1, 2. Pirang’o icopo yero nia rwo tie giramia moko ma segi akeca, man pirang’o ukwayu wang’ei lembe ma Biblia ubeponjo iwi rwo?

YEHOVA tie ‘Jacwic mi polo ku ng’om,’ dhanu ceke mi ng’om ginen nyanok mandha i wange; ginen calu pi ma ton tok kud i dhu agulu. (Zaburi 115:15; Isaya 40:15) Kadok watie nyanok magwei i wang’ Yehova de, Zaburi 145:18, 19 uyero nia, ‘Yehova ni ceng’ni ku dhanu ceke m’ulwong’e. Ni dhanu ceke m’ulwong’e i lemandha.’ Kenen rwom madit maeno ma watie ko! Yehova ma en e Jacwic ma Jategokpo ubemito nibedo ceng’ni kudwa, man niwinjo rwo mwa. Andha, rwo tie rwom madit, etie giramia ma segi ma Yehova mio ni ng’atuman m’ikindwa.

² Ento, Yehova biwinjowa, kende kende tek wabeweco i bang’e i ayi m’ejolo. Waromo weco i bang’e i ayi m’ejolone nenedi? Wakenen lembe ma Biblia ubeponjo iwi rwo.

3. Pirang’o icikiri nirwo ibang’ Yehova?

³ Yehova ubemito nia irwo, kunoke iwec i bang’e. Wang’eyo nenedi? Wakwei isom Jufilipi 4:6, 7. Kepar pi lwong’o maeno maber. Jabim mi polo ku ng’om zoo ubedieng’ lee piri man ebemito ikor ire lembe peri, man kite m’iwinjiri ko.

4. Kan irwo saa ceke ibang’ Yehova, i mer mwu wukude doko tek nenedi?

⁴ Rwo konyowa nibedo ku mer ma ceng’ni ku Yehova. Ka saa ceke jurimo gibekoro i kindgi paru migi, adieng’a migi, man kite ma giwinjiri ko, i mer migi doko tek.  Nirwo ibang’ Yehova bende tie kumeno. I Biblia, enyutho iri paru pare, kite m’ewinjere ko, man enyutho lembe m’ebitimo nindo m’ubino. Icopo nyutho bende paru peri m’upondo nwang’u ibeweco ibang’e saa ceke. Kan itimo kumeno, i mer peri ku Yehova bidoko tek akeca.—Yakobo 4:8.

5. Wang’eyo nenedi nia Yehova winjo rwo ceke ngo?

⁵ Nyo Yehova winjo rwo ceke? Ungo, ewinjo rwo ceke ngo. I saa ma jabila Isaya ukwo i ie, Yehova uwacu ni nyithindho mir Israel kumae: “Kinde ma wutimo rwo dupa, abiwinjo ngo: cingwu pong’ ku rimo.” (Isaya 1:15) Pieno, ka wabedo ku wang’wa ngo, wacopo timo lembe ma dwoko kindwa ku Yehova bor; lembene copo ketho ewinjo ngo rwo mwa.

6. Pirang’o yioyic tie gin ma pire tek lee? Icopo nyutho nenedi nia itie ku yioyic?

⁶ Ka wamito Yehova uwinj rwo mwa, wacikara nibedo  ku yioyic i ie. (Marko 11:24) Jakwenda Paulo ukoro kumae: “Man ma yioyic umbe nyayu mutoro i ie copre ngo; kum ng’atu m’ubino ba Mungu maku ekoeyi be nia enuti, man e jamic mi ju ma giyenye.” (Juebrania 11:6) Ento niyero kende kende nia watie ku yioyic uromo ngo. Wacikara niworo cik pa Yehova kubang’ ceng’ pi ninyutho ngbeng’ nia watie andha ku yioyic.—Som Yakobo 2:26.

7. (a) Pirang’o wacikara ninyutho jwigiri man woro ka waberwo ibang’ Yehova? (b) Wacopo nyutho nenedi nia wabeyero lemandha ni Yehova i rwo mwa?

