PONJI MIR 4
Nyaku m’unyayu anyong’a i won man i Yehova
Yeftha ubetimo lembang’ola makani ni Yehova?
Ebino lembe ma yot ungo, ento nyaku pa Yeftha utimocalku lembang’ola pa won
Nyo ibeneno nyaku m’utie i cal no?— Eno tie nyaku pa Yeftha. Biblia nyutho ngo nyinge, ento wang’eyo nia enyayu anyong’a i won man i Yehova. Wakeponj lembe moko i wiye man iwi won ma Yeftha.
Yeftha bino ng’atu ma pireber man ebed etimo saa dupa pi niponjo nyaku pare iwi Yehova. Ebino bende jarukara man jatela maber. Pieno, Nyithindo mir Israel ukwayu nia etel wigi i lwiny ku judhog’gi.
Yeftha urwo nia Mungu ukonye kara eloi lwiny. Yeftha ung’olo nia kan eloyo lwiny ci, e ebimio ni Yehova ng’atu ma kwong’a ma biwok kud i ot pare kinde m’ebidok i pacu. Ng’atu m’ebimione bikwo man bitimo tic i hema mi thier pa Mungu pi dong nindo ceke mi kwo pare. Hema mi thier ubino kakare ma dhanu ubed ucidho i ie pi nitimo thier ni Mungu. Yeftha ugam uloyo lwiny! Nyo ing’eyo ng’atu m’uwok ma kwong’a kud i ot pare saa m’edwogo i pacu?—
Eyo, nyaku pa Yeftha! Nyaku pare ma kulong’, re kawoni ukwayu won uwek ecidhi. Lembuno uketho can unego adunde Yeftha. Ento, poi nia elar etimo lembang’ola. Wang’ acel, nyaku pare uyero ire kumae: ‘Baba, idaru yabu dhogi ni Yehova, tim ira calu gin m’uai kud i dhogi.’
ubang’ oro, jurimo pa nyaku pa Yeftha ubed ucidho niliewe
Can unego adunde nyaku pa Yeftha bende. Kuca i hema mi thier, ebigiero ngo kadi awiya de ebinyolo ngo. Ento emito dit niworo lembang’ola pa won man ninyayu anyong’a i Yehova. Eno bino lembe ma pire tek akeca ire nikadhu gier kunoke nyolo awiya. Pieno eweko ot pagi man ecaku nikwo i hema mi thier i dong kwo pare ceke.
Iparu nia lembe m’etimo eno unyayu anyong’a i won man i Yehova?— Eyo, andha unyayu anyong’a! In de kan iwor man imaru Yehova, icopo bedo ve nyaku pa Yeftha. Ibinyayu bende anyong’a lee i junyodo peri man i Yehova.
