Kepar lembe mae: Wii Alex ulal. En eyio nia Mungu nuti, man nia jucwio piny zoo acwia. Re tin eni i somo, japonjo pare mi biologie (ponji iwi piny ma kwo) unyono tiende nia pare piny ulokere aloka. Ewacu nia jururieko ma gitimo sayusac de ginwang’u kumeno. Alex ubemito ngo enwang’ere nia rieko pare umbe. Ebeyero yor i ie kumae: ‘Ka fodi ju ma gitimo sayusac zoo de ginwang’u nia eno tie lembe mandha, an e ke atie ng’a m’acopo niyero lembe m’ukoc ku migi?’

Ka nwang’u itie Alex, nyo nwang’u icopo yio nia piny ceke ulokere aloka, pilembe junyutho i buku ma tung’ tung’ nia etie lembe mandha?

Dhanu ma giyio nia piny ulokere aloka ku ma giyio nia jucwio piny acwia, gin ceke giyero lembe ma giyio m’umbe ning’eyo nia pirang’o giyio kumeca.

• Dhanu ma giyio nia jucwio piny acwia, giyio pilembe juponjogi kumeca i dini migi.

• Dhanu ma giyio nia piny ulokere aloka ke, giyio pilembe juponjogi kumeca i darasa.

Biblia uyero kumae: “Ku ba udi ceke m’agoma dhanu gomo en: ento ng’atu m’ugomo gin ceke en e Mungu.” (Juebrania 3:4) Nyo eno tie ngo lembe mandha?

LEMBE MA DHANU BEYERO: Piny ceke mi kor polo ku mi ng’om uai kud i gin moko m’umwoc amwoca mbwang’ kumeni.

LEMBE MA DHANU BEYERO: Dhanu uai kud i lei.

LEMBE MA DHANU BEYERO: Sayusac unyutho nia andha piny ulokere aloka.

“Kepar nia ibewotho i die luli moko, e inwang’u ot moko maleng’ mandha! Nyo icopo paru nia, ‘Yen ubed ucokiri gigi kan uketho ot maeno ucungo?’ M’umbe jiji, eno tie lembe ma timere ngo! Dong’ pirang’o ke wacikara niyio nia piny ceke mi kor polo ku mi ng’om uwok mbwang’ gigi kumeni?”—Julia.

“Kepar nia ng’atu moko ubeyero iri kumae; macin mi yiko buku moko umwoc, e vino mi macin ne ukirere iwang’ ot man i kor ot, e uketho diktioner madit ugam uwok. Nyo icopo yio lembuno andha?”—Gwen.

Biblia ubekweyi nia itii ku ‘tego peri mi paru i lembe.’ (Jurumi 12:1, NWT) Eno nyutho kamaleng’ nia yioyic peri iwi Mungu ucikere nicungo ngo kende kende iwi:

• LEMBE M’IPARU APARA (Aparu nia tego moko ma lee akeca copo bedo nuti)

• PARU MA JUROYO AROYA I WII (Akwo ikind jurudini)

• ADICI MI JUMANGE (Junyodo para giponja nia Mungu unuti—gin mange m’acopo timo umbe)

Icikiri nibedo ku thelembe m’uketho iyio nia lembe maeno tie andha kumeno.

“Saa m’abino winjo i ot darasa kite ma japonjo ubekoro ko ayi ma kumwa timo ko, m’umbe jiji anyang’ ndhu nia Mungu nuti. Wath kumjo ceke kubang’e kubang’e utie ku tije, kadok ma thindho thindho magwei de man wang’eyo ngo nia gibetimo tic nenedi i kumwa. Kum dhanu utie andha gin ma wang’u ijo!”—Teresa.

“Kan aneno ot etaj ma wiw, meli ma dongo, kunoke mutukari, apenjara kumae: ‘Ng’a m’uyiko piny maeni?’ Ku lapor, umitere nia ng’atu ma riek re m’uyik mutukari, pilembe ubekwayu nia jam kume mathindho thindho utim tic kara mutukari ne uringi. Ka mutukari de ng’atu m’uyiko unuti, kumeno bende dhanu de ng’atu m’ucwio unuti.”—Richard.

“Kinde m’abeponjo lembe mi science lee, lembe ma nia piny ulokere aloka doko ira ni gin ma tije umbe. . . . Pira an, etie yot niyio nia Jacwic unuti nisagu nibedo ku yioyic iwi piny m’ulokere aloka.”—Anthony.

Jururieko gicaku timo sayusac niai con, re fodi asu dhog’gi urombo ngo iwi lembe m’unyutho nia piny ulokere aloka. Ka fodi jururieko de dhog’gi copo rombo ngo i kindgi iwi lembe ma nia piny ulokere aloka, ma ke giwacu nia giriek lee, nyo icopo yio nia piny ulokere aloka andha?