1, 2. (a) Kan ing’eyo kende kende nying’ ng’atu ma pire yik, nyo eno nyutho nia ing’eye cuu andha? Kekor. (b) Dhanu wacu nia Yesu tie ng’a?

I NG’OM, dhanu tie dupa ma pigi yik lee. Icopo ng’eyo nying’ ng’atu moko ma pire yik lee. Ento ng’eyo nyinge kende kende nyutho ngo nia ing’eye cuu. Eno nyutho ngo nia ing’eyo lembe moko ci mi kwo pare, kunoke ing’eyo nia etie ng’atu ma nenedi i andha.

² Saa moko nyo idaru niwinjo pi Yesu, kadok oro ma romo 2000 udaru kadhu niai m’ekwo i ng’om. Ento dhanu dupa ging’eyo ngo nia Yesu ubino ng’a. Dhanu moko wacu nia ebino ng’atu maber, ju mange wacu nia ebino jabila, dhanu mange ke giyiyo nia etie Mungu. In ke iparu nia etie ng’a?—Som Thenge ma jumedo, namba 12.

3. Pirang’o pire tie tek nia ing’ei Yehova Mungu giku Yesu Kristu?

³ Pire tie tek nia ing’ei lemandha iwi Yesu. Pirang’o? Biblia uwacu kumae: “E kwo ma rondo ku rondone e eni, nia [gitund ning’eyo] in m’i Mungu mandha i kendi, ku ng’atu m’ioro, ma Yesu Kristu.” (Yohana 17:3) Andha, kan ing’eyo lemandha iwi Yehova giku Yesu, icopo kwo rondo ku rondo i ng’om ma bidoko ni paradiso. (Yohana 14:6) Bende, ng’eyo lembe iwi Yesu bikonyi, pilembe en re m’enyutho iwa lapor maber akeca mi kwo ku dhanu mange.  (Yohana 13:34, 35) I wic mi 1, waponjo lemandha iwi Mungu. I wic maeni, wabiponjo lembe ma Biblia ponjo iwi Yesu.

4. Thelembe mi wec, “Masiya” man “Kristu” tie ang’o?

⁴ Oro dupa iwang’ nyoliri pa Yesu, Yehova ular ung’olo i Biblia nia ebioro Masiya, niwacu Kristu. “Masiya” tie wec m’uai kud i dhok mi Juebrania man “Kristu” tie wec m’uai kud i dhok mi Jugiriki. Thelembe mi nying’ mi dito ario maeno zoo tie nia, Mungu ung’iyo Masiya ma jung’olo pire, man emio ire dito ma segi. Masiya biketho lembang’ola ceke pa Mungu bitimere kakare kakare. Kadok tin eni bende Yesu copo nikonyi. Ento ma fodi Yesu unyolere ngo, dhanu dupa gibed gipenjiri nia ‘Ng’a dhe ma bibedo Masiya?’

5. Nyo julub pa Yesu gigam giyio nia etie Masiya?

⁵ Julub pa Yesu, gibino mbe ku jiji nia Yesu tie Masiya ma jung’olo pire. (Yohana 1:41) Ku lapor, Simon Petro uwacu ni Yesu kumae: “In i Kristu.” (Matayo 16:16) Wan ke wacopo ning’eyo nenedi nia andha Yesu tie Masiya?

6. Yehova ukonyo dhanu m’atira nenedi ning’iyo Masiya?

⁶ Con dit iwang’ nyoliri pa Yesu, jubila pa Mungu gilar gikiewo lembe dupa ma bikonyo dhanu ninwang’u Masiya. Lembe maeno ma gikiewo ukonyo nenedi? Kepar nia juyero icidh i parking ma dhanu upong’ lee i ie, nisayu ng’atu moko ma fodi ineno ngo. Ka ng’atu moko ukoro cuu pi ng’atu m’icidho nisayune, m’umbe jiji, iwok inwang’e. Rom rom kumeno, Yehova utio ku jubila pare pi ninyutho iwa lembe ma Masiya bitimo man lembe ma binwang’e.  Timiri mi lembila maeno ceke konyo dhanu m’atira ning’eyo nia Yesu tie Masiya.

