Kepar lembe mae m’ubetimere uthieno mi kas’adek moko: Geoff, ma oro pare 17 udaru tic pare mi pacu man ebemito eyom; pieno ecidh ebedo iwi kom m’emaru lee, ebewinjo kwo, ewotho neno ko televizio.

E wang’ acel won ugam utundo man ecungo iwang’ dhugola, ma lembe ubeton i ie.

Ka nwang’u ibino Geoff, nwang’u icopo timo ang’o kara dhau maeno kud uwok i kindwu?

Niweco ku junyodo peri, etie ve niringo ku mutukari. Kan inwang’u juciko dhu yo, isayu yo mange.

 KU LAPOR:

Nyaku moko ma nyinge Leah uyero kumae: “Saa moko, kan abeweco i bang’ baba, akeacaku de maber, re nwang’u kara ebewinja ngo; ing’eye, kan ebin epoi ewacu kumae: ‘Tim ira kisa, kara ibino niweco i bang’a?’”

LEMBE TIE ADEK KUMENI MA LEAH COPO NG’IYO NITIMO.

1. 1. Nikok iwi won.

   Leah copo kok iwi won kumae: “Kewek lembe m’ibetimo no baba! kewinja!”

2. 2. Niweko weco i bang’ won.

   Leah copo kende kende niweko nikoro lembe pare ni won.

3. 3. Nikuro saa ma wang’ won bidong’ i ie thwolo, man nicaku koro ire lembene kendo.

   Leah copo ng’io saa mange pi niweco ku won dhok ku dhok, kunoke ecopo nikiewo ire lembe parene akiewa i barua.

Icopo yero ni Leah nia etim lembe makani ikind lembe adek maeno?

NG’EI LEMBE MAE: Paru pa won Leah ubino iwi lembe mange, uketho eng’eyo ngo nia lembe uton i Leah. Pieno, ka Leah ung’iyo nitimo Lembe mi 1, won copo ninyang’ ungo nia pirang’o ebekok i wie. Lembe maeno copo ketho bende won winje cuu ngo, man eca nwang’u enyutho tegowic ni won man emio ngo yung ire. (Juefeso 6:2) Tokcen ne, gin ario zoo gicopo ngo ninwang’u adwogi maber.

Kan eng’iyo nitimo Lembe mir 2, nwang’u eng’iyo lembe ma yot, ento mi rieko ngo. Pirang’o? Pilembe kara enwang’ adwogi maber i lembe m’ubesende, ubekwayu kokoro ekekor lembene ni won; bende, kara won utund nikonyo nyare maber, ubekwayu ekeng’ei lembe m’ubesende. Bedoling’ yiko lembe ngo.

Ka Leah ung’iyo nitimo Lembe mir 3, nwang’u eweko ngo nia yo ma juciko, niwacu lembe ma won ubetimo, ucere magwei nitundo niweco kude. Ecopo tundo asu niweco ku won, re i saa mange. Man kan eng’iyo nikiewo barua, saa maeca ndhundhu ecopo ninwang’ere maber.

Kiewo barua copo bende nikonye kara eyer tap lembe m’ebino maru nikoro. Kinde ma won bisomo baruane, ebinyang’ ikum lembe ma Leah ubino maru niyero man bende ikum peko pare. Pieno, Lembe mir 3 utie ku kony ni Leah man bende ni won. Kadok Leah ung’iyo niweco ku won dhok ku dhok kunoke nikadhu kud i barua de, nwang’u etimo ber, pilembe yo maeno urombo ku juk mi Biblia m’uyero, “walubu tok gin ma ketho kwiocwiny.”—Jurumi 14:19.

Iparu nia lembang’o mange ma tung’ tung’ ma Leah copo ng’iyo nitimo?

Kiew lembe acel m’iparu nia eromo timo. Ing’eye, kiew matoke ma lembene copo nimio.

Ng’ei lembe mae: saa moko, lembe m’ibed iyero ku kite ma junyodo peri giwinjo ko lembene berombo ngo.

KU LAPOR:

Junyodo peri ubemito ning’eyo nia pirang’o anyong’a mbe i ii. E iyero igi nia, “amito ngo awec iwi lembene.”

Ento gin giwinjo wec maeno nia, “Agenowu nok. Abiweco iwi lembene ku jurimba, kudwu ngo.”

Kepar nia ibekadhu kud i peko moko ma tek man junyodo peri gibemito nikonyi. Ento iyero igi kumae: “Kud wudieng’. Acopo daru lembene gira.”

• Junyodo peri giromo winjo wec maeno nenedi?

• Icopo dwoko lembe i kite ma cuu nenedi?