Yehova ugam ung’io Yeremia kara ebed jabila ni dhanu mi Yuda. Eng’olo ire nia erwei ni dhanu man utwong’gi nia kwayu giwek lembe ma reco ma gibetimo. Yeremia udwoko ire kumae: ‘A Yehova, an a nyathin. Ang’eyo ngo kite m’aromo weco ko ku dhanu.’ Yehova ugam yero ire kumae: ‘Lworo kud unegi. Abinyutho iri lembe m’ibiyero. Abikonyi.’

Yehova uyero ni Yeremia nia ecok judongo mi dhanu, erung agulu mir ulobo i wang’gi man ewac kumae: ‘Jubirungo Yerusalem de kumeni.’ Kinde ma Yeremia utimo lembe ma Yehova uyero, kwinyo ugam uopo i judongo. Jalam ma nyinge Pacur ugoyo Yeremia man eroyo tiende ku cinge i bau mi twiyo dhanu. Diewor traka, Yeremia romo yiko kume ngo nyanok de. Urwonde kugweno Pacur ugonye. Yeremia uyero nia, ‘abiromo ngo. Abejigo magwei nirweyo.’ Ento nyo andha cwinye utur? Ungo. Kinde ma Yeremia uparu pi lembene kendo, egam ewacu kumae: ‘Lembe pa Yehova ubedo calu mac yor i ia. Acopo weko ki ngo nirweyo.’ Yeremia umedere asu nitwong’o dhanu.

I ng’ei oro moko, ubimo ma nyen ucaku bimo i Yuda. Julam man jubila mi ndra gigam gidagu lembkwenda ma Yeremia ubino twong’o. Giyero kumae ni judongomawijo: ‘Ng’atuni romo ku tho.’ Yeremia udwoko igi kumae: ‘Tek wunega, nwang’u wunego ng’atu m’ukoso ngo. Kum ayero lembe pa Yehova ento para gira ngo’. Kinde ma judongomawijo giwinjo lembuni giyero kumae: ‘Ng’atuni romo ngo ku tho.’

Yeremia umedere asu nirweyo, e kwinyo uopo ma rac i  judongomawijo. Uketho gikwayu nia ubimo uneg Yeremia cen. Ubimo wacu igi nia giromo timo gin moko ci ma gimaru i kum Yeremia. E gimaku Yeremia man gibole i vur ma thuc m’usabu ni ie man gigeno nia nyo eromo tho kuca. Yeremia ucaku mwony i usabu.

Jatic moko ma nyinge Ebed-melek ma timo i kal uyero ni ubimo kumae: ‘Judongomawijo gibolo Yeremia i vur! Ka waweke keca ci, ebitho.’ Ubimo ugam ung’olo ni Ebed-melek nia eting’ jumaco 30 ecidh kugi man gicidh giwodh Yeremia kud i vur. Wan de wacikara nibedo calu Yeremia m’uweko ngo gin moko ci ucere ku rweyo; kumeno ngo nia?