Saa moko dhanu becayuwa kunoke gibed gimaru ngo ka wabeyero pi Yehova. Lembuno copo ketho wabed kago niweko yero pi Mungu. Nyo saa moko idaru winjiri kumeno?— Biblia weco pi jalawobi moko m’umaru Yehova, ento m’uyenyo weko niyero pi Yehova. Nyinge bino Yeremia. Wakeponj lembe moko i wiye.

Kinde ma Yeremia bino jalawobi, Yehova yero ire nia etwong’ dhanu giwek nitimo lembe mareco. Eno bino lembe matek dit ni Yeremia, man lworo nege. Eyero ni Yehova kumae: ‘Ang’eyo ngo maram awec ko, kum an a nyathin.’ Ento Yehova yero ire kumae: ‘Lworo kud unegi kum abikonyi.’

 E Yeremia caku nitwong’o dhanu nia Mungu bikelo nyoth i wigi ka gilokiri ngo. Iparu nia dhanu utimo nimakere ku lembe ma Yeremia yero?— Ungo. Gicaye man kwinyo negogi lee ikume. Jumoko mi kindgi gimito ginege anega! Iparu nia Yeremia uwinjere nenedi?— Lworo nege man eyero kumae: ‘Abiyero pi Yehova kendo ki ngo.’ Ento nyo andha cwinye tur?— Ungo, cwinye tur ungo. Ugam ucopre ngo ni Yeremia nia ewek yero pi Yehova kum egam emare dit. Calu Yeremia uweko ngo niyero pi Yehova, Yehova de umedere asu nigwoke.

Ku lapor, nindo moko dhanu mareco ubolo Yeremia i vur ma thuth m’ucodho bik i ie. Ebedo mbe ku cam kadok ku pii. Gimito nia giwek Yeremia utho keca. Ento Yehova ukonye, e egam ewok ku keca!

Lapor pa Yeremia copo konyi nenedi?— Kadok lworo nege saa moko de, re eweko ngo niyero pi Yehova. Kan ibeyero pi Yehova, dhanu copo niceyi kunoke nidoko kwiny kudi. Lembe copo ton i ii kunoke gicopo piko lworo i ii. Ento kud iwek nyanok de niyero pi Yehova. Ebikonyi saa ceke, calu ndhu m’egam ekonyo ko Yeremia.