7. Lembila ario makani m’unyutho nia Yesu tie Masiya?

⁷ Ikind lembila maeno, ario ni ee: mi kwong’o, oro 700 iwang’ nyoliri pa Yesu, jabila Mika uewo nia Masiya binyolere i adhura ma nok mi Bethlehem. (Mika 5:2) Yesu unyolere tap i adhura maeno! (Matayo 2:1, 3-9) Mir ario, jabila Daniel uewo nia Masiya biwok i oro 29 R.M. (Rundi Mwa). (Daniel 9:25) Eno tie lembila ario kende ikind lembila dupa m’unyutho kamaleng’ nia Yesu tie Masiya ma jular jung’olo pire.—Som Thenge ma jumedo, namba 13.

8, 9. Lembang’o m’utimere saa mi batizo pa Yesu m’unyutho nia etie Masiya?

⁸ Yehova unyutho kamaleng’ nia Yesu tie Masiya. Mungu ung’olo nia ebimio lanyuth moko ni Yohana ma jamii batizo kara ewok eng’ii Masiya. Kinde ma Yesu ucidho ibang’ Yohana pi nilimo batizo i kulo mi Yordan i oro 29 R.M., Yohana ugam uneno lanyuth maeno. Biblia ukoro lembe m’utimere: “E Yesu de, kan emaku [batizo], eai malu tho kud i pi: nen, polo yabre ire, man eneno tipo Mungu beloro calu akuru, ebino de iwie; man nen, dwal uai i polo, uwacu kumae, Meni Woda ma jamerna, ma mutoro nega i kume.” (Matayo 3:16, 17) Kinde ma Yohana uneno man ewinjo lanyuth maeno, enyang’ ndhu nia Yesu tie Masiya. (Yohana 1:32-34) Cing’ nica, saa ma Yehova  ukonjo tipo pare iwi Yesu, e edoko Masiya. Edoko ni ng’atu ma Mungu ung’iyo nibedo Jatelwic man Rwoth.—Isaya 55:4.

⁹ Lembila mi Biblia, wec ma Yehova uyero en gire, man lanyuth m’emio ceng’ mi batizo pa Yesu ubenyutho nia Yesu tie Masiya. Ento, Yesu uai kani, man ebino ng’atu ma nenedi? Wakenen lembe ma Biblia uyero.

10. Biblia ponjo nia Yesu ular ukwo kani iwang’ nibino i ng’om?

¹⁰ Biblia ponjo nia Yesu ular ukwo i polo oro dupa iwang’ nibino i ng’om. Jabila Mika uwacu nia bedo nuti pa Masiya “ugambre con.” (Mika 5:2) Yesu en gire de ebed ewacu wang’ mapol nia elar ekwo i polo iwang’ ninyolere ni dhanu. (Som Yohana 3:13; 6:38, 62; 17:4, 5.) Kadok iwang’ nibino i ng’om, kind Yesu giku Yehova ubino ceng’ni mandha.

11. Pirang’o Yesu tie ng’atu ma pire tek lee i Yehova?

¹¹ Yesu tie ng’atu ma pire tek lee i Yehova. Pirang’o? Pilembe Mungu ular ucwie iwang’ nicwio dhanu ku gin mange ceke. Pieno, julwong’o Yesu “Kayu mi giracwia ceke.” * (Jukolosai 1:15) Bende, Yesu tie ng’atu ma pire tek lee i Yehova pilembe en kende re ma Yehova ucwie gire m’umbe kony pa ng’atu mange. Pieno re ma julwong’e ‘Wod ma kulong’.’ (Yohana 3:16) Yesu kende re ma tie ng’atu ma Yehova utio kude pi nicwio gin mange ceke. (Jukolosai 1:16) Man Yesu kende re ma julwong’e “Lembe,” pilembe Yehova utio kude pi nitero lembe man telowic pare ni jumalaika man ni dhanu.—Yohana 1:14.

