PONJI MIR 03
Nyo Biblia beyero lemandha?
Biblia ung’olo lembe dupa man bende etie ku ponji ma beco. Copere nia ibed imaru ing’ey lembe ma Biblia ubeponjo, re nyo saa moko ibed ibedo ku jiji iwi lembene moko. Nyo wacopo geno lembang’ola man juk ma nwang’ere i iye ma ke etie buku ma con e? Nyo lembe ma Biblia ubeyero copo bedo iwa ku kony tin eni de? Man nyo wacopo yiyo nia lembe m’ebeyero pi nindo m’ubino tie lemandha? Dhanu ma dupa giyiyo lembe mi Biblia. Wakenen thelembe m’uketho giyiyo.
1. Nyo lembe mi Biblia tie lemandha kunoke m’athunga?
Biblia uyero nia lembe m’i iye bebedo “atira man lemandha.” (Eklizia 12:10) Ekoro lembe m’utimere andha man mi dhanu ma gigam gikwo de andha. (Som Luka 1:3; 3:1, 2.) Ju ma gikoro kpawa man ju ma timo sayusac ginwang’u nia gin ma Biblia ukoro iwi nindo, iwi dhanu, iwi kabedo man iwi lembe m’utimere, utie kwa lemandha.
2. Pirang’o wacopo yero ngo nia Biblia tie buku m’udaru tii?
Wang’ ma pol, Biblia ubed uweco pi lembe moko ma nwang’u fodi jung’eyo ngo nyanok de nia etie kumeca i saa ma jubekiewe i iye. Ku lapor, eweco iwi lembe m’uneno sians (niwacu ponjiri) mi ng’om maeni. Saa ma fodi jukiewo lembene akiewa con eca, dhanu ma pol gibed giyiyo ngo nia etie lemandha. Ento jururieko ma dongo mi ng’om ma tin, ginwang’u nia karaman lembe ma Biblia ugam uyero con utie lemandha. Lembe mi Biblia utie “lemandha man atira,” ma juromo geno nja ku nja.—Zaburi 111:8.
3. Pirang’o ukwayu wayii nia lembe ma Biblia uyero pi nindo m’ubino tie lemandha?
I Biblia junwang’u lembila * ma tung’ tung’ m’uewo pi ‘gin ma [nwang’u] fod’utimere ngo’ i saa maeca. (Isaya 46:10) Elar eyero pi lembe moko m’udok utimere tap tap kumeca i ng’eye. Elar ekoro bende kubang’e kubang’e lembe zoo ma tin ubetimere i ng’om. Wabineno lembilane moko i ponji maeni. Kite ma gipong’o ko tap tap bizungo iwa!
MED NYANG’ PERI
Wakenen kawoni kite ma lembe moko mi sians (niwacu ponjiri) mi ng’om maeni ucwaku ko Biblia. Bende, wayar i lembila moko mi Biblia.
4. Lembe moko mi sians ucwaku Biblia
I rundi ma con, dhanu ma pol gibed gigeno nia ng’om ubedo iwi piny moko. Nen VIDEO.
Wakenen lembe ma buku pa Yob ugam uyero oro elufu adek ku nusu (3 500) kumeni udaru kadhu. Som Yob 26:7, man i ng’eye wuwec iwi penji m’ulubo e:
-
Biblia uyero nia ng’om ucungo iwi “gin moko ngo.” Pirang’o eno copo bedo ni lembe mi zungo?
Fodi oro ukadhu dak ario (200) ku wiye kende ma jururieko ginyang’ nia karaman pii bedhokere adhoka (cycle de l’eau), niwacu, ceng’ kilo i pii mi nam, eduny edoko ni afuru, edok ecwiyo koth, emol i nam man ebed elokere kumeno kumeno. Re kenen lembe ma Biblia ular uyero con oro daru kadhu kago 3 500. Som Yob 36:27, 28, man i ng’eye wuwec iwi penji m’ulubo e:
-
Pirang’o lembe ma Biblia uyero iwi kite ma pii bedhokere ko utie lembe mi zungo?
-
Nyo giragora maeni umedo genogen m’itie ko iwi Biblia?
5. Biblia ular uewo pi lembe moko m’udok utimere i ng’eye
Som Isaya 44:27–45:2, man i ng’eye wuwec iwi penji m’ulubo e:
-
Biblia ular ukoro nenedi oro 200 i wang’e kite ma jubinyotho ko adhura mi Babeli?
Kpawa mi ng’om unyutho kamaleng’ nia ubimo Siris (Kuro) mi Perse karacelo ku juaskari pare re ma gimaku adhura mi Babeli i oro 539 W.N.Y. * Giwiro wang’ pii ma nwang’u ubino gwoko adhurane, e pige jwik. Gigam gimondo i adhurane ku dhu gang’ ma giwok ginwang’u udong’ thwolo, e gimake m’umbe nikiedo lwiny. Oro daru kadhu elufu abic ku nusu (2 500) ma Babeli udong’ ni uvuru. Wakenen gin ma Biblia ular uewo pire.
Som Isaya 13:19, 20, man i ng’eye wuwec iwi penji m’ulubo e:
-
Lembila maeni upong’o nenedi?
Uvuru mi Babeli i ng’om mir Irak
6. Biblia ular uewo bende pi lembe m’ubetimere tin
Biblia ulwong’o nindo ma wabekwo i iye eni nia “kajik ceng’.” (2 Timoteo 3:1) Wakenen lembe ma Biblia uewo pi nindone:
Som Matayo 24:6, 7, man i ng’eye wuwec iwi penji m’ulubo e:
-
Lembang’o ma Biblia uyero nia bitimere i nindo mi kajik ceng’i?
Som 2 Timoteo 3:1-5, man i ng’eye wuwec iwi penji m’ulubo e:
-
Biblia ukwanu kit timo ma kani ma dhanu bibedo ko i nindo mi kajik ceng’i?
-
Ibecuku neno kit timone ma kani?
DHANU MOKO BEYERO KUMAE: “Biblia tie buku mir uda m’athunga.”
-
Lembang’o dhe m’uketho in giri iyiyo nia lembe ma Biblia uyero tie lemandha?
I ADUNDO
Kpawa mi ng’om, sians (niwacu ponjiri), man lembila ceke ubecwaku nia Biblia uyero lemandha.
Penji mi poyowic
-
Nyo lembe mi Biblia utie lemandha kunoke m’athunga?
-
Lembe moko ma kani ma sians ucwaku Biblia i iye?
-
Nyo iparu nia andha Biblia copo yero lembe mi nindo m’ubino? Kekor nia pirang’o iparu kumeno.
TIM SAYUSAC
Nyo lembe moko nuti ma Biblia uyero m’ukoc ku ma sians udok unwang’u?
“Nyo sians ucwaku lembe ma Biblia uyero?” (Thiwiwec mi jw.org)
Lembang’o ma Biblia uewo nia bitimere i nindo mi ‘kajik’ ceng’i?
“Lembila 6 mi Biblia m’ubepong’o tin eni” (Otkur ma Wiw, nindo 1, dwi mir 5, 2011)
Nen ayi ma lembila ma Biblia uewo pi bimobim mi Giriki ugam upong’o ko.
Kenen kite ma lembila mi Biblia uwilo ko paru pa jalwo moko iwi Biblia.
