Kepar lembe mae: Nyaku ma nyinge Heather ging’eiri giku jalawobi ma nyinge Mike fodi pi dwi ario kende, ento Heather winjere ve gilar ging’eiri kude cuu i wang’e. Gibed gikiewo SMS ikindgi saa ceke, giweco ku telefon pi saa ma lee, man ng’atuman copo ng’eyo lembe ma wadi ubemito niyero! Kawoni dong’ Mike ubemito ngo gibed giwec aweca kende.

Ikind dwi ario m’ukadhu, Mike giku Heather gibed gimaku cing’gi, man gibed gicwiyo limbgi acwiya kende. Heather ubemito ngo gimond i timo mange. Re ebemito ngo bende nia mer migi giku Mike ulal. Mike kende re ma ketho enwang’ere nia eleng’ lee man ewinjere maber. ‘Ewacu ‘yor i ie’ kumae: Waku Mike re wamarara andha . . .’

Kan idaru romo nigamu kunoke nigiero, man ibenweng’iri kud ayi lembe pa Heather, icopo timo ang’o?

Kan imito ituk ku wi yen man iring ve winyo, ibinwang’iri can. Kumeno bende, ibinweng’iri ku can kan ituro cik mi kurajo, calu ve cik mae: “Wuceru ni tarwang’.”—1 Jutesaloniki 4:3.

Kan ituro cik maeno, ibinwang’u matoke makani marac? Biblia uwacu kumae: “Ng’atu m’utimo tarwang’ meca edubo kum kume gire.” (1 Jukorinto 6:18) Nyo eno tie lemandha?

 Ju ma gitimo sayusac ginwang’u nia aradu ma gitimo tarwang’ i wang’ gamiri, ginwang’iri ku matoke moko kokoro, kud ikind matoke ma jurieyo piny e.

• APIDACWINY. Aradu ma dupa ma gilar gitimo tarwang’ i wang’ gamiri, giyero nia nwang’u cing’ ging’ei, nwang’u gitimo ngo.

• KOSO GENIRI. Ing’ei timo tarwang’, ng’atuman dok penjere kumae: ‘Jalawobi eni kunoke nyaku eni, udaru timo ngo tarwang’ ku ng’atu mange de?’

• TURCWINY. Jumanyir mapol gibed gimaru ng’atu ma bigwokogi ento ungo ng’atu ma copo nitio kugi pi nidaru ava mi kume. Jumaco mapol ke gibed gimaru ngo akeca jumanyir m’ular uyio gitim kugi tarwang’.

• Lembe ma pigi tek: Tekene ilar itimo tarwang’ ma fodi igemiri ngo, nwang’u ibayu valer peri giri, man nwang’u ibayu gin moko ma pire tie tek akeca. (Jurumi 1:24) Kumi tie gin ma pire tek, pieno ukwayu ngo iketh jutii kude swa!

Nyuth nia icungo ma tek, nwang’u ‘ibeceriri ni tarwang’.’ (1 Jutesaloniki 4:3) Ing’eye, kan ibin igamu kunoke igiero ka dong’ icopo nitimo ribiri; saa maeca ibitime kud anyong’a, m’umbe lworo, m’umbe jiji, man m’umbe adieng’acwiny ma bewok ka ng’atini utimo tarwang’ i wang’ gamiri.—Lembrieko 7:22, 23; 1 Jukorinto 7:3.

• Nyo ng’atu m’umeri andha copo mito enyoth leng’kum man paru peri?

• Nyo ng’atu m’ubedieng’ piri andha copo maru ewondi kara itur winjiri peri ku Mungu?—Juebrania 13:4.