Umego ku nyimego ma jumer:

Mer ma wamaru ko Mungu man dhanu wadwa cwaluwa nitimo gin ma e ma Biblia uyero: “Wucidhi, man wuketh dhanu m’i thek ceke udok julub, wumii igi batizo.” (Mat. 28:19, 20; Mark. 12:28-31) Mer maeno utie ku tego ma lee man ecwaluwa nikonyo dhanu ceke “m’adundegi ubedo ayika pi kwo ma rondo ku rondo.”​—Tic. 13:48.

Con, wabed waketho wiwa zoo i kum maku wec ma wabiyero i lembanyong’a man i kum miyo girasoma. Kawoni lundo ubekwayu walil wang’ bodho mwa mi weco ku dhanu. Mito wawec kugi iwi thiwiwec ma nyang’ugi pi ninyutho nia wamarugi. Eno ubenyutho nia wabed wawil bodho mwa man wadieng’ i kum yeny pa ng’atuman. Dong’ nyathibuku maeni bikonyi nenedi kara itim kumeno?

Nyathibuku eni utie ku ponji 12 ma bikonyowa nicego kite ma beco ma watie ku yenyne kara wanyuth mer man waketh dhanu udok julub. Ponjineman ujengere iwi kpawa mi Biblia ma Yesu kunoke jarwey mange mi rundi ma kwong’a unyutho iye kitene acel i tic mi lembanyong’a. Lembakeca mwa utie ngo nimaku wec ma wabiyero i lembanyong’a ku wiwa, ento nisayu yore mi nyutho mer ni dhanu. Kadok nwang’u kiteneman pire tie tek i thenge ceke mi tic mwa mi lembanyong’a de, re wabineno ayi ma kitene moko pigi tie tek ko asagane kinde ma wabecaku the wec ku dhanu, wabeliewogi kunoke wabetelo wi ponji mi Biblia.

Saa m’ibeng’iyo i ponjiman, woth paru pir ayi m’icopo nyutho ko kite ma juweco pire kinde m’ibeweco ku dhanu mi kabedo m’ikwo i iye. Tim kero iketh mer m’imaru ko Yehova man dhanu udok tek. Mer maeno m’usagu bodho moko ci m’icopo bedo ko, bikonyi nitundo i kum lembakeca peri mi ketho dhanu udok julub.

Etie iwa rwom ma lee dit nitimo tic karacelo kudi. (Zef. 3:9) Dong’ wek Yehova umii iri mugisa kinde m’ibemediri nimaru dhanu man niketho gidok julub!