1, 2. Dhanu dupa gibed gipenjiri ku penji makani?

YAMU madit utuk, unyotho piny mi pacu moko. Janek moko ma kud atum ucaku nikilo dhanu swa i ot kanisa moko, e enyayu ret man enego dhanu dupa. Twoyo mi kanser unego mego moko, megone weko awiya abic.

² Ka peko ma kumeno uwok, dhanu dupa gipenjiri nia, “Pirang’o?” Dhanu dupa gibed gipenjiri nia pirang’o ng’om upong’ kumeni kud adegi man masendi ma tung’ tung’. Nyo idaru nipenjiri ku penji maeno nindo moko dee?

3, 4. (a) Jabila Habakuk upenjo Yehova ku penji makani? (b) Yehova udwoko wang’ penji pare nenedi?

³ Biblia uweco pi dhanu moko ma gibino ku yioyic ma tek i Mungu, re gin de gipenjo penji ma kumeno. Ku lapor, jabila Habakuk upenjo Yehova kumae: “Pirang’o iketho abeneno timo marac? Man pirang’o iweko nia jusend dhanu? Pirang’o nyoth ku rop ni i wang’a? Man pirang’o dhau ku lwiny upong’ kumeni?”—Habakuk 1:3, NWT.

⁴ I buku pa Habakuk 2:2, 3, Mungu udwoko wang’ penji pa Habakuk, man eng’olo nia ebidaru lembe mareco. Yehova umaru dhanu lee mandha. Biblia uyero kumae: “Ie bepido [niwacu, ebedieng’] piwu.” (1 Petro 5:7) I andha, Mungu udagu kan eneno dhanu gibesendiri, edagu nikadhu kite ma wadagu ko. (Isaya 55:8, 9) Dong’ wakewec iwi penji mae: Pirang’o masendi unyai lee rukeni i ng’om?

5. Judong dini mapol gibed giponjo lembang’o iwi masendi? Biblia ke uponjo lembang’o?

⁵ Judong dini ma tung’ tung’ gibed giponjo wang’ mapol nia ka dhanu gibesendiri, eno tie yeny pa Mungu. Jumoko m’ikindgi giponjo nia lembe ceke m’ubetimere ikum ng’atini, tie lembe ma Mungu ular upangu con, man nia wacopo nyang’ ungo nyanok de iwi thelembene. Jumange giponjo nia dhanu ceke, kadok awiya ma thindho, gibed githo kara ing’eye gicidh gikwo karacelo ku Mungu i polo. Ento, eno tie lemandha ngo. Yehova copo ketho ngo nyanok de nia lembe marac utimere. Biblia ponjo kumae: “Ebed bor ni Mungu, nia etim dubo, Man ni Jategokpo, nia etim kier [niwacu, lembe marac]!”—Yob 34:10.

6. Pirang’o dhanu dupa gibed giywak iwi Mungu nia en re m’ebenyayu masendi ceke mi ng’om?

⁶ Dhanu dupa giywak iwi Mungu nia en re m’ebenyayu masendi ceke mi ng’om, pilembe giparu nia Mungu re m’ubebimo wi ng’om. Ento calu ma waponjo i Wic mir 3, i andha, ng’atu m’ubebimo wi ng’om tie Sitani Wonabali.

7, 8. Pirang’o masendi unyai lee rukeni i ng’om?

⁷ Biblia uwacu iwa nia ‘ng’om ngung’ uvuto i ng’atu ma rac.’ (1 Yohana 5:19) Jabim mi ng’om maeni, niwacu Sitani, tie ng’atu ma cwinye rac man ma kisa mbe i ie. ‘Ebewondo ng’om ngung’.’ (Lembanyutha 12:9) Dhanu dupa gibelubo lapor pare. Eno tie thelembe acel m’uketho ng’om upong’ ku vupo, adegi man masendi ma junyayu mi tek ikum dhanu.

⁸ Thelembe mange de utie m’uketho masendi unyai lee i ng’om. Ing’ei jai ma Adam giku Eva gijai ko ni Mungu, awiya migi ugam ulagu dubo migi. Dubo ma gilagune uketho dhanu gibed ginyayu masendi ikum dhanu  wagi. Wang’ mapol dhanu gibed gimaru gibim wi jumange. Pieno, gidhau i kindgi, gikiedo lwiny, man ginyayu masendi ikum dhanu mange. (Eklizia 4:1; 8:9) Saa moko, dhanu gibed ginwang’u bende masendi kunoke peko pilembe “lembe ma wok rek” tundo i wigi. (Eklizia 9:11, NWT) Ka gibenwang’iri i kabedo ma cu ngo man i saa marac, ret ku lembe mange mareco copo nwang’ugi.

