Niai ma Samwel ubino nyathin ma nyanok, ebed ekwo man etimo tic i hema mi thier, kakare ma dhanu ubed ucidho i ie nitimo thier ni Yehova. Ing’eyo kite ma Samwel ucaku nibedo ko i hema mi thier? Wakeponj lembe moko iwi Hana ma min Samwel.

Hana bino mito dit nia ebed ku nyathin, ento pi oro dupa, ebedo mbe ku copo mi nwang’u nyathin. Pieno, erwo ibang’ Yehova, ekwayu nia ekonye. Eng’olo nia ka Yehova mio ire nyathin acel ma co ci, ebioro nyathin’ne ucidh ukwo man utim tic i hema mi thier. Yehova dwoko wang’ rwo pare, e egam enwang’u nyathin acel ma co. Ecaku nyinge Samwel. Calu elar eng’olo, kinde ma Samwel udoko ku oro adek kunoke ang’wen kumeni, Hana ugam utere i hema mi thier kara ecidh etim ni Mungu kuca.

Eli bino jalam madit i hema mi thier. Awiya pare ario ma co ubed utimo bende i hema keca. Calu wadaru nineno, hema mi thier ubino kakare ma jubed jutimo iie thier ni Mungu; ung’eire nia dhanu ceke mi ie ubed utimo lembe maber. Ento awiya pa Eli ubed utimo lembe ma reco akeca. Samwel ubed uneno lembe ma gibino timo. Nyo Samwel de timo lembe ma reco calu awiya pa Eli?— Ungo, Samwel umedere pare nitimo lembe m’atira, tap kite ma junyodo pare ugam uponje ko.

Iparu nia nwang’u Eli ucikere nitimo awiya pare ario ca nenedi?— Nwang’u ecikere nimio igi m’atira. Ecikere ngo niweko nia gitim tic asu i ot pa Mungu. Ento Eli utimo ngo kumeno, e lembe ton i Yehova ikume man ikum awiya parene. Yehova ng’olo nia ebimio igi m’atira.

Diewor acel, kinde ma Samwel ubino ninindo ewinjo ng’atu moko ubelwong’e kumae: ‘Samwel!’ E eringo i bang’ Eli, ento Eli yero ire kumae: ‘Alwong’i ngo.’ Lembuno utimere kendo wang’  ario. Ing’ei m’ewinjo lwong’o maeno wang’ mir adege, Eli yero ni Samwel nia kan ewinjo lwong’one kendo, ewac kumae: ‘Yer, Yehova; kum abewinjo.’ E Samwel utimo kumeca. E Yehova yero ni Samwel kumae: ‘Yer ni Eli nia abipoko lembe iwi ot pare pi lembe marac ma gitimo.’ Iparu nia ebino lembe mayot ni Samwel niyero lembe maeno ni Eli?— Ebino lembe ma yot ungo. Re kadok lworo bino nego Samwel de, etimo lembe ma Yehova yero nia etim. Lembe ma Yehova yerone utimere kakare. Awiya ario ma co pa Eli utho man Eli bende utho.

Samwel tie lapor maber iwa. Etimo lembe m’atira kwa kadok ebed eneno dhanu mange ubetimo lembe ma reco de. Ka in ke? Nyo ibilubo lapor pa Samwel, niwacu ibimediri nitimo lembe m’atira? Kan itimo kumeno ci, ibinyayu anyong’a i Yehova man bende i junyodo peri.