Ubimo mange mi Babeli ubino Dario ma Jamedi. Dario unwang’u nia Daniel ubino ku rieko m’usagu mi jumange. Egam edodo Daniel iwi dhanu ma pigi tek mi ng’om pare. Dhanu maeno gibino ku kumira i kum Daniel man gimito ginege cen. Ging’eyo nia Daniel berwo i bang’ Yehova wang’ adek kubang’ ceng’, uketho giyero ni Dario kumae: ‘E ubimo, ukwayu cik moko ubed nuti kara dhanu ceke urwo i beng’i kende. Ng’atu ma tek bituro cikne ke, jucikiri nibole i vur m’umvor upong’ i ie.’ Dario uyio paru maeno man eketho cinge i the cikne.

Kinde ma Daniel uwinjo pi cik ma nyen ma juwodho, edok ndhu i ot pare. Yor i wang’ madiriza ma tie thwolo, erumo conge man erwo i bang’ Yehova. Jukumira maeno gitundo yo pa Daniel man girube eberwo. E gikonjo ng’wec i bang’ Dario man giwok giyero ire kumae: ‘Daniel ubewori ngo. Erwo i bang’ Mungu pare wang’ adek kubang’ ceng’.’ Dario umaru Daniel man emito ngo nia etho. Dieceng’ duu esayu ayi moko ci m’eromo bodho ko Daniel. Ento kadok en ubimo en gire de, ecopo loko ngo cik ma dong’ edaru ketho cinge i there. Ukwayu ndhu eng’ol ni dhanu pare nia gibol Daniel i vur m’utie kud umvor ma kwiny i ie.

 I diewor nica, cwiny Dario upido traka pi Daniel uketho nindo lal i wang’e. Urwone pir kugweno, eringo i dhu odumvor man ekok i bang’ Daniel kumae: ‘Mungu peri ubodhi?’

Dario uwinjo dwal moko. Ubino dwand Daniel! Ekok ni Dario kumae: ‘Yehova uoro malaika pare umio dhug umvor. Gitimo ngo gin moko i kuma nyanok de.’ Anyong’a nego Dario lee dit! Eng’olo nia juwodh Daniel woko kud i odumvor. Piny moko mbe acel de m’ugwaru kum Daniel. I ng’eye, ubimo ung’olo kumae: ‘Wubol dhanu ma gidoto Daniel i odumvor.’ Kinde ma jubolo dhanu maeno i odumvor, umvor uramugi wang’ acel.

Dario ugam ung’olo ni dhanu pare kumae: ‘Dhanu ceke gicikiri niworo Mungu pa Daniel. Kum ebodho Daniel kud i dhug umvor.’

Nyo in de ibed irwo i bang’ Yehova kubang’ ceng’ tap calu Daniel?