9. Pirang’o wacopo bedo m’umbe jiji nia Mungu tie ku thelembe moko maber m’uketho ebeweko masendi umedere?

⁹ Yehova copo nyayu ngo masendi kadok nyanok de. Wacikara ngo niywak i wie nia en re m’ebenyayu lwiny, turo cik, man masendi. Mungu ubenyayu ngo en peko, calu ve digidi, yamu ma tek, man pii ma pong’ man nyotho piny. Ento, icopo nipenjiri kumae: ‘Kan andha Yehova re ma tie Jategokpo, pirang’o ke ebecero ngo lembe maeno nitimere?’ Wang’eyo nia Mungu ubedieng’ piwa lee mandha, pieno wacopo yero nia etie ku thelembe moko kokoro maber akeca m’uketho ebeweko masendi umedere asu.—1 Yohana 4:8.

10. Sitani udoto Yehova nenedi?

¹⁰ I podho mir Eden, Wonabali uwondo Adamu giku Eva. Sitani udoto Mungu nia etie Jabim marac. Eloko nia Mungu ubino nitwono Adamu giku Eva ku gin moko maber. Sitani umito Adamu giku Eva giyii nia en re m’ecopo bedo jabim maber akeca nikadhu Yehova man nia gibino mbe ku yeny pa Mungu i kwo migi.—Thangambere 3:2-5; som Thenge ma jumedo, namba 27.

11. Pire tie tek nia wakenwang’ dwokowang’ penji makani?

¹¹ Adamu giku Eva gituro cik pa Mungu man gijai ire. Giparu nia gibino ku twero mi ng’io gin gigi gin maber ku gin marac. Pieno, penji tie kumae: Nwang’u Yehova  copo nyutho nenedi ngbeng’ nia paru mi jujai maeno ubino paru m’atira ngo, man nia en re m’eng’eyo gin ma tie cuu akeca piwa?

12, 13. (a) Pirang’o Yehova unyotho ngo jujai ndhu ndhu? (b) Pirang’o Yehova uweko Sitani ubed jabim mi ng’om man eweko dhanu gibim wigi gigi?

¹² Yehova ugam unyotho ngo Adamu giku Eva ndhu ndhu ing’ei jai migi. Ento, eweko nia ginyol awiya. Kumeno re ma Yehova umio kaka ni awiya p’Adamu giku Eva ning’io ng’atu ma gicopo mito ubed jabim migi. Lembakeca pa Yehova ubino nia ng’om upong’ ku dhanu m’umbe ku dubo, man lembakeca maeno ucikere nitimere kubang’e kubang’e kadok nwang’u Sitani upimo nicero lembakecane nitimere de.—Thangambere 1:28; Isaya 55:10, 11.

¹³ Saa ma Sitani ubedoto Yehova, jumalaika milioni dupa gibino nineno. (Yob 38:7; Daniel 7:10) Pieno, Yehova uweko kaka ni Sitani kara enyuth nyo adote pare ubino lemandha. Bende, eweko kaka ni dhanu gicak the bimobim migi gigi i the telowic pa Sitani, pi nineno ka nyo gibicopo romo m’umbe kony pa Mungu.

14. Wacopo yero ang’o pi bimobim pa dhanu ing’ei oro dupa?

¹⁴ Dhanu gipimo nitelo wigi gigi pi oro elufu ma lee, ento lembe uvoyogi. Lembe dupa unyutho nia Sitani tie javupo. Dhanu gitie ku yeny mi kony pa Mungu. Jabila Yeremia uyero lemandha kinde m’ewacu kumae: ‘E Yehova, ang’eyo nia yo mi dhanu en e i ie gire ngo; telo wi dagutielo pare mbe ba dhanu ma wotho.’—Yeremia 10:23.

15, 16. (a) Pirang’o Yehova uweko masendi umedere pi nindo ma lee rukeni? (b) Pirang’o Yehova ujigo ngo masendi ma Sitani unyayu?

