Kepar lembe mae: Karen ucidho i nambu, fodi etimo dakika apar kumeni niai m’etundo, e wang’ acel ewinjo dwand ng’atu moko m’eng’eyo maber ubelwong’e man ubeyero ire yor ing’eye kumae:

Karen uloko wang’e yor ing’eye, man eneno jarimbe Jessica ugwaru cupa ario ma fodi eyabu wigi ayaba. Eneno nia eca tie kong’o. Jessica unyutho cupa acel mi kong’o ceng’ni iwang’ Karen man eyero kumae: “Karen i nyathin ungo m’icopo lworo ninambu kadok nyanok de!”

Karen ubemito nikwero, re Jessica utie jarimbe. Ebemito ngo Jessica unyang’ nia lembene ubenyang’e ngo. Re i andha, Jessica utie nyaku maber. Pieno ka en de ebemadhu, nen nia etie gin marac ungo. Karen ubeweco yor i ie kumae: ‘Etie nimadhu amadha kende, etie ngo ve nitio ku yath ma merojo.’

Ka nwang’u itie Karen, nwang’u icopo timo ang’o?

Kara imak yub ma cuu iwang’ lembe ma kumeno, ukwayu ing’ei nia itie ng’a. Ning’eyo nia itie ng’a, utie ning’eyo lembe m’icikiri nilubo i kwo peri man lembe m’iyio. Kan ing’eyo lembe maeno, ibibedo ku tego mi bimo wi kwo peri giri, kakare niweko jumange re ma gibim wii.—1 Jukorinto 9:26, 27.

Icopo tundo ninwang’u tego maeno nenedi? Kara itund ninwang’u tegone, kecak ku nidwoko wang’ penji 4 m’ulubo e.

Ning’eyo copo peri man kite peri mabeco bimedo tegocwiny peri.

LAPOR MI BIBLIA: Jakwenda Paulo ukiewo kumae: “Kadok [ambe ku bodho mi wec], endre ng’eyong’ec para re kumeno ngo.” (2 Jukorinto 11:6) Jakwenda Paulo unyang’ cuu i Lembagora, lembuno ukonye nicungo matek, saa ma jumange gibino niyero wec ma nwang’u copo turo cwinye. Eweko ngo wec migi marac utur cwinye.—2 Jukorinto 10:10; 11:5.

KENG’EYIRI GIRI: Kekiew bodho peri moko acel.

Kenyuth kite peri moko maber akeca. (Ku lapor, nyo idieng’ pi jumange? nyo itie won berocwiny? ng’atu ma jugeno? ma woro saa?)

Thol cot kaka m’elindere i ie, kumeno bende, kan iweko ng’ico peri re m’ubim wii, lembe m’ikeco nilubo man m’iyio i kwo peri copo ninyothere pio pio.

LAPOR MI BIBLIA: Jakwenda Paulo ung’eyo ng’ico pare, uketho eyero nia, “Kum anyong’a nega kum cik pa Mungu kum ng’atu ma yor i ic: ento aneno cik ma tung’ i wathkuma, m’ubekiedo kum cik mi pidoia, man ebekela i kol the cik mi dubo ma ni i wathkuma.”—Jurumi 7:22, 23.

KENG’EYIRI GIRI: Itie ku ng’ico makani m’ukwayu itim kero nidaru?

Nyo icopo maku taksi man iyero ni jaring taksine nia ewoth dhokere adhoka ikum ot moko nitundo moo (essence) pare uthum tup? Eno copo bedo lemkasegu man nyotho sente!

Lapor maeno ubemio iri ponji makani? Nibedo ku lembakeca i kwo peri ketho imediri nicidho i weng’i kakare nidhokiri karacel. Ing’eyo nia ibecidho kani, man ibitundo kuca nenedi.

LAPOR MI BIBLIA: Jakwenda Paulo ukiewo kumae: “Ka kumeno aringo kumeni, calu ma swa ngo.” (1 Jukorinto 9:26) Jakwenda Paulo utimo lembakeca i kwo pare, man ekwo nimakere ku lembakecane, kakare niketho wie uring swa i kwo.—Jufilipi 3:12-14.

KENG’EYIRI GIRI: Kekiew lembakeca adek m’imaru itund i ie ikind oro ma cen.

Ka wii ringo swa m’imbe ku lembe m’icungo i wie, ibibedo ni ng’atu m’ung’eyo ngo nimaku yub. Calu balang’ong’na ma loko rangi pare, in bende ibiloko kiti man ibidoko ve aradu wedu, eno binyutho kamaleng’ nia imbe ku gin moko ma copo nyutho nia itie ng’a.

Tung’ ku maeno, kan ibed ilubo lembe m’icungo i wie, ibiloko ngo kiti, man timo mi jumange bibedo ngo ku matoke i wii.

LAPOR MI BIBLIA: “Daniel ukeco i adundene” nia ebiworo cik pa Mungu kadok ebino bor ku jupagi de. Ecicopere nia etimo lembakeca maeno kinde ma fodi etie aradu. (Daniel 1:8) Kumeno re ma Daniel ulokere ngo, ento etimo nimakere ku lembe m’ecungo i wie.

KENG’EYIRI GIRI: In, icungo iwi lembe makani? Ku lapor: Nyo iyio nia Mungu unuti? Ka eyo, pirang’o iyio? Ang’o m’unyutho iri nia enuti andha?

Nyo iyio nia cik ma Mungu uketho pi kurajo utie pi bero peri giri? Ka eyo, pirang’o iyio?

Tokcen ne, nyo icopo maru ibed ve ithyen m’upodho i ng’om ma yamu copo leko man tero kaka moko ci, kunoke nyo icopo maru ibed ve yen m’ulage unyang’ lee ma kadok yamu matek de copo redho ngo? Mediri nibedo ni ng’atu ma wie ringo swa ngo, e ibidoko ve yen maeno. Eno bikonyi nidwoko wang’ penji, Atie ng’a?