Nyo etie lembe mayot saa ceke niworo junyodo peri?— Saa moko eyot ungo. Ing’eyo de nia Yesu ubed unyutho woro ni Yehova man ni junyodo pare bende?— Lapor pare copo nikonyi kara in de ibed wor ni junyodo peri kadok i saa ma nyutho woro ne tie tek de. Wakeponj lembe moko i wiye.

Iwang’ nibino i ng’om, Yesu ubed ukwo i polo karacelo ku Won ma Yehova. Ento Yesu ubino bende ku junyodo i ng’om keni. Nying’gi bino Yosefu ku Maria. Ing’eyo nia gidoko junyodo pare nenedi?—

Yehova ting’o kwo pa Yesu kud i polo man ekethe i usau-nyodo pa Maria kara enyolere man ekwo iwi ng’om. Eno bedo lembe mir udu [thangu]! Yesu udongo i usau-nyodo pa Maria calu ma awiya mange de dongo ko i meg’gi. Ing’ey dwi abung’wen, Yesu ugam unyolere. E kumeno re ma Maria giku won ot pare ma Yosefu gigam gidoko ko junyodo pa Yesu iwi ng’om keni.

Saa ma Yesu ubino ku oro 12 kende, etimo lembe moko m’unyutho nia emaru Won ma Yehova lee. Lembe maeno utimere kinde ma Yesu ku juruot pare gicidho i Yerusalem pi nitimo Kadhu ku wijo. Saa ma gibino nidok i pacu, Yosefu giku Maria gisayu Yesu kpe, ginwang’e ngo. Ing’eyo kaka m’ebino iie?—

Pio pio, Yosefu giku Maria gidok kendo ku ng’eigi i Yerusalem nisayu Yesu kakare ceke. Cwinygi dieng’ akeca kum ginwang’e ngo. Ento ing’ei nindo adek, gigam ginwang’e i hekalu! Ing’eyo pirang’o Yesu bino i hekalu?— Pilembe keca re m’ecopo niponjo lembe iwi Won ma Yehova. Emaru Yehova man emito niponjo eng’ei lembe m’ecopo timo kara unyai anyong’a i ie. Kadok saa m’edongo man eteng’ni de, Yesu ubed unyutho woro ni Yehova saa ceke. Yesu woro Yehova kadok saa ma worone bedo ire tek man saa m’enyayu can i kume de. Nyo Yesu ubed uworo bende Yosefu ku Maria?— Eyo, Biblia yero nia eworogi.

Lapor pa Yesu copo ponji nenedi?— Icikiri niworo junyodo peri, kadok saa ma lembene yot ungo de. Nyo ibitimo kumeno?—