Pi ninwang’u bero lee i kum ponji maeni
Keth Jamulembe pa Yehova moko uponji: Kway ng’atu m’umiyo iri nyathibuku maeni uponj kudi Biblia, kunoke kway ponjine niai kud i kusika mwa mir internet jw.org.
THENGE MI KWONG’O MI PONJIMAN
Som udukuwec ceke karacelo ku nyithi thiwiwec m’i kindgi (A) man verse ma jukiewo ku rangi ma col akeca (B) pilembe paru ma dongo ucungo i wigi. Ibinwang’u verse moko jukiewo athothi i ng’etgi nia “som.”
THENGE MIR ARIO
Wec ma nyanok (C) ma nwang’ere i the thiwiwec Med nyang’ peri ukoro i adundo lembe ma dongo dongo ma jubiweco i wiye. Nyithi thiwiwec m’ubelubo ke (D) unyutho lembene acel acel. Som verse ma jumiyo, dwok wang’ penji, man nen video ma tung’ tung’ ma junyutho i thenge maeno (E).
Nen bende cal ma tung’ tung’ ku wec ma jukiewo i ng’etgi (F), man par kite m’iromo dwoko ko wang’ lembe ma nwang’ere i the thiwiwec Dhanu moko beyero kumae (G).
THENGE MIR ADEK MA TOKCEN
Ponjiman uthum ku thiwiwec ario ma e: I adundo man Penji mi poyowic (H). Ka wudaru ponjiman, kiew ndhu ndhu nindo m’ethum i iye kaka ma junyutho. I the thiwiwec Lembe m’ukwayu itim (I), ibinwang’u gin m’icopo timo kara ponjine unyang’ cuu i wii kunoke kara itii ku gin m’iai iponjo. Thiwiwec Tim sayusac (J) unyutho lembe mange m’ucwaku gin m’iai iponjo. Iromo somo lembe kunoke nineno video ma junyutho i thenge maeno i saa mange.
Kite m’iromo nwang’u ko giragora mi Biblia
I kind gin ma jukiewo, mi kwong’o utie nying’ buku mi Biblia (A), i ng’eye ke thekne (B), man ma tokcen utie verse (C). Ku lapor, Yohana 17:3 ubenyutho buku pa Yohana, thekne mir 17, nisomo verse mir 3.
