KAN ibesomo lembang’eya i gazeti, ibeneno televizio, kunoke ibewinjo radio, isomo, ineno man iwinjo akeca pi lembe mareco, lwiny man nek. Saa moko nyo in giri bende ibesendiri ku twoyo moko, kunoke nyo pi tho pa ng’atu moko m’imaru.

Dong’ kepenjiri kumae:

• Nyo Mungu umaru nia kwo para ku kwo mi juruot para ubedi ndhu kumeni?

• Acopo nwang’u kony kani kara anyeg ku peko para?

• Nyo kwiocwiny mandha bibedo nuti nindo moko de?

Biblia udwoko wang’ penji maeno i kite ma copo juko cwinywa.

• Dhanu binwang’u litho kendo ngo, gibitii ngo, gibitho de ngo.—Lembanyutha 21:4

• “Jarabala bipor malu calu thwon ruda.”—Isaya 35:6

• “Wang’ abinga bilund yabre.”—Isaya 35:5

• Ju m’utho gibicer.—Yohana 5:28, 29

•  Ng’atu moko mbe ma biremo.—Isaya 33:24

• Dhanu ceke bibedo ku cam lee akeca.—Zaburi 72:16

Saa moko icopo paru nia lembe m’iai isomo i buku maeni i mbaya ario m’ukadhu, utie lek. Ento Mungu ung’olo nia ceng’ni eni, ebikelo alokaloka maeno iwi ng’om. Biblia ukoro kite m’ebikelo ko alokalokane.

M’uweko maeno, Biblia ukoro lembe mange dupa. Enyutho iwa lembe ma wacikara nitimo kara wakwo kud anyong’a mandha niai kawoni. Kepar nyanok iwi lembe ma tung’ tung’ ma bedieng’o cwinyi. Ecopo bedo koso sente, peko mi ot, leng’kum ma cuu ngo, kunoke tho pa ng’atu moko m’imaru lee. Biblia copo konyi ninyego ku peko maeno; man pi nijuko cwinyi, ecopo nidwoko wang’ penji ma calu ve:

• Pirang’o wabesendara?

• Wacopo nyego ku peko mwa nenedi?

• Nyo juruot mwa copo bedo kud anyong’a?

• Ka watho, wacidho kani?

• Nyo wabineno kendo wedi mwa ma wamaru ma gidaru nitho?

• Pirang’o wacopo bedo ku genogen nia Mungu bitimo lembang’ola pare ceke m’eng’olo?

 Calu m’ibesomo buku maeni, eno nyutho nia andha imito ning’eyo lembe ma Biblia ubeponjo. Buku maeni bikonyi. Udukuwecman utie ku penji ma bikonyi kara inyang’ i Biblia maber mandha. Dhanu milioni dupa gimaru niponjo Biblia ku Jumulembe pa Yehova. Watie ku genogen nia in de ibimaru. Dong’ Mungu ukonyi inwang’ lembe ma Biblia ubeponji ko!