I ng’ei oro moko, Belcazar udoko ubimo mi Babeli. E i diewor acel, ubimo ugam ulwong’o dhanu elufu acel ma pigi tek mi ng’om pare i agba, niwacu i nambu. Eng’olo ni jutic pare nia gikel agulu mi mola ma kwar ma Nebukadnezar ucoko kud i hekalu pa Yehova. E Belcazar karacelo ku ju m’elwong’o gimadhu pigulok kud i agulu man gipaku mungu m’araga migi. Mbwang’ kumeni ci, cing’ dhanu uwok man ucaku goro wec moko mi zungo i kor ot ma gicamu i ie.

Cwiny Belcazar ung’abere ma rac. E egam elwong’o jururieko pare ceke man eng’olo igi kumae: ‘Ng’atu ma tek bituco the wec maeni, abikethe ni ng’atu mir adek ma pire tek i ker mi Babeli.’ Gipimo kpe, ento ng’atu moko acel de mbe m’i kindgi ma romo tuco thelembene. I ng’eye, min ubimo ubino man ewacu ire kumae: ‘Ng’atu moko nuti ma nyinge Daniel m’ubed utuco thelembe ni Nebukadnezar. Ecopo tuco the wec maeni iri.’

Daniel ugam ubino i bang’ ubimo. Belcazar uwacu ire kumae: ‘Tekene isomo man ituco the wec maeni, abimio iri gwang’ mi mola ma kwar man abikethi ni ng’atu mir adege ma pire tek i ker mi Babeli.’ Daniel udwoko ire kumae: ‘Ambe ku yeny mi giramia peri, ento abituco iri thelembe mi wec maeni. Nebukadnezar ma wuru uting’ere, ento Yehova ujwige. Ing’eyo ma ber gin ceke m’ugam uwok i kume, ento in de ijai niworo Yehova man imadhu pigulok kud i agulu mi mola ma kwar mir hekalu pare, uketho Mungu ugoro wec ma e: Mene, Mene, Tekel, Ufarsin. Thelembene utie nia Jumedi ku Juperse gibivoyo Babeli man ibibedo ubimo kendo ngo.’

Ugam unen ve nia ng’atu moko mbe ma romo voyo Babeli i lwiny. Gang’kidi ma dhoge lee man pii ma thuc utwodo adhurane tingili. Ento i diewor nica,  Jumedi ku Juperse gimaku adhurane. Kuro m’ubimo mi Perse uloko pii kara juaskari pare gicopo idho nitundo i dhugola gang’ mir adhura. Kinde ma gitundo, ginwang’u dhugola gang’ ubedo ayaba! Juaskari gimaku adhurane, givoye ku lwiny man ginego ubimo. E Kuro ugam udoko ni jabim mi Babeli.

I kind oro acel, Kuro ugam utwong’o kumae: ‘Yehova uwacu ira nia adog agom hekalu pare kendo i Yerusalem. Ng’atu moko ci m’i kind dhanu pare m’umaru nikonyo, etie agonya nicidho.’ Pieno tap calu ma Yehova ular ung’olo, Juyahudi dupa gidok i Yerusalem i ng’ei oro 70 niai ma jugam junyothe. Kuro uoro mola ma kwar kud agulu mi mola ma tar man ajeni ma Nebukadnezar ugam ucoko kud i hekalu. Nyo ineno kite ma Yehova ugam utio ko ku Kuro pi nikonyo dhanu pare?