1, 2. Dhanu gibed gipenjo penji pi ning’eyo lembang’o ma tung’ tung’?

AWIYA gibed gipenjo penji dupa. Icopo koro igi lembe ma gipenjo, re gimediri asu nipenjo nia, ‘Pirang’o?’ Kadok ipimo nidwoko wang’ penjine de, gicopo penjo asu kumae, ‘Pirang’o ke?’

² Kadok watie awiya kunoke judongo de, wan ceke wabed wapenjo penji. Wacopo penjo penji pi ning’eyo gin ma wabicamu, ma wabikendo, kunoke ma wabing’iewo. M’umedo maeno, wacopo bedo ku penji moko ma pigi tek iwi kwo man iwi nindo m’ubino. Ento tek wabenwang’u ngo dwokowang’ penjinegi i kite ma copo ninyang’uwa, wacopo weko nipenjo penji.

3. Pirang’o dhanu dupa gibed giparu nia gicopo ngo ninwang’u dwokowang’ penji migi ma pigi tek?

³ Nyo, Biblia udwoko wang’ penji ma pigi tek ma wabed wapenjo? Dhanu moko gibed giparu nia Biblia udwoko wang’ penjine, ento ginwang’u nia, nyang’ i Biblia tie tek akeca. Giromo paru nia ju m’ung’eyo dwokowang’ penjinegi tie kende kende juponji kunoke judong dini. Jumange ke, lewic negogi nipenjo penji. In ke paru peri tie ang’o?

4, 5. Ibed ipenjiri ku penji makani ma pigi tek? Pirang’o ukwayu imediri nisayu dwokowang’ penjinegi?

⁴ Saa moko nyo ibed imaru inwang’ dwokowang’ penji ma calu ve: Pirang’o abekwo? Kinde m’abitho, abicidho kani? Mungu tie nenedi? Yesu ma en e japonji madit, uyero kumae: “Wumeduru nikwayu [kunoke, nipenjo], man ebimire iwu; wumeduru niyenyo, e wubinwang’u;  wumeduru nidwong’o, e ebiyabre iwu.” (Matayo 7:7, NWT) Cwinyi kud utur, mediri asu nisayu dwokowang’ lembe ma tap i penji peri nitundo ibinwang’e.

⁵ Eyo, kan ‘imediri niyenyo,’ ibinwang’u dwokowang’ penjinegi i Biblia. (Lembrieko 2:1-5) Nyang’ i dwokowang’ penji maenonegi tie tek ungo. Lembe m’ibeponjo bimio iri kwo mi mutoro tin, man genogen maber akeca pi nindo m’ubino. Wakewec iwi penji acel m’unyotho wi dhanu dupa.

6. Pirang’o dhanu moko gibed giparu nia Mungu dieng’ ungo pi masendi migi?

⁶ Dhanu mapol gibed giparu nia Mungu dieng’ ungo piwa. Giyero nia, kan andha Mungu bedieng’ piwa, nwang’u ng’om copo bedo tung’ akeca ku kite m’etie ko tin eni. Kakare ceke, lwiny, adegi man masendi utie. Dhanu giberemo, ginwang’iri ku can, man gibetho. Jumoko gipenjiri kumae: ‘Ka Mungu bedieng’ piwa, pirang’o ke ebecero ngo masendi maeno ceke?’

7. (a) Judong dini giponjo lembang’o ma ketho dhanu gipar nia cwiny Mungu rac? (b) Pirang’o wacopo niyero m’umbe jiji nia, Mungu beketho ngo en lembe marac utimere?

⁷ Saa moko, judong dini gibed giketho dhanu gipar nia cwiny Mungu tie rac. Ka peko moko ma lee uwok, giyero nia eca tie yeny pa Mungu. Giyero nia Mungu mito lembe maeno utimere. I andha, ka giyero kumeno, nwang’u gibeloko nia Mungu re m’unyayu pekone. Ento, Biblia ponjo nia Mungu tie ngo nyanok de janyai lembe marac. Yakobo 1:13 uyero nia Mungu mulo ngo i ng’atu moko ku lembe marac. Eyero kumae: “Ng’atu moko tek abidhe [niwacu, amulaic] betime kud ewac kumae, Mungu bebidha en [bemulo ia en]; kum dubo copo bidho  Mungu ngo, en de ebidho ng’atu moko ngo.” Eno nyutho nia kadok Mungu ubecero ngo lembe marac nitimere de, utie ngo nyanok de en re m’ebeketho lembene utimere. (Som Yob 34:10-12.) Wakemak lapor acel.