12. Wang’eyo nenedi nia Yesu giku Mungu gitie ngo ng’atu acel?

¹² Dhanu moko giyio nia Yesu giku Mungu gitie ng’atu acel. Re Biblia ubeponjo ngo kumeno. Biblia ubeponjo nia jucwio Yesu acwia, lembe maeno nyutho nia Yesu ubino kud acaki. Ento Yehova, ma en e Jacwic mi piny ceke, embe kud acaki. (Zaburi 90:2)  Calu ma Yesu utie Wod Mungu, epimo ngo kadi nyanok de nibedo rom ku Mungu. Biblia uponjo kamaleng’ nia Wego usagu Wod. (Som Yohana 14:28; 1 Jukorinto 11:3.) Yehova kende re ma tie “Mungu ma Jategokpo.” (Thangambere 17:1) Etie ng’atu ma kero pare dit akeca nisagu zoo i polo ku ng’om ceke.—Som Thenge ma jumedo, namba 14.

13. Pirang’o Biblia ulwong’o Yesu “ayi Mungu ma nen ungo”?

¹³ Yehova giku Wode ma Yesu, gitimo tic karacelo pi oro milioni dupa ma nwang’u fodi polo ku ng’om de mbe. Gigam gibedo ku mer lee mandha ikindgi! (Yohana 3:35; 14:31) Yesu ulubo kite [niwacu, kurayung] pa Mungu tap tap, pieno Biblia ulwong’e “ayi Mungu ma nen ungo.”—Jukolosai 1:15.

14. Wod Yehova m’emaru akeca unyolere ni dhanu nenedi?

¹⁴ Wod Yehova m’emaru akeca ubino ayika niweko polo kara ebin enyolere ni dhanu i ng’om. Lembe maeno utimere nenedi? Yehova utimo udu, eting’o kwo pa Wode maeno kud i polo man eroye i usau-nyodo pa nyaku moko ma sumba ma nyinge Maria. Kumeno re ma won Yesu ubino ngo wego ma dhanu. Pieno, Maria unyolo nyathin ma nico m’umbe ku dubo, man ecaku nyinge Yesu.—Luka 1:30-35.

15. Icopo tundo ning’eyo Yehova cuu nenedi?

¹⁵ Kan isomo buku pa Matayo, Marko, Luka, man Yohana, ibing’eyo lembe lee iwi Yesu, iwi kwo pare man iwi kite pare ma tung’ tung’. Buku maeno julwong’ogi Injili. Yesu tie tap ve Won; pieno, lembe m’isomo i wie bikonyi bende nitundo ning’eyo Yehova cuu mandha. Lembe maeno uketho Yesu  uwacu kumae: “ng’atu m’uneno an nwang’u eneno Wego [bende].”—Yohana 14:9.

16. Yesu ubed uponjo lembang’o? Ebed eponjo lembe pa ng’a?

¹⁶ Con, dhanu dupa gibed gilwong’o Yesu nia “Japonji.” (Yohana 1:38; 13:13) Lembe acel ma pire tek ikind lembe m’ebed eponjo ubino “Lembanyong’a mi Ker.” Kerne tie ang’o? Ker maeno tie bimobim pa Mungu ma bibimo wi ng’om ngung’ niai kud i polo, man ebimio mugisa dupa ni dhanu ma woro Mungu. (Matayo 4:23) Lembe ceke ma Yesu uponjo uai ibang’ Yehova. Yesu uwacu kumae: “Ponji para en e para ngo, endre pa ng’atu m’uora.” (Yohana 7:16) Yesu ung’eyo nia Yehova umito dhanu giwinj lembanyong’a ma nia Ker pa Mungu bibimo wi ng’om.

17. Yesu ubed uponjo kakani? Pirang’o Yesu umiere lee akeca pi niponjo dhanu mange?

¹⁷ Yesu ubed uponjo kakani? Ebed eponjo kakare ceke ma dhanu copo nwang’iri i ie. Ebed eponjo i kiaru, i adhura, ikind pacu, i soko, i ka cokiri, man i udi mi dhanu. Ebed ekuro ngo nia dhanu gibin ibang’e. Wang’ mapol en re m’ebed ecidho ibang’gi. (Marko 6:56; Luka 19:5, 6) Yesu utimo tic maeno kud amora, ebed etimo saa ku kero lee pi niponjo dhanu. Pirang’o? Pilembe eng’eyo nia Mungu uyenyo etim kumeca man pilembe saa ceke ebedo wor ni Won. (Yohana 8:28, 29) Ebed erweyo bende pilembe kisa ubed unege ikum dhanu. (Som Matayo 9:35, 36.) Eneno nia judongo mi dini gibeponjo ngo lemandha iwi Mungu man iwi Ker pare. Pieno, emito nia ekony dhanu dupa giwinj lembanyong’a.

