Yehova uyiko podho moko ma ber i kabedo ma julwong’o Eden. Podhone bino ku thiwe, yen man lei dupa i ie. Mungu ugam ucwio Adamu ma tie nico ma kwong’a kud utur mi ng’om man ekudho lietho i ume. Nyo, ing’eyo lembe m’ugam utimere? E nicone udoko kwo! Yehova uwacu nia Adamu ugwok podho mir Eden, man ecak nying’ lei.

Yehova umio cik moko ma pire tek lee ni Adamu. Eyero ire kumae: ‘Icopo camu nying’ yen mange ceke, ento kud icam kum nying’ yen acel kende. Pilembe tek icame ibitho.’

I ng’eye Yehova uwacu kumae: ‘Abitimo jakony ni Adamu.’ E eketho nindo ma pek umaku Adamu, man ewodho wel ng’ete acel ecwio ko dhaku ni Adamu. Nying’ dhakune bino Eva. Adamu giku Eva re ma gibino juruot ma kwong’a. Adamu uyero ang’o saa ma Mungu umio ire dhaku? Anyong’a nege lee  mandha, man eyero kumae: ‘Kenen ng’atu ma Mungu ucwio ku wel ng’eta e! E ve an.’

Yehova uyero nia Adamu giku Eva ginyol awiya man gipong’ ng’om. Emito nia gitim tic karacelo pi niketho ng’om zoo udok ni paradiso, niwacu kabedo ma leng’ mandha calu podho mir Eden. Re lembe ugam uwotho ngo ve ma Mungu umito. Pirang’o? Ponji m’ulubo binyutho iwa.