⁷ Ka waberwo ibang’ Yehova, wacikara ninyutho jwigiri man nibedo wor. Pirango? Ka nwang’u wabeweco ibang’ rwoth kunoke ibang’ prezida, nwang’u wacopo niweco ibang’e ku woro. Yehova tie Mungu ma Jategokpo, pieno, nyo wacikara ngo ninyutho jwigiri man woro ma lee ka wabeweco ibang’e? (Thangambere 17:1; Zaburi 138:6) Wacikara niyero lemandha ni Yehova, niwacu, niyero ni Yehova lembe m’uai kud i adundewa giwa, kakare nibedok kwa iwi lembe acel wang’ dupa.—Matayo 6:7, 8.

8. Lembang’o mange ma wacikara nitimo ka waberwo pi piny moko?

⁸ M’umedo maeno, ka waberwo pi piny moko, wacikara nitimo nimakere ku lembe ma waberwo pire. Ku lapor, ka waberwo ibang’ Yehova pi yeny mwa ma kubang’ ceng’, wacikara ngo nibedo junyap man niparu nia Yehova re ma bimio iwa gin ceke, kadok bende gin ma wacopo ninwang’u ku tego mwa. Ento wacikara nitimo tic ku tego, man niyio nitimo tic moko ci ma wacopo timo. (Matayo 6:11; 2 Jutesaloniki 3:10) Kunoke, ka waberwo ibang’ Yehova nia ekonywa kara wawek timo moko marac, wacikara niuro lembe moko ci ma copo bidhowa.  (Jukolosai 3:5) Wakewec kawoni iwi penji moko ma dhanu dupa gibed gipenjiri ko iwi rwo.

9. Wacikara nirwo ibang’ ng’a? Yohana 14:6 ubeponjowa ku lembang’o iwi rwo?

⁹ Wacikara nirwo ibang’ ng’a? Yesu uponjo julubne nia girwo ibang’ “Wegwa ma ni i polo.” (Matayo 6:9) Eyero bende kumae: “An a yo ku lemandha, ku kwo de: Ng’atu acel de mbe ma bino ba Wego, ndhu ni kuma re.” (Yohana 14:6) Pieno, wacikara nirwo ibang’ Yehova kende nikadhu kud ibang’ Yesu. Nirwo nikadhu kud ibang’ Yesu thelembene tie ang’o? Kara Yehova uwinj rwo mwa, wacikara ninyutho woro pi dito ma segi ma Yehova umio ni Yesu. Calu ma waponjo, Yesu ubino i ng’om kara ebodhwa niai kud i dubo man tho. (Yohana 3:16; Jurumi 5:12) Yehova ung’io Yesu nibedo bende Jalam madit man Japoklembe.—Yohana 5:22; Juebrania 6:20.

10. Nyo ukwayu wabed i kite moko ma segi ka waberwo? Kekor.

¹⁰ Nyo wacikara nibedo i kite moko ma segi saa ma waberwo? Ungo, Yehova ubekwayu ngo nia kokoro wakerum aruma, wabed abeda kunoke wacung acunga saa ma waberwo. Biblia ubeponjowa nia wacopo niweco ibang’ Yehova i kit bedo moko ci, re ma nyutho woro. (1 Lemkei 17:16; Nehemia 8:6; Daniel 6:10; Marko 11:25) Gin ma Yehova neno nia pire tek lee, tie adunde m’atira ma wabeweco ko ibang’e, ento ungo kit bedo moko ma segi i saa mi rwo. Wacopo rwo ku dwandwa ma tek kunoke ling’ling’ kakare moko ci ma wanwang’ara i ie, ecopo bedo dieceng’ kunoke diewor. Ka waberwo ibang’ Yehova, wacopo  nigeno nia ebiwinjowa kadok ng’atu moko mange mbe m’ubewinjo de.—Nehemia 2:1-6.

