Yohana ma tie wod Zekaria gikud Elisabeti udoko jabila kinde m’ebedongo. Yehova utio ku Yohana pi ninyutho ni dhanu nia Masiya ubebino. Ento kakare niponjo i sinagog kunoke i adhura, Yohana ubed urweyo i yamba. Dhanu ubed uai i Yerusalem man i Yahudi ceke pi nibino winjo lembe ma Yohana ubeponjo. Eponjogi nia kara ginyai mutoro i Mungu, gicikiri niweko timo ma reco. I ng’ei winjo lembe ma Yohana uponjo, dhanu ma dupa uyewo dubo migi man emio igi batizo i kulo mi Yordan.

Yohana ubed ukwo m’umbe piny mi kum dupa. Ebed ekendo bongu ma juyiko ku yuk ngamia man ebed ecamu bonyo man ebed enang’u miyo kic. Dhanu ubino mito dit nia ging’ei Yohana. Kadok Jufarisayo ku Jusadukayo ma giting’iri de gibin ginene. Yohana uwacu igi kumae: ‘Wucikuru niloko kura mwu man niyewo dubo mwu. Kud wupar nia wun re m’utie dhanu ma segi pilembe wuyero nia wutie nyikwai Abraham. Eno nyutho ngo nia wutie awiya pa Mungu.’

Ju ma dupa gibed gibino i bang’ Yohana man gipenje kumae: ‘Mito watim ang’o kara wanyai mutoro i Mungu?’ Yohana uyero ni Juyahudi kumae: ‘Kan itie ku koti ario, mii acel ni ng’atu ma pare mbe.’ Nyo ing’eyo nia pirang’o eyero kumeno? Ebino mito ya julub pare ging’ei nia kara ginyai mutoro i Mungu, giciriki nimaru dhanu.

Yohana uyero ni weg ajok kumae: ‘Wubed dhanu m’atira man kud wuvur ng’atu moko.’ Ni askari ke eyero kumae: ‘Kud wuyak ng’atu moko, kadi kud wucwai ndra de.’

 Julam ku Julawi bende gibino i bang’ Yohana man gipenje kumae: ‘Itie ng’a? Dhanu ceke bemito ging’eyi.’ E Yohana udwoko igi kumae: ‘An atie dwal m’ubekok i yamba, m’ubetelo wi dhanu i bang’ Yehova, tap calu ma Isaya ular uyero.’

Dhanu gimaru lembe ma Yohana ubino ponjo igi. Dupa m’i kindgi ubino penjiri ka nyo Yohana utie Masiya. Ento edwoko igi kumae: ‘Ng’atu moko ma dit ubebino. Aromo ngo nigonyo kadok thondh wara pare de. Abemio batizo ku pii, ento en ebimio batizo ku tipo maleng’.’