Diewor moko, ubimo Nebukadnezar ugam uleko lek mi zungo. Lekne ung’abu cwinye lee dit ma dong’ eromo nindo de ngo. Elwong’o ajoga pare ceke man eyero igi kumae: ‘Wutuc ira the lek para.’ Gidwoko ire kumae: ‘Yer iwa lek peri, e ubimo.’ Ento Nebukadnezar uyero igi kumae: ‘Ungo! Wun re m’uyer ira gin m’aleko. Kan ungo, abinegowu.’ Giwacu ni ubimo kendo kumae: ‘Yer iwa gin m’ileko, e wabikoro there iri.’ Ubimo udwoko igi kumae: ‘Wun zoo wuyenyo wuwonda awonda. Wuyer ira kende gin m’aleko!’ Giwacu ni ubimo kumae: ‘Ng’atu moko mbe iwi ng’om ma romo timo lembuno. Ibekwayu lembe ma copere ngo.’

Ng’ecwiny umaku Nebukadnezar uketho eng’olo nia juneg jururieko ceke kud i ng’om pare. Daniel, Cadrak, Mecak man Abed-nego bende gibino i kind jururiekone. Daniel ukwayu ubimo kekur nyanok. I ng’eye en karacelo ku jurimbe girwo i bang’ Yehova man gikwaye kara ekonygi. Yehova ugam utimo ang’o?

I ginmawokiwang’, Yehova ugam unyutho lek pa Nebukadnezar ni Daniel man thelembene de. Urwonde, Daniel ucidho i bang’ jatic p’ubimo man ewacu ire kumae: ‘Kud ineg ng’atu moko acel de kud i kind jururieko. Acopo koro the lek p’ubimo.’ E jatic p’ubimo utero Daniel i bang’ Nebukadnezar. Daniel uwok uyero ni ubimo kumae: ‘Mungu unyutho iri gin ma bitimere i nindo m’ubino. Lek peri ni e: Ineno ayi gin m’acwia ma dit ma wiye tie mi mola ma kwar, kore ku bote tie mi mola ma tar, iye ku bambe tie mi mola, funde tie mi nyunyu (cuma), tiende tie mi nyunyu m’ujebere kud ulobo. I ng’eye, kidi utong’ere kud i got man ugoyo tiend ayi gin m’acwiane. Ayi gin m’acwiane urungere udoko ni utur  man eduny i yamu. Kidine udoko ni got ma dit man eromo ng’om zoo.’

I ng’eye, Daniel udok uyero kumae: ‘Thelembe mi lek peri ni e: Wiye mi mola ma kwar en e ker peri. Mola ma tar ke utie ker ma biwok yor i ng’eyi. Ker mange biwok m’ebibedo mi mola man ebibimo wi ng’om ceke. Ker m’ulubo bibedo tek calu nyunyu. Ma tokcen ne, bibedo ker m’upokere ma ng’ete moko tek calu nyunyu, ng’ete ma kucelo ke ng’ic calu ulobo. Kidi m’udoko ni got utie Ker pa Mungu. Ebirungo ker maeni ceke man ebicungo pi nja.’

Nebukadnezar upodho arieba wang’e i wang’ Daniel. Ewacu kumae: ‘Mungu peri unyutho lek maeni iri. Mungu moko mbe ma calu en.’ Pieno, kakare ninego Daniel, Nebukadnezar ukethe ni jadit iwi jururieko ceke man ni jabim i Babeli. Nyo ineno kite ma Yehova udwoko ko wang’ rwo pa Daniel?