PONJI MIR 11
Gikiewo lembe iwi Yesu
Nyo ibeneno dhanu ma junyutho i cal no?— Eno tie cal pa Matayo, Marko, Luka, Yohana, Petro, Yakobo, Yuda, man Paulo. Dhanu maeno ceke gikwo i saa marom ku Yesu, man gikiewo lembe iwi Yesune. Wakeponj lembe moko i wigi.
Ing’eyo ang’o iwi dhanu maeni?
Juadek mi kindgi ubino jukwenda ma girweyo lembanyong’a karacelo ku Yesu. Ing’eyo nia juadek ne gitie ng’agi?— Matayo, Yohana, man Petro. Jakwenda Matayo ku jakwenda Yohana ging’eyo Yesu maleng’ mandha, man gin ceke gikiewo kitabu mi Biblia m’uweco iwi kwo pa Yesu. Jakwenda Yohana ukiewo bende kitabu ma julwong’o Lembanyutha man waraga [barua] adek ma julwong’o Yohana ma kwong’a, Yohana mir Arionde, man Yohana mir Adege. Jakwenda Petro ukiewo waraga ario i Biblia. Nying waragane tie Petro ma Kwong’a man Petro mir Arionde. I waraga pare mir arionde, Petro ukiewo pi wec ma Yehova ugam uweco ko niai kud i polo; eyero pi Yesu kumae: ‘Maeni woda. Amare, man mutoro nega i kume.’
I cal maeno, dhanu mange de utie ma gikiewo kitabu [buku] ma tung’ tung’ m’uponjowa iwi Yesu. Acel mi kindgi tie Marko. Ve Marko bino nuti man eneno lembe ceke m’utimere saa ma jugam jumaku Yesu. Ma kucelo tie Luka. Luka bino munganga man ve edoko Jakristo ing’ei tho pa Yesu.
Dhanu mange ario m’ibeneno i cal eno gitie awiya pagi Yesu ma gilubo ng’eye. Ing’eyo nying’gi?— Nying’gi tie Yakobo man Yuda. Ku kwong’a gilar giyiyo ngo Yesu. Gibed giparu nia wiye nyothere. Ento ing’eye, gidok giyiyo Yesu man gidoko Jukristo.
Ng’atu ma tokcen m’ibeneno i cal ikind dhanu m’ukiewo Biblia tie Paulo. Iwang’ nidoko Jakristu, nyinge bino Saul. Egam edagu Jukristu man ebedo kwiny kugi akeca. Nyo ing’eyo gin m’uketho Paulo ulokere udoko Jakristu?— Bang’ acel, Paulo ubino niwotho i yo; e mbwang’ kumeni, ewinjo ng’atu moko ubeweco ibang’e niai kud i polo. Yesu re m’ubino niweco ibang’e! Epenjo Paulo kumae: ‘Pirang’o itie kwiny akeca kumeni ikum dhanu m’uyiya?’ Ing’ei lembuno, Paulo ugam ulokere man edoko Jakristu. Paulo ukiewo kitabu 14 mi Biblia, niai i Jurumi nicidho i Juebrania.
Wabed wasomo Biblia kubang’ ceng’, kumeno ngo?— Ka wasomo Biblia, waponjo lembe dupa iwi Yesu. Nyo imaru iponj lembe lee iwi Yesu?—
