PONJI MIR 1
Lembamung’a ma watie kud anyong’a ning’eyo
Nyo ng’atu moko daru yero iri lembamung’a moko?— * Biblia weco iwi lembamung’a moko ma pire tek ma julwong’o ‘lembamung’a maleng’.’ Etie leng’ pilembe eai ibang’ Mungu. Julwong’e lembamung’a pilembe dhanu ng’eyo pire ngo. Kadok jumalaika de gigam gimito ging’ei akeca iwi lembamung’ane. Nyo imaru ing’ei lembamung’ane?—
Iparu nia jumalaika gibino maru ging’ei lembang’o?
Yang’con, Mungu ucwiyo nico ku dhaku ma kwong’a. Nying’gi bino Adamu giku Eva. Mungu mio igi kabedo maleng’ ma julwong’o podho mir Eden. Ka nwang’u Adamu giku Eva giwinjo Mungu, kuno di gin kud awiya migi gidwoko ng’om zoo ni paradiso calu podhone. Kuno di bende gikwo i paradiso ne nja ku nja. Ento nyo ipoi i kum lembe ma Adamu giku Eva gitimo?—
Adamu giku Eva giworo ngo Mungu, uketho tin wabekwo ngo i paradiso. Ento Mungu yero nia ebiyiko ng’om ceke bidoko maleng’, e dhanu ceke bikwo nja ku nja man kud anyong’a. Ecopo bino timo lembuno nenedi? Lembene ugam ung’eyere ngo pi nindo ma dupa pilembe ebino lembamung’a.
Saa ma Yesu ubino i ng’om, eponjo dhanu iwi lembamung’ane lee. Eyero nia lembamung’ane ubino iwi Ker pa Mungu. Yesu ponjo dhanu girwo nia Kerne bin. Kerne biketho ng’om udok ni paradiso maleng’.
Nyo itie kud anyong’a calu idaru ng’eyo lembamung’ane?— Wii kud uwil nia dhanu m’uworo Yehova kende re ma gibikwo i Paradiso. Biblia koro iwa pi dhanu ma co ku ma mon dupa ma giworo Yehova. Nyo imaru iponj ning’eyo lembe i wigi?— Wakewec iwi ju moko mi kindgi man wanen kite ma wacopo lubo ko lapor migi.
SOM I BIBLIA PERI
^ par. 3 I nyathibuku maeni, kan ineno ayi mae (—) ing’ei penji moko, ng’ei nia ukwayu iyom man iwek nyathin peri udwoki wang’ penjine.
