PONJI MIR 3
Rahab ubino ku yioyic iwi Yehova
Wakepar nia watie i adhura mi Yeriko. Adhura maeni nwang’ere i ng’om Kanan, kaka ma dhanu woro ngo Yehova i ie. Dhaku moko ma nyinge Rahab kwo i adhurane.
Saa ma Rahab ubino nyathin, ebed ewinjo uda ma jukoro iwi Musa, kite m’epoko ko i Nam Makwar man kite m’ewodho ko Nyithindho mir Israel kud i Misri. Ebed ewinjo bende kite ma Yehova ukonyo ko nyithindho mir Israel niloyo lwiny i dhu judhog’gi. Kawoni ewinjo nia Nyithindo mir Israel ugonjo ceng’ni kum adhura mi Yeriko!
Rahab ukanu julib pilembe ebedo ku yioyic iwi Yehova
Uthieno moko, Juisrael ario gicidho i Yeriko pi nilibo adhurane. Gitundo i ot pa Rahab. Ejologi i ot man emio igi kabedo. Saa mi diewor, ubimo mi Yeriko unyang’ nia julib ni i adhurane man nia gicidho i ot pa Rahab. E ubimo uoro jucidh jumakgi. Rahab ukanu julib arione i nying ot pare man eyero ni dhanu m’ubimone oro kumae: ‘Dhanune gibino i bang’a keni, ento gidaru niwok woko mir adhura. Wulub tokgi mor mor, kum wubirubogi!’ Nyo ing’eyo pirang’o Rahab ukanu julib?— Pilembe ebino ku yioyic iwi Yehova man eng’eyo nia Yehova bimio ng’om mi Kanan ni Nyithindho mir Israel.
I wang’ niweko ot pa Rahab, ging’olo ire nia en ku juruot pare gibiboth saa ma jubinyotho adhura mi Yeriko. Ing’eyo lembe ma giyero nia Rahab utim?— Giyero ire kumae: ‘Gam thol maeni ma kwar, liere i wang’ dirica. Kan itimo kumeno ci, dhanu ceke mi ot peri biboth.’ Rahab utimo lembe ma julib uyero ire kubang’e kubang’e. Ing’eyo lembe m’utimere i ng’eye?—
Yehova ubodho Rahab ku dhanu mi ot pare
Nindo moko ing’eye, Nyithindho mir Israel gicaku nidhoko adhura mi Yeriko ling’ ling’. Pi nindo abusiel, gidhoko adhurane wang’ acel kubang’ ceng’. Ento i nindo mir abiro, gidhoko adhurane wang’ abiro. Ing’eye gigam gikok ku dwandgi matek. E Yehova ketho gang’kidi m’utieko adhurane urwombre. Ento ot ma thol ma kwar ubino nilierere i diricane ucungo asu! Nyo ibeneno otne i cal no?— Rahab ku dhanu mi ot pare giboth!
Lapor pa Rahab copo ponji nenedi?— Rahab ubedo ku yioyic iwi Yehova pilembe eponjo lembe dupa ma wang’u ijo i wiye. In bende ibeponjo lembe dupa ma wang’u ijo i wi Yehova. Nyo itie ku yioyic i wiye calu Rahab?— Wang’eyo nia itie ku yioyic!
SOM I BIBLIA PERI