11. Kekwan lembe moko ma wacopo nirwo pigi ibang’ Yehova.

¹¹ Wacopo rwo pi lembang’o? Wacopo rwo pi gin moko ci m’urombo ku yeny pa Yehova. Biblia yero kumae: “Tek wakwayu gin moko calku yeny ma ie yenyo, ewinjowa.” (1 Yohana 5:14) Nyo wacopo kwayu pi yeny mwa ma segi? Eyo. Nirwo ibang’ Yehova copo bedo ve niweco ibang’ jarimo ma ceng’ni. Wacopo koro ni Yehova lembe moko ci ma nwang’ere i paru mwa man i adundewa. (Zaburi 62:8) Wacopo kwayu nia emii iwa tego pare ma en e tipo maleng’, kara ukonywa nitimo lembe m’atira. (Luka 11:13) Wacopo bende nikwayu Yehova umii iwa rieko kara wamak yub ma cuu, man wacopo kwayu emii iwa tego mi nyego ku peko ma tung’ tung’. (Yakobo 1:5) Wacikara nikwayu Yehova uwek dubo mwa. (Juefeso 1:3, 7) Wacikara bende nirwo pi jumange, ku lapor, pi juruot mwa man umego ku nyimego mwa mi cokiri.—Tic mi Jukwenda 12:5; Jukolosai 4:12.

12. Lembang’o ma pire tek akeca ma wacikara niketho i rwo mwa?

¹² Lembang’o ma pire tek akeca ma wacikara niketho i rwo mwa? I rwo mwa, wacikara niketho mi kwong’o Yehova man yeny pare. Wacikara nidwoko foyofoc ire niai kud i adundewa pi gin ceke m’etimo iwa. (1 Lemkei 29:10-13) Wang’eyo lembe maeno pilembe kinde ma Yesu ubino iwi ng’om, eponjo julubne kite mi rwo. (Som Matayo 6:9-13.) Eyero nia gicikiri nikwayu mi kwong’o, nying’ Mungu udok leng’, niwacu, jutii kude ni gin maleng’. Bende, Yesu yero nia wacikara nikwayu Ker pa Mungu ubin man yeny pa Mungu utimere iwi ng’om ngung’. Kinde ma Yesu udaru nirwo pi piny maeno ma pigi tek akeca, kan ing’eye edok eyero nia wacikara  nirwo pi yeny mwa ma segi. Ka waketho Yehova man yeny pare i kabedo ma kwong’a i rwo mwa, nwang’u wabenyutho nia lembe maeno re ma pire tek akeca iwa.

13. Rwo mwa ucikere nibedo bor rukani?

¹³ Rwo mwa ucikere nibedo bor rukani? Biblia unyutho ngo. Rwo mwa copo bedo adundo kunoke bor nimakere ku lembe ma waberwo pire. Ku lapor, wacopo  rwo adundo iwang’ nicamu ento wacopo rwo ma bor ka wabedwoko foyofoc ni Yehova kunoke ka wabekoro ire adieng’acwiny mwa. (1 Samwil 1:12, 15) Wacikara ngo nirwo rwo ma bor pi nitelo nen mi jumange, calu ma dhanu moko gibed gitimo con i saa ma Yesu ukwo i ie. (Luka 20:46, 47) Yehova foyo ngo rwo ma kumeno. Lembe ma pire tek ni Yehova tie nia rwo uai kud i adundewa.

14. Wacikara nirwo wang’ adi, man lembe maeno ubeponjowa nenedi iwi Yehova?

¹⁴ Wacikara nirwo wang’ adi? Yehova ubekwayu nia wabed wawec ibang’e saa ceke. Biblia uyero nia wacikara ‘nirwo thirithiri,’ ‘nibedo asu irwo,’ man ‘nirwo areri.’ (Matayo 26:41, NWT; Jurumi 12:12; 1 Jutesaloniki 5:17) Saa ceke Yehova tie ayika niwinjo rwo mwa. Wacopo  nidwoko ire foyofoc kubang’ nindo pi mer man pi berocwiny pare. Wacopo bende nikwayu nia etel wiwa, emi iwa tego, man ejuk cwinywa. Kan andha waneno rwom ma watie ko mi rwo ibang’ Yehova ni gin ma pire tek, wabiweco kude saa ceke m’ukwayere.

