Yosefu giku Maria gibed gikwo i Nazareti karacelo ku Yesu man awiya pagi mange ma co ku ma nyir. Yosefu ubed utimo tic mi gobo bau pi nigwoko juruot pare man ebed eponjo igi lembe iwi Yehova man iwi Cik pare. Juruot maeno gibed gicidho nja i sinagog man kubang’ oro ke i Yerusalem pi nitimo Kadhukuwijo.

Kinde ma Yesu udoko ku oro 12, juruot pagi gigam giwotho woth ma bor pi nicidho i Yerusalem calu ma naka. Dhanu m’ubino pi nitimo foc mi Kadhukuwijo gipong’o adhura bik. I ng’ei foc, Yosefu giku Maria gigam gicoko woth pi nidok i pacu man gibino paru nia Yesu de utie i kind udul dhanu ma gibewotho kugi. Ento kinde ma gicaku saye i kind wedi migi, ginwang’e ngo.

Gigam giloko kendo i Yerusalem, man pi bang’ adek zoo gisayu wodgi kpe. I ng’eye, gigam gicidho i hekalu. Giwok ginwang’u Yesu ubedo i kind juponji, ebewinjogi cuu man ebepenjogi ku penji ma beco. Juponji uzungo Yesu lee dit, uketho gicaku penje  ku penji dupa. Igi wang’ lii i kum dwoko wec pare. E ginwang’u nia enyang’ i Cik pa Yehova.

Cwiny Yosefu giku Maria ubino pido lee mandha. E Maria uwacu ni Yesu kumae: ‘Woda, wadaru seyi kpe! Ibino kani re?’ Yesu udwoko kumae: ‘Wung’eyo ngo nia acikara nibedo keni i ot pa Vwa?’

E Yesu gigam gidok ku junyodo pare i Nazareti. Yosefu uponjo Yesu ku tic mi gobo bau. Iparu nia Yesu ubino dhanu ma nenedi saa m’ebino aradu? Kinde ma Yesu ubedongo, rieko pare uwotho medere man enwang’u bero i wang’ Mungu man i wang’ dhanu bende.