I rundi pa Ezra, Jaisrael moko ubino nuti ma nyinge Nehemia m’ubino jatic p’ubimo Artacacta. Ebed ekwo i ng’om mi Perse i adhura mi Cucan. Umin Nehemia moko ugam uai i Yuda man utundo ku kwenda ma rac, eyero kumae: ‘Dhanu ma gidok i Yerusalem gitie i ariti. Gang’kidi man dhugang’ mir adhura ma dhanu mi Babeli unyotho, fodi jugierogi ngo kendo.’ Can umondo i Nehemia, uketho emito ecidh i Yerusalem pi nikonyo tic. Pieno, egam erwo kara ubimo romo yiyo ecidhi.

I ng’eye ubimo uneno Nehemia ubedo ku can. Ewacu ire kumae: ‘Fodi nwang’u aneni ngo m’itie ku can kumeni. Lembang’o ma rac?’ Nehemia udwoko ire kumae: ‘Aromo bedo ku can ungo ke m’adhura mwa mi Yerusalem udong’ ni uvuru?’ E ubimo penje kumae: ‘Ibemito atim iri ang’o?’ Ndhundhu nica, Nehemia ugam urwo yor i ie. E edwoko kumae: ‘Timba wek acidhi agier kendo gang’kidi mi Yerusalem.’ Ubimo Artacacta uyero ni Nehemia nia ecopo cidho, man emaku yub kara jugwok Nehemia i woth pare ma bor maeno. Egam eketho Nehemia ni jabim mi Yuda man emio ire bende bau mi guro dhugang’.

Kinde ma Nehemia utundo i Yerusalem, eliewo gang’kidi mir adhurane. I ng’eye, ecoko julam ku jubim karacelo man ewacu igi kumae: ‘Eni tie lembe ma rac dit; mito waceku tic.’ E dhanu ceke ucwaku parune man gicaku tic mi giero kendo gang’kidi.

Ento jumoko m’i kind judegi mi nyithindho mir Israel gicaku nywarugi kumae: ‘Kaki kunoke nzer de copo rwombo gang’kidi m’ubegiero no.’ Jurugiedo gikwanu ngo ku wec maeno mir anywar, ento gimediri ku tic i wang’gi. Gang’kidi uidho malu man ebino ma tek.

Judegine gipangu nia gibiai kud i ng’ete ma tung’ tung’ kara giloi ku lwiny mbwang’ iwi Yerusalem. Kinde ma Juyahudi giwinjo pi gamba ma jubecamu i kumgi, lworo makugi ma rac. Ento Nehemia uwacu igi kumae: ‘Lworo kud unegwu. Yehova ni kudwa.’ Egam eketho jukur pi nigwoko jutic, e judegi migi ubino mbe ku copo mi kelo lwiny i wigi.

 Pi nindo 52 kende ci, gang’kidi ku dhugang’ne ugam uthum. Nehemia ulwong’o Julawi ceke gibin i Yerusalem pi nithiero gang’kidine ni Yehova. Ekethogi i ungu ario ma tung’ tung’ mi juruwer. Gigam giidho gang’kidi ku wi mangasi mi dhugang’ ma ni kum pii ma dhenyini man giwotho pi nidhoko adhura; jumoko ucidho yor i ng’ete acel, jumange ke yor i ng’etene ma kucelo. Gikudho agwara, gigoyo vul kud adungu man giwer ni Yehova. Ezra uwotho kud ungu acel man Nehemia ke uwotho kud ungu ma kucelo nitundo gicidh girombo i hekalu. Dhanu ceke, niwacu jumaco, jumamon man awiya githiero lam ni Yehova man gitimo foc. Mutoro ma gibino ko uketho giwer man dwandgi uwinjere bor.