PONJI MIR 6
Daudi ubino mbe ku lworo
Ibed itimo ang’o ka lworo negi?— Saa moko nyo ibed iringo ibang’ meru kunoke ibang’ wuru kara ekonyi. Re ng’atu mange de tie ma copo nikonyi. Ng’atu moko mbe m’utie ku tego nikadhe. Nyo ing’eye?— Eyo, tie Yehova Mungu. Wakewec iwi jalawobi moko ma Biblia weco pire ma nyinge Daudi. Eng’eyo nia Yehova bikonye nindo ceke, pieno ebino mbe ku lworo.
Niai ma Daudi bino mukere, junyodo pare ubed uponje nimaru Yehova. Ponji maeno konyo Daudi nibedo mbe ku lworo kadok saa ma lembe ma nyayu ndiri unwang’e de. Eng’eyo nia Yehova bino Jarimbe man nia Ebikonye. Nindo moko, kinde ma Daudi ubino nikwayu rombe, umvor madit utundo man ukayu urombo acel! Ing’eyo gin ma Daudi utimo saa maeca? Eriemo umvorne man ve enege ku cinge! Nindo mange, undiek de ugam utundo nimaku rombe, Daudi nege bende! Iparu nia ng’a m’ukonyo Daudi?— Eyo, ubino Yehova.
Saa mange tie ma Daudi bedo ku tegocwiny akeca. Nyithindo mir Israel ubino nikiedo lwiny i dhu Jufilisti. Askari (jasuda) acel mi kind jufilisti udongo mabor lee akeca, ebino jarukara! Nyinge bino Goliath. Jarukara maeno ubino nicayu juaskari mir Israel man Yehova bende. Goliath ulwong’o jurumony mir Israel ku cac, nia gibin gikied lwiny i dhoge. Ento Nyithindo mir Israel ceke gilwore. Saa ma Daudi winjo lembuno, eyero ni Goliath kumae: ‘Abikiedo kudi! Yehova bikonya man abivoyi!’ Iparu nia cwiny Daudi bino tek?— Eyo, cwinye bino tek lee. Imaru ing’ei lembe m’utimere ing’eye?
Daudi ting’o lacur pare man kidi abic ma kumgi foth, e ecidho nikiedo ku jarukara maeno. Saa ma Goliath uneno nia Daudi tie nyathin, evone man ecaye. Ento Daudi yero ire kumae: ‘Ibino i bang’a ku palamularu, ento an abino i beng’i ku nying’ Yehova!’ E eketho kidi iwi lacur, eringo ibang’ goliath man ecanye. Kidine maku terwang’ Goliath! Jarukara maeno ugam upodho man etho! Ndiri nego Jufilisti lee, e gin ceke gikonjo ng’wec. Daudi m’ubino jalawobi utundo nenedi niloyo jarukara maeno?— Yehova re m’ukonye, kum Yehova ne bino ku tego lee nikadhu Goliath!
Daudi ubino mbe ku lworo pilembe eng’eyo nia Yehova bikonye
Uda maeni pa Daudi copo mio iri ponji ang’o?— Yehova tie ku tego lee akeca nikadhu ng’atu moko ci. Etie bende Jarimbi. Pieno, macen ka lworo bimeki, poi nia Yehova copo konyi kara cwinyi bed tek!
