Yo nyangu mi ng’om Israel, dhanu moko bino nuti ma giyio nia cero kunoke nyikaluku romo telo wigi. E i diewor acel, dhanu moko ma yo nyangu gineno piny moko m’ubedo ve cero uberieny i kor polo, man gilubo toke. “Cero” maeno utelo wigi nitundo i Yerusalem. E gicaku penjo dhanu kumae: ‘Nyathin ma bibedo ubimo mi Juyahudi ni kani? Wabino kara warwo ire.’

Kinde ma Herode m’ubimo mi Yerusalem uwinjo pir ubimo ma nyen, cwinye dieng’ dit. Epenjo julam ma dongo kumae: ‘Ubimo maeni ucikere ninyolere kani?’ Gidwoko ire kumae: ‘Jubila giyero nia ebinyolere i Bethlehem.’ E Herode ulwong’o dhanu maeno m’uai yo nyangu man eyero igi kumae: ‘Wucidhi i Bethlehem man wunwang’ kaka ma nyathin ne ni ie. I ng’eye, wudwogi man wunyuth ira kaka ma eni i ie. An bende abemito acidh awore.’ Ento eno ubino ndra.

E “cero” ugam ucaku woth kendo. Dhanune gilubo toke nitundo i Bethlehem. “Cero” ubin ucungo tap atira ku wi ot man dhanu maeno gigam gimondo i ot. Ginwang’u Yesu karacelo ku min ma Maria. Girum pi nirwo ni nyathin ne man gimio ire giramia mi mola ma kwar, kud udok ma ng’wice ng’ar man moo de ma ng’wice ng’ar. Nyo andha Yehova re m’uoro dhanu maeno gicidh ginwang’ Yesu? Ungo.

Uthieno nica, Yehova uyero ni Yosefu ku wang’ lek kumae: ‘Herode ubemito eneg Yesu. Ting’ dhaku peri giku wodi man wuringi i Misiri. Wubed kuca nitundo abiyero nia wudwogi.’ E ndhundhu nica, Yosefu ku juot pare giringo i Misiri.

Yehova ugam uyero ni dhanu maeno ma giai yo nyangu nia kud gidok yor i bang’ Herode. Kinde ma Herode unyang’ nia gibedwogo ngo, ng’ecwiny umake lee dit. Calu m’eromo nwang’u ngo Yesu, eng’olo nia juneg awiya ceke ma oro migi tie rom ku pa Yesu kud i Bethlehem. Ento Yesu ubedo pare ma ber, bor i Misiri.

 I ng’eye, Herode ugam utho. Yehova uyero ni Yosefu kumae: ‘Kawoni dong’ wucopo dok.’ Yosefu, Maria man Yesu gigam gidok i Israel, e gigiero ot migi i adhura mi Nazareti.