara nicoro ceng’ini ku Yehova man niweko rieko pare utel wiwa. Wacikara bende nikwayu tipo pare maleng’ areri man nitimo tic pare lee. Yehova utie Ng’atu ma tie ku tego nisagu zoo i polo kud i ng’om bende. Wageno andhandha nia ebikonyowa kara wacerara ni tipo mi ng’om.​—1 Yohana 4:4.

11. Tipo mi ng’om ubecwalu dhanu gikend nenedi?

¹¹ Wanyutho bende nia watie ngo i thenge mi  ng’om nwang’u wakendara man warukara i ayi m’umaku piny. Tin ju ma dupa gikendiri pi nitelo nen mi dhanu, pi nicewo paru mi tarwang’ i kum jumange, pi ninyutho jai i kum paru mi lwak kunoke pi ninyutho nia gitie ku sente lee. Dhanu mange ke gidieng’ ungo i kum kite ma gikendiri ko. Giranjiri kunoke giyikiri ngo. Wacikara ngo niweko timo maeno uwing wiwa iwi ng’io kendi man ruko mwa.

12, 13. Cik mir ukungu makani ma copo konyowa ning’io gin ma wabikendo?

¹² Wa jurutic pa Yehova, saa ceke wamito wakendara  i ayi ma cuu, ma leng’, i ayi m’ukwayere man nimakere ku lembe ma wabecitimo. Wakendara ku “kendi m’uromo kakendi,” pi ninyutho nia “ayi Mungu ni i” kumwa.​—1 Timoteo 2:9, 10; Yuda 21.

¹³ Kite ma wakendara ko copo bedo ku matoke iwi nen ma dhanu mange gitie ko iwi Yehova man iwi dhanu pare. Wamito watim lembe “ceke ni dwong’ pa Mungu.” (1 Jukorinto 10:31) Nikendo i ayi m’umaku piny, uketho i ie nikendo i ayi ma timo ngo dhanu mange rac man niworo paru migi. Pieno, kinde ma wabeng’io bongu kunoke waberukara, ukwayu wapoi nia ng’iong’ic mwa utie ku matoke iwi dhanu mange.​—1 Jukorinto 4:9; 2 Jukorinto 6:3, 4; 7:1.

14. Kinde ma wabeng’io bongu ma wabikendo pi coko kunoke pi lembanyong’a, wacikara nipenjara ku penji makani?

¹⁴ Wabed wakendara nenedi kinde ma wabecidho i coko kunoke i tic mi lembanyong’a? Nyo wabed watelo nen mi dhanu akeca i wiwa? Nyo kendi mwa ketho dhanu mange bedo ku lewic? Nyo wabed waparu nia kite ma wakendara ko tie lembe m’uneno wan ento ungo jumange? (Jufilipi 4:5; 1 Petro 5:6) I andha, wamito wanen leng’ i wang’ dhanu, ento gin ma bitelo dhanu akeca i kumwa, utie kite mwa mi Jukristu. Eno re ma tie kite ma Yehova neno i bang’wa. Kite maeno nyutho nia watie dhanu ma nenedi yor i iwa, niwacu “ng’atu m’ukandre mir adunde . . . , ma wel pinje dit i wang’ Mungu.”​—1 Petro 3:3, 4.

15. Pirang’o Yehova unyutho ngo iwa ayi ma tap m’ukwayu wakendara ko man wayikara ko?

¹⁵ Yehova urieyo ngo cik iwi gin m’ukwayu wakendi  kunoke m’ukwayu ngo wakendi. Ento, emio iwa cik mir ukungu mi Biblia, ma copo konyowa nitimo ng’iong’ic ma ber. (Juebrania 5:14) Emito ng’iong’ic ma watimo kadok ebed ma dit kadi ma nok, ujengere iwi mer ma wamare ko man ma wamaru ko jumange. (Som Marko 12:30, 31.) I ng’om zoo, dhanu pa Yehova gikendiri i ayi ma tung’ tung’ nimakere ku suru migi man nimakere kud ayi bongu ma gimaru. Ayi ma tung’ tung’ maeno mi kendi, nen ma leng’ man enyang’u dhanu.

16. Kite ma dhanu mi ng’om neno ko sente ukoc nenedi ku lembe ma Yesu uponjo? Wacikara nipenjara ku penji makani?

¹⁶ Sitani ubemito dhanu gipar nia sente man giki mi kum re ma biketho gibed ku mutoro, ento jurutic pa Yehova ging’eyo nia eno tie vupo. Wang’eyo nia wec ma e ma Yesu uyero utie lemandha: “Kwo pa dhanu mbe i gin m’esagre kudo.” (Luka 12:15) Sente copo mio ngo iwa anyong’a mandha. Ecopo mio ngo iwa jurimo mandha, kwiocwiny mir adunde man kwo ma rondo ku rondo. I andha, watie ku yeny mi giki moko mi kum man wamito wanwang’ mutoro i kwo mwa. Ento Yesu uponjowa nia wabibedo ku mutoro ka watie ku winjiri ma ber ku Mungu man ka waketho thier ma wabetimo ire ni gin ma pire tek nisagu i kwo mwa. (Matayo 5:3; 6:22) Kepenjiri kumae: ‘Nyo adaru weko nen ma dhanu mi ng’om utie ko iwi sente uwinga? Nyo sente re ma tie gin ma pire tek ekeca m’aparu man aweco kwa i wie?’​—Luka 6:45; 21:34-36; 2 Yohana 6.

