PONJI MIR 13
Timoteo umaru nikonyo dhanu
Timoteo ubino jalawobi moko m’ubedo ayika nikonyo dhanu. Ewotho i adhura ma tung’ tung’ pi nikonyogi. Pieno, enwang’u anyong’a lee mandha i kwo pare. Nyo imaru ing’ei lembe moko iwi kwo pare?—
Min Timoteo giku wang’umire giponje iwi Yehova
Timoteo udongo i adhura ma julwong’o Listra. Saa m’ebino nyathin, wang’umire Lois man min ma nyinge Eunike, gicaku niponje iwi Yehova. Saa ma Timoteo dongo, emaru nikonyo dhanu mange ging’ei lembe iwi Yehova.
Saa ma fodi Timoteo ubino jalawobi, Paulo ukwaye nia ecak niwotho kude i tic mi rweyo lembanyong’a i adhura ma tung’ tung’. Timoteo yero ire kumae: ‘Atie ayika!’ Ebedo ayika nicidho konyo dhanu mange.
Timoteo cidho ku Paulo i adhura moko mi Makedonia ma julwong’o Tesaloniki. Pi nitundo kuca, ukwayu giwoth wotho mabor man gimak yei bende. Kinde ma gigam gitundo, gikonyo dhanu dupa ku ponjogi iwi Yehova. Ento dhanu moko bino kwiny kugi man gimito timogi rac. Pieno Paulo giku Timoteo gigam giweko adhurane man gicidh girweyo kakare mange.
Timoteo utie ku kwo mir anyong’a man mi mutoro
Ing’ei dwi moko, Paulo ukwayu nia Timoteo udok kendo ku ng’eye i Tesaloniki pi nineno nia umego ma kuca gibedo nenedi. Ugam ukwayu Timoteo ubed ku tegocwiny ma lee kara edok kendo i adhura maeno marac! Ento Timoteo ucidho pilembe ebino nidieng’ dit pir umego ma kuca. Ing’eye edwogo ku lembang’eya ma nia umego mi Tesaloniki gibedo maber!
Timoteo utimo tic karacelo ku Paulo pi oro dupa. Nindo moko Paulo ukiewo nia Timoteo re m’ubino ng’atu m’uromo, m’ecopo nioro kara ecidh ekony cokri ma tung’ tung’. Timoteo umaru Yehova man emaru bende dhanu.
Nyo imaru dhanu man imaru nikonyogi giponj lembe iwi Yehova?— Kan imaru, icopo bedo ku kwo maber akeca man mir anyong’a, calu kwo pa Timoteo!
