PONJI MIR 8
Yosia ubino ku jurimo mabeco
Iparu nia etie tek nitimo lembe m’atira?— Dhanu dupa paru nia etie tek. Biblia nyutho iwa nia ebino lembe mayot ungo ni jalawobi ma nyinge Yosia nitimo lembe m’atira. Ento ebino ku jurimo mabeco m’ukonye nitimo lembe m’atira. Wakeponj lembe moko iwi Yosia ku jurimo pare.
Won Yosia ubino Amon, jabim mi Yuda. Amon ubino ng’atu marac akeca man ebed eworo ayi gin m’acwiya. Saa ma won Yosia utho, Yosia re m’udoko jabim mi Yuda. Ento oro pare bino abora kende! Iparu nia en de ebino ng’atu marac ve won?— Ungo, ebino ng’atu maber!
Zefania utwong’o dhanu nia kud giwor ayi gin m’acwiya
Kadok saa m’ebino nyathin de, Yosia umito niworo Yehova. Pieno eng’iyo nibedo kende kende ku jurimo m’umaru Yehova. Jurimo maeno gikonyo Yosia nitimo lembe m’atira. Ng’agi ma gibino ikind jurimo pa Yosia?
Jarimo pare acel ubino Zefania. Zefania ubino jabila m’ubed utwong’o dhanu mi Yuda nia lembe moko marac bitimogi ka giworo ayi gin m’acwiya. Yosia winjo lembe pa Zefania man eworo Yehova kakare niworo ayi gin m’acwiya.
Jarimo mange pa Yosia ubino Yeremia. Gibino adiyo, man gibed gikwo ceng’ni ceng’ni saa ma gibino nidongo. Gibino jurimo ma ceng’ni akeca, uketho saa ma Yosia utho, Yeremia uthungo wer moko ma segi pi ninyutho kite ma tho pa Yosia umio ko ire can akeca. Yeremia ku Yosia gikonyiri i kindgi nitimo lembe m’atira man niworo Yehova.
Yosia ku Yeremia gikonyiri i kindgi nitimo lembe m’atira
Lapor pa Yosia copo niponji nenedi?— Kadok Yosia ubino nyathin de, re emito nitimo lembe m’atira. Eng’eyo nia ecikere nibedo jarimb dhanu m’umaru Yehova. In bende, nen nia ing’iyo jurimo m’umaru Yehova man ma romo konyi itim lembe m’atira!