18. Yesu ubino ku kite makani ma tung’ tung’ m’imaru lee?

¹⁸ Yesu umaru dhanu man ebed edieng’ pigi. Ebino  jabero man ng’atu ma juweco ibang’e yot yot. Kadok awiya de umaru nibedo ing’ete. (Marko 10:13-16) Saa ceke, Yesu bedo mbe kud akoyakoya. Edagu lembe marac. (Matayo 21:12, 13) Ekwo i saa ma dhanu ma mon ubedo mbe ku twero akeca man ma jubed junenogi ni dhanu ma tijgi mbe. Ento Yesu ubed utio ku mon saa ceke ku woro. (Yohana 4:9, 27) Yesu ubino bende ng’atu ma jwigere lee. Ku lapor, elwoko tiend julub pare uthieno moko, ma ke nwang’u tic maeno ubino tic pa ng’eca.—Yohana 13:2-5, 12-17.

19. Lapor makani m’unyutho nia Yesu ubed ung’eyo yeny mandha mi dhanu man ebed emaru nikonyogi?

¹⁹ Yesu ubed ung’eyo yeny mandha mi dhanu man ebed emaru nikonyogi. Lembuno unen kamaleng’ kinde m’etio ku tego pa Mungu pi nikeyo kum dhanu i ayi mir udu. (Matayo 14:14) Ku lapor, won joi [niwacu, won dhobu] moko ubino ibang’e man ewacu ire kumae: “Tek iyenyo, icopo dwoka leng’.” Kisa remokum man masendi pa ng’atu maeno unego Yesu, man ucwale nikonye. Pieno Yesu urieyo cinge, emulo kum ng’atuno, man eyero ire kumae: “Ayenyo; kumi dok leng’.” E kum ng’atuno ugam ukei! (Marko 1:40-42) Iparu nia ng’atu maeno uwinjere nenedi saa maeca?

20, 21. Yesu weko iwa lapor makani maber mi woro Mungu?

²⁰ Yesu uweko iwa lapor maber akeca mi woro Mungu. Kadok enwang’u peko ma rukani ngi, kunoke judhoge gisende de, egwoko bedoleng’ pare ni Won. Ku lapor, Yesu udubo ngo kinde ma Sitani upimo nibidhe. (Matayo 4:1-11) Dhanu moko m’ikind wat pare ma dhe de giyiyo ngo nia etie Masiya man  giwacu nia “abelu make,” ento Yesu umedere nitimo tic pa Mungu. (Marko 3:21) Kinde ma judhoge gibino nisende, Yesu umedere nigwoko bedoleng’ pare ni Mungu man edwoko ngo nyanok de wang’ racu ma jutimo ire.—1 Petro 2:21-23.

²¹ Kadok i saa ma Yesu udhingo nitho tho mi tek man ma ku litho ma lee, emedere asu nigwoko bedoleng’ pare. (Som Jufilipi 2:8.) Kepar pi peko m’eciro ceng’ mi tho pare. Jutwiye, jumulembe mi ndra udote nia eyero lembacidi, jupoklembe m’atira ngo ung’olo lembe i wie, udul dhanu gicaye, juaskari gifode man gigure iwi yen mi can. Kinde m’ebetho, ekok kumae: “Ethum! [niwacu, etimere!]”  (Yohana 19:30) Nindo adek ing’ei tho pare, Yehova ucere man emio ire kum mi tipo. (1 Petro 3:18) Ing’ei yenga moko, Yesu udok i polo, e “ejany yo ku cing’ Mungu ma yor acwic,” m’ebino nikuro ko cil ma Mungu ukethe ni Rwoth.—Juebrania 10:12, 13.

22. Bedoleng’ ma Yesu unyutho ni Won umio iwa genogen makani?

²² Bedoleng’ ma Yesu medere ninyutho ni Won, umio iwa tin genogen mi nwang’u kwo ma rondo ku rondo i ng’om ma bidoko ni paradiso, calu ma Yehova ung’olo. I wic m’ulubo, wabiponjo kite ma tho pa Yesu umio ko iwa genogen mi nwang’u kwo ma rondo ku rondo.