17. Kan ikwero nibedo ku nen ma ng’om utie ko iwi sente, kwo peri bibedo nenedi?

¹⁷ Ka waketho wiwa ceke i kum timo ni Yehova man wakwero nen ma ng’om utie ko iwi sente, kwo mwa bibedo ma ber. (Matayo 11:29, 30) Wabifoyo ku gin ma watie ko man wabibedo ma paru mwa man ma adundewa kwio. (Matayo 6:31, 32; Jurumi 15:13) Wabidieng’ ungo akeca pi giki mi kum. (Som 1 Timoteo 6:9, 10.) Wabibedo kud anyong’a ma junwang’u ka jubemio piny ni dhanu mange. (Tic mi Jukwenda 20:35) Man ayi kwo mwane biweko iwa saa lee ma wabed ko ku jurimbwa. Wabinindo bende ma ber.​—Eklizia 5:12.

18. Sitani ubeii nitimo ang’o i kumwa?

¹⁸ Sitani ubeii ninyotho winjiri mwa ku Yehova, pieno wacikara nitimo kero mwa ceke pi nigwoko winjirine. Wabenyego i dhu “udul tipo mi dubo.” (Juefeso 6:12) Sitani ku pajogi pare gibemito ngo wabed ku mutoro kunoke wakwo rondo ku rondo. (1 Petro 5:8) Judegi maeno ma gitie ku tego gibenyego i dhogwa, ento ku kony pa Yehova wabivoyo!

19. Juefeso 6:14-18 ukoro pi ‘jamlwiny’ mi Jukristu nenedi?

¹⁹ Yang’ con, juaskari gibed gikendo jamlwiny pi nigwokiri i lwiny. Wan bende wacikara nikendo “jamtho,” niwacu jamlwiny ma Yehova umio iwa. (Juefeso 6:13) Eno bigwokowa. Juefeso 6:14-18, uyero kumae iwi jamlwiny maeno: ‘Wucung ma tek, ma wudaru twio pierwu ku lemandha man wudaru royo asi mi bedopwe man ma wudaru royo girayika mi lembanyong’a ma juboth ko mi kwiocwiny i tiendwu; karacelo ku maeni wuting’ thungu mi yioyic, ma wubicopo nego kudo lak athero mi mac ceke pa ng’atu ma rac. Man wugam sabu mi both ma juboth ko, ku palamularu mi tipo, ma en e lem pa Mungu: Ku rwo man kwayukwac ceke ma wuberwo ko ku ba nindo ceke i tipo.’

20. Ukwayu watim ang’o kara ‘jamlwiny’ mwa ugwokwa?

²⁰ Ka wii jaaskari uwil ku kum jamlwiny pare moko man eweko kume moko thwolo, jakwoje kilo tap kakeca. Ka wamito ‘jamlwiny’ mwa ugwokwa, ukwayu ngo wiwa wil ku kume moko. Ukwayu wakende saa ceke man wagwoke ebed ma cuu. Anyego mwa bimedere asu nitundo cil ma ng’om pa Sitani binyothere man ma jubinyotho ko Sitani ku pajogi pare cen  ku wi ng’om. (Lembanyutha 12:17; 20:1-3) Pieno, ka wabenyego i dhu awanya ma rac kunoke wabenyego ku ng’ico moko, ukwayu ngo wavoci!​—1 Jukorinto 9:27.

21. Wacopo voyo anyego mwa nenedi?

²¹ Ku tego mwa giwa, wacopo voyo ngo Wonabali. Ento ku kony pa Yehova, wabivoye. Kara wagwok bedoleng’ mwa, ukwayu warwo i bang’ Yehova, waponj Lembe pare man wadikara karacelo kud umego ku nyimego mwa. (Juebrania 10:24, 25) Lembe maeno bikonyowa nigwoko bedoleng’ mwa ni Mungu man wabibedo ayika nicero ba yioyic mwa.

22, 23. (a) Wacopo bedo ayika saa ceke nicero ba yioyic mwa nenedi? (b) Wabiponjo lembang’o i wic m’ulubo?

²² Ukwayu saa ceke wabed ayika nicero ba yioyic mwa. (Yohana 15:19) Saa moko, Jumulembe pa Yehova gimaku yub m’ukoc ku mi dhanu mapol. Ke penjiri kumae: ‘Nyo andha anyang’ i thelembe m’uketho wamaku yub maeni? Nyo ayio andha nia lembe ma Biblia man ma jamiru mandha man ma riek ubeyero utie lemandha? Nyo atie ku mutoro nibedo Jamulembe pa Yehova? (Zaburi 34:2; Matayo 10:32, 33) Nyo acopo koro pi yioyic para ni jumange?’​—Matayo 24:45; Yohana 17:17; som 1 Petro 3:15.

²³ Saa moko, gin m’ukwayu watim kara wakoc ku ng’om benen ka maleng’. Ento saa mange, lembene nen ungo ngbeng’. Sitani ubetimo kero nicikowa i yo ma tung’ tung’. Uwic acel m’etio ko tie galuwang’. Wacopo ning’io galuwang’ mwa ku rieko nenedi? Wabiponjo lembe maeno i wic m’ulubo.