8, 9. Pirang’o ecibedo lembe m’atira ngo niloko nia Mungu re m’ubenyayu peko ma tung’ tung’ ikumwa? Mii lapor acel.

⁸ Kepar nia jalawobi moko ubekwo yo pagi ku junyodo pare. Won umare lee mandha man eponje ku kite m’ecopo nimaku ko yub ma cuu. Ing’eye, jalawobi maeno ujai ni won man esaru ku yo pagi. Ecaku nitimo lembe marac, e ing’eye ekwong’o ninwang’u peko. Nyo icopo loko nia won nyathin eno re m’unyayu peko ikum nyathin pare pilembe ecere ngo saa m’ebesaru kud i pacu? M’umbe jiji, ungo! (Luka 15:11-13) Calu wego maeno, Mungu bende ucero ngo dhanu kinde ma ging’io nijai ire man nitimo lembe marac. Pieno, ka lembe moko marac utimere, wacikara nipoi nia, utie ngo Mungu re m’uketho lembene utimere. Ecibedo lembe m’atira ngo niloko nia Mungu re m’ubenyayu peko.

⁹ Thelembe moko maber akeca utie m’uketho fodi Mungu ubecero ngo lembe mareco nitimere. I Wic mir 11 mi buku maeni, ibiponjo gin ma Biblia uyero iwi thelembene. Ento, bed m’ing’eyo nia Mungu umaruwa, man nia ebenyayu ngo en peko ma tung’ tung’ ikumwa. I andha, En kende re m’ecopo daru pekonegi.—Isaya 33:2.

10. Pirang’o wacopo bedo m’umbe jiji nia andha Mungu biyiko lembe ceke marac ma dhanu mareco ginyayu?

¹⁰ Mungu tie leng’. (Isaya 6:3) Lembe ceke m’ebetimo tie leng’, umbe ku cilo man tie cuu. Pieno, wacopo nigene. Dhanu gitie ngo ve en. Saa moko gibed gitimo lembe mareco. Kadok jabim ma jugeno lee akeca de mbe ku copo mi daru lembe ceke marac ma dhanu mareco ginyayu. Ng’atu moko acel de mbe ma tie ku copo ma  rom ku pa Mungu. Etie ku copo mi daru lembe ceke marac ma dhanu mareco udaru ninyayu, man ebidarugi. Ebikabu lembe mareco ceke magwei.—Som Zaburi 37:9-11.

11. Mungu winjere nenedi pi masendi m’ibenweng’iri ko?

¹¹ Mungu winjere nenedi kan ebeneno lembe m’ubetimere iwi ng’om man lembe m’ibekadhu kud i ie? Biblia ponjo nia Mungu “maru bedopwe.” (Zaburi 37:28) Pieno, eketho cik pi nikoyo kind lembe maber ku lembe marac. Edagu ka dhanu gibesendiri. Biblia yero nia yang’con, “can unege i adundene” saa m’egam eneno ng’om upong’ ku lembe marac. (Thangambere 6:5, 6) Mungu ulokere ngo. (Malaki 3:6) Biblia yero nia Mungu dieng’ lee piri.—Som 1 Petro 5:7.

12, 13. (a) Pirang’o wamaru dhanu wadwa man wadieng’ pigi, man wabed wawinjara nenedi pi masendi m’utie i ng’om? (b) Pirang’o wacopo bedo m’umbe jiji nia Mungu bikabu masendi ku lembe marac ceke?

¹² Biblia ubeyero bende nia Mungu ucwiowa i ayi pare. (Thangambere 1:26) Eno nyutho nia Mungu ucwiowa ku kite ma tung’ tung’ ma beco ma en de etie ko. Pieno, kan ibed iwinjiri rac kinde m’ibeneno dhanu m’umbe ku kosa gibesendiri, ng’ei nia Mungu lund winjere rac magwei kan eneno lembe maeno! Wang’eyo nenedi nia Mungu winjere kumeno?