15. Pirang’o wacikara niyero “amen” i thum pa rwo?

¹⁵ Pirang’o wacikara niyero “amen” i thum pa rwo? Wec “amen” thelembene tie “tap” kunoke “ebed kumeno.” Etie kite ma wanyutho ko nia lembe ma wayero i rwo mwa tie ve ma wayere ko, wayere thwolo thwolo niai kud i adundewa. (Zaburi 41:13) Biblia ubeponjowa nia eber niyero bende “amen,” ling’ling’ kunoke ku dwandwa ma tek, i thum pa rwo m’ikind dhanu dupa, pi ninyutho nia lembe ma juai juyero i rwo tie kumeca.—1 Lemkei 16:36; 1 Jukorinto 14:16.

16. Nyo andha Yehova dwoko wang’ rwo mwa? Kekor.

¹⁶ Nyo andha Yehova dwoko wang’ rwo mwa? Eyo, edwoko. Biblia lwong’o Yehova ‘Jawinj rwo.’ (Zaburi 65:2) Yehova winjo man dwoko wang’ rwo ma dhanu milioni dupa girwo ko kud adundegi ceke, man etimo kumeno i kite ma tung’ tung’.

17. Yehova betio nenedi ku jumalaika man jurutic pare mi wi ng’om pi nidwoko wang’ rwo mwa?

¹⁷ Yehova tio ku jumalaika man jurutic pare mi wi ng’om pi nidwoko wang’ rwo mwa. (Juebrania 1:13, 14) Watie ku lapor dupa mi dhanu ma gigam girwo nia jukonygi kara ginyang’ i Biblia, ing’eye nyanok, Jumulembe pa Yehova utundo i bang’gi. Biblia unyutho nia jumalaika gibed gidikiri bende i tic mi rweyo “lembanyong’a” iwi ng’om zoo. (Som Lembanyutha 14:6.) Bende, dupa m’ikindwa gidaru rwo ibang’ Yehova pi peko kunoke pi  yeny ma segi, man ing’eye, ginwang’u kony ma gitie ku yenyne ibang’ umego ku nyimego.—Lembrieko 12:25; Yakobo 2:16.

18. Yehova betio nenedi ku tipo pare maleng’ man Biblia pi nidwoko wang’ rwo mwa?

¹⁸ Yehova tio bende ku tipo pare maleng’ pi nidwoko wang’ rwo mwa. Ka warwo kara wanwang’ kony mi nyego ku peko moko, ecopo tio ku tipo pare maleng’ pi nimio iwa telowic man nimio iwa kero. (2 Jukorinto 4:7) Yehova tio bende ku Biblia pi nidwoko wang’ rwo mwa man pi nikonyowa nimaku yub mi rieko. Kinde ma wabesomo Biblia, wacopo nwang’u giragora ma konyowa. Yehova copo bende nitelo wi umego moko saa mi coko, pi niyero tap wec ma watie ku yenyne kunoke ecopo nitelo wi jadit cokiri acel pi ninyamu i paru moko mi Biblia karacelo kudwa.—Jugalatia 6:1.

19. Pirang’o saa moko wacopo neno nia ve Yehova ubedwoko ngo wang’ rwo mwa?

¹⁹ Re saa moko, waromo penjara kumae: ‘Pirang’o Yehova ubegalu kumeni ku dwoko wang’ rwo para?’ Ng’ei nia, en re m’eng’eyo saa man kite m’ukwayu edwok ko wang’ rwo mwa. Eng’eyo yeny mwa. Wacopo medara nirwo asu pi ninyutho nia andha waketho cwinywa iwi gin ma waberwo pire ibang’e. (Luka 11:5-10) Saa moko Yehova copo dwoko wang’ rwo mwa i kite ma waparu ngo. Ku lapor, wacopo rwo pi peko moko ma tek, ento kakare nidaru pekone, ecopo mio iwa kero mi cire acira.—Som Jufilipi 4:13.

20. Pirang’o wacikara nirwo ibang’ Yehova saa ceke?

²⁰ Watie ku rwom madit akeca mi rwo ibang’ Yehova! Wacopo bedo m’umbe jiji nia ebiwinjowa. (Zaburi 145:18) Bende, ka wamedara nirwo ibang’ Yehova saa ceke niai kud i adundewa, mer mwa ibang’e bigam doko tek.