¹⁵ Pirang’o Yehova uweko masendi umedere pi nindo  ma lee rukeni? Pirang’o ebecero ngo lembe mareco nitimere? Ugam ukwayu nindo ukeukadh lee kara jubin jung’ei nia lembe daru voyo bimobim pa Sitani andha. Dhanu giloko kwond bimobim ma tung’ tung’ ento lembe rombo ngo igi nyanok de. Kadok gitimo mediri i thenge mi ponjiri, man i rieko ku bodho mi yiko piny de, re turo cik, can, rop, man lwiny ubemedere asu nikadhu m’iwang’e. Wacopo romo ngo nitelo wiwa giwa maber m’umbe kony pa Mungu.

¹⁶ Re, Yehova ujigo ngo masendi ma Sitani unyayu. Ka nwang’u ejigo masendi maeno, nwang’u ubecinyutho nia ediko cinge ikum bimobim pa Sitani; Yehova ke copo diko ngo cinge kadok nyanok de ku Sitani. Bende, ka nwang’u etimo kumeno, nwang’u dhanu gicigeno nia gitie ku copo mi telo wigi gigi maber. Ento eno tie vupo, Yehova copo diko ngo cinge ikum lembe maeno, pilembe ecopo cwayu ndra ngo kadok nyanok de.—Juebrania 6:18.

17, 18. Yehova bitimo ang’o ikum nyoth ceke ma Sitani unyayu?

¹⁷ Nyo Yehova copo yiko nyoth ceke m’uwok nikum jai ma Sitani man dhanu gijai ko? Eyo. Lembe ceke copere ni Mungu. Yehova ung’eyo cuu nindo m’ebidwoko i ie wang’ adote ceke pa Sitani. Ing’eye, ebidwoko ng’om ni paradiso, calu m’elar ekeco. Dhanu ceke ma gini i “liel” gibicer. (Yohana 5:28, 29) Dhanu gibiremo kendo ngo man gibitho de ngo. Yesu bidaru nyoth ceke ma Sitani unyayu. Yehova bitio ku Yesu “kara enyoth tic pa Wonabali.” (1 Yohana 3:8) Watie ku foyofoc lee, pilembe Yehova unyutho cirocir pi nindo maeno ceke, kara wacopo tundo ning’eye man wacopo ng’io En re m’ebed Jabim mwa. (Som 2 Petro 3:9, 10.) Kadok kinde ma wabesendara, emio iwa kero mi ciro.—Yohana 4:23; som 1 Jukorinto 10:13.

 ¹⁸ Yehova ubediowa ngo adia nia wang’ii En re m’ebed Jabim mwa. Emio iwa bedagonya mi ng’iolembe giwa. Wakenen gin ma wacopo timo ku giramia maeno.

19. Yehova umio iwa giramia makani maber akeca? Pirang’o wacikara nidwoko ire foyofoc pi giramia maeno?

¹⁹ Yehova umio iwa bedagonya mi ng’io lembe wan giwa; eno tie giramia ma pire tek lee dit m’uketho wakoc ku lei. Timo mi lei zoo ucungo iwi kite ma jucwiokogi m’umbe rieko m’anzilo ma gicopo ning’io ko lembe, ento wan watie ku copo mi ng’io wan giwa kite ma wamito nikwo ko, man mi ng’io giwa ka nyo wabinyayu mutoro i Yehova kunoke ngo. Bende, watie ngo ve macin ma timo kende kende lembe ma juyike pire. Watie ku bedagonya mi ng’io kit dhanu ma wamito wabedi, jurimo ma wamito wabed ko, man kite ma wamito tio ko ku kwo mwa. Yehova ubemito nia wabed ku mutoro i kwo mwa.

20, 21. Ng’iong’ic makani maber akeca m’icopo nitimo kawoni?

²⁰ Yehova ubemito nia wamare. (Matayo 22:37, 38) Etie ve wego ma bedo ku mutoro kinde m’ewinjo nyathin pare ubeyero nia emare, ma ke jucung’e acung’a ngo nia eyer kumeno, ento ebeyero niai i adundene gire. Yehova umio iwa bedagonya mi ng’io wan giwa ka nyo wabitimo ire kunoke ngo. Sitani, Adamu, man Eva ging’io migi nijai ikum Yehova. In ke ibitio nenedi ku bedagonya mi ng’io lembe in giri?

²¹ Tii ku bedagonya peri mi ng’io lembe, pi nitimo ni Yehova. Dhanu mange milioni dupa bende gimaku yub mi timo lembe ma foyo i Yehova man mi kwero Sitani. (Lembrieko 27:11) Dong’ icopo timo ang’o kara in de ibin inweng’iri i ng’om manyen pa Mungu kinde m’ebedaru masendi ceke? Wic m’ulubo bidwoko wang’ penji maeno.