¹³ Biblia ubeponjowa nia “Mungu en e mer.” (1 Yohana 4:8) Mer re ma cwalu Mungu nitimo lembe ceke. Pieno, watie ku mer pilembe Mungu de tie ku mer. Kepar lembe mae: Ka nwang’u itie ku copo, nyo icopo nikabu masendi ku lembe marac ceke mi ng’omi? M’umbe jiji nwang’u icopo nikabu, pilembe imaru dhanu. Ka  Mungu ke? Etie ku copo man bende emaruwa; pieno ebikabu masendi ku lembe marac ceke. Icopo bedo m’umbe jiji nia, lembang’ola ceke pa Mungu ma juweco pigi i acaki mi buku maeni bitimere kubang’e kubang’e! Ento kara igen lembang’ola maeno, ukwayu ikeng’ei lembe mange dupa iwi Mungu.

14. Nying’ Mungu tie ng’a, man wang’eyo nenedi nia wacikara nitio ku nyingene?

¹⁴ Kan imaru ibed jarimb ng’atu moko, lembang’o m’ilar inyutho ire mi kwong’o? Ilar inyutho ire nyingi. Nyo nying’ Mungu tie dee? Dini dupa yero nia nying’ Mungu tie Mungu kunoke Rwoth. Ento nying’ maeno gitie ngo nyinge mandha: gitie kende kende nying’ mi dito, calu ve “ubimo” kunoke “prezida.” Mungu uyero iwa nia nyinge tie Yehova. Zaburi 83:18 uwacu kumae: “Kara ging’ei nia in i kendi ma nyingi Yehova, Ini Ng’atu ma Malu Ngbir wi ng’om ngung’.” Dhanu ma gigam gikiewo Biblia, gitio ku nying’ Mungu wang’ elufu swa. Yehova mito nia ing’ei nyinge man nia itii ku nyingene. Enyutho iri nyinge kara idok jarimbe.

15. Nying’ ma Yehova thelembene tie ang’o?

¹⁵ Nying’ ma Yehova, utie ku thelembe ma lee akeca.  Thelembene tie nia Mungu tie ku copo mi pong’o lembang’ola pare moko ci m’eng’olo, man mi timo lembakeca pare. Gin moko acel de mbe ma copo nicere. Yehova kende re ma copo bedo ku nying’ maeno. *

16, 17. Thelembe mi wec mae tie ang’o? (a) “Jategokpo” (b) “Ubimo mi nja” (c) “Jacwic.”

¹⁶ Calu ma wasomo i wang’e, Zaburi 83:18 uwacu iwi  Yehova kumae: “In i kendi . . . mi ng’atu ma Malu Ngbir.” Bende, Lembanyutha 15:3 uyero kumae: “Tic peri gidwong’ ma wang’u ijo de, e [Yehova] Mungu, ma Jategokpo; yo peri bedo pwe man andha de, in Ubimo mi nja.” Nying’ mi dito “Jategokpo” thelembene tie ang’o? Thelembene tie nia Yehova re ma tie ku kero ma lee nikadhu ng’atu moko ci i ng’om kud i polo zoo. Man nying’ mi dito “Ubimo mi nja” thelembene tie nia En re m’ebedo rondo rondo. Zaburi 90:2 ukoro nia en e Mungu ma rondo ku rondo. Eno tie lembe mi zungo ngo nia?

¹⁷ Yehova kende re ma tie Jacwic. Lembanyutha 4:11 uyero kumae: “Eromo kudi, Rwoth mwa man Mungu mwa, ya igam dwong’ man yung ku tego; kum icwio gin ceke, man gibedo nuti nikum yeny m’iyenyo, gicwiri de.” Eyo, nik’ebed jumalaika mi polo, kadok nyikaluku  mi kor polo, kadi nying yen, kunoke rec mi nam, Yehova re m’ucwio piny ceke m’icopo paru pigi!

18. Pirang’o dhanu moko gibed giparu nia giromo ngo kadok nyanok de nibedo jurimb Mungu? Biblia ke yero ang’o iwi lembuno?

¹⁸ Dhanu moko, ka gibesomo lembe iwi kite pa Yehova ma wang’u ijo, lworo makugi man giparu kumae: ‘Mungu tie ku tego ma lee dit, etie ng’atu ma dwong’ akeca man ebor dit kudwa, pieno, ecopo dieng’ pira ngo.’ Ento, nyo Mungu mito nia wabed wapar kumeno? Ungo nyanok de. Yehova mito ebed ceng’ni kudwa. Biblia yero nia Mungu tie “bor ungo kudwa ku bang’wa nzu.” (Tic mi Jukwenda 17:27) Mungu mito nia icor ceng’ni i vute, man eng’olo nia en bende ‘ebicoro ceng’ni i vuti.’—Yakobo 4:8.

19. (a) Icopo timo ang’o pi nidoko jarimb Mungu? (b) Ibed imaru akeca kite makani pa Mungu?

¹⁹ Icopo timo ang’o pi nidoko jarimb Mungu? Yesu uyero kumae: “E kwo ma rondo ku rondone e eni, nia [gitund ning’eyo] in m’i Mungu mandha i kendi, ku ng’atu m’ioro, ma Yesu Kristu.” (Yohana 17:3) Mediri niponjo Biblia, e ibitundo ning’eyo Yehova giku Yesu. Ing’eye ke, icopo nwang’u kwo ma rondo ku rondo. Ku lapor, wadaru niponjo nia “Mungu en e mer.” (1 Yohana 4:16) Re, etie bende ku kite mange dupa ma beco. Biblia yero nia Yehova tie “won kisa ku bero, ng’atu ma bedo yo ni ng’ecwiny, man dit ku mer mi bero ku lemandha.” (Ai 34:6) Yehova tie “ber man ebedo ayika mi weko dubo.” (Zaburi 86:5) Etie bende ng’atu ma cirolembe man mandha. (2 Petro 3:9; 1 Jukorinto 1:9) Tek ibesomo pire i Biblia, ibiponjo ning’eyo lembe lee akeca iwi kite pare ma beco.

20-22. (a) Wacopo bedo ceng’ni ku Mungu nenedi ma ke kume nen ungo ee? (b) Icopo timo ang’o ka dhanu mange ubemaru nia iwek niponjo Biblia?

 ²⁰ Icopo bedo ceng’ni ku Mungu nenedi ma ke kume nen ungo ee? (Yohana 1:18; 4:24; 1 Timoteo 1:17) Kan ibesomo pi Yehova i Biblia, ibitundo ning’eyo nia etie ng’atu m’unuti andha. (Zaburi 27:4; Jurumi 1:20) Kan ibemediri niponjo lembe lee iwi Yehova, ibimediri bende nimare lee akeca, man ibinwang’u nia itie ceng’ni mandha kude.

²¹ Ibinyang’ nia Yehova tie Wegwa. (Matayo 6:9) Emio iwa kwo, man ebemito bende nia wabed ku kwo maber akeca. Eno tie tap lembe ma wego ma jamer copo nimito pir awiya pare. (Zaburi 36:9) Eyo, Biblia ponjo nia icopo doko jarimb Yehova. (Yakobo 2:23) Kenen in giri lembe nini: Yehova ma Jacwic mi ng’om ku polo ku piny mi igi zoo, ubemito nia ibed jarimbe!

²² Dhanu moko gicopo nimaru nia iwek niponjo Biblia. Saa moko gicopo lworo nia ibiloko dini peri. Ento kud iwek ng’atu moko acel de uceri nidoko jarimb Yehova. En kende re m’etie jarimo maber akeca m’ukadhu zoo m’icopo bedo ko.

23, 24. (a) Pirang’o ukwayu imediri nipenjo penji? (b) Wabiponjo ang’o i wic m’ulubo?

²³ M’umbe jiji, lembe moko tie m’ibinyang’ ungo i igi kinde m’ibeponjo Biblia. Lewic kud unegi nipenjo penji, kunoke nikwayu jukonyi. Yesu uyero nia wacikara nijwigara calu awiya ma thindho. (Matayo 18:2-4) Awiya gibed gipenjo penji lee. Mungu de ubemaru nia inwang’ dwokowang’ penji peri ma tung’ tung’. Pieno, ponj Biblia kilili pi ning’eyo ka nyo lembe m’ibeponjo tie lemandha.—Som Tic mi Jukwenda 17:11.

²⁴ Yo maber akeca ma copo konyowa ning’eyo lembe iwi Yehova tie niponjo Biblia. I wic m’ulubo, wabineno nia pirang’o Biblia ukoc ku buku mange ceke.