PONJI MI 80
Yesu ung’io jukwenda apar ario
I ng’ei ma Yesu urweyo pi oro acel ku nusu, ugam ukwayu etim ng’iong’ic moko ma pire tek. Ebing’io jukani pi nitimo tic karacelo kude? Jukani m’ebiponjo pi nitelo wi cokiri mi Jukristu? Pi nitimo ng’iong’ic maeni, Yesu ubino ku yeny mi telowic pa Yehova. Pieno, eidho iwi got kaka m’ecopo bedo i ie kende, man erwo diewor traka. Kugweno, ecoko julub moko karacelo man eng’io kud i kindgi jukwenda 12. Nyo ing’eyo nying’gi de? Nying’gi ubino: Petro, Andrea, Yakobo, Yohana, Filipo, Bartolomayo, Thoma, Matayo, Yakobo ma wod Alfayo, Thadayo, Simon, man Yuda Iskariote.
Andrea, Petro, Filipo, Yakobo
Jukwenda apar ario maeno gibed giwotho karacelo kude. I ng’ei ma Yesu uponjogi, eorogi gicidh girwei kendgi. Yehova ugam umio igi copo mi wodho pajogi man mi keyo kum dhanu.
Yohana, Matayo, Bartolomayo, Thoma
Yesu ulwong’o jukwenda apar ario maeno jurimbe man ebedo ku genogen i wigi. Jufarisayo giparu nia jukwenda ubino dhanu m’usomo ngo man ma tijgi mbe. Ento Yesu uponjogi ku tic ma gibitimo. Gibibedo karacelo ku Yesu i saa ma pire tek mandha i kwo pare. Calu ve i wang’ tho man i ng’ei cer pare. Calu Yesu, jukwenda ma pol ubino dhanu mi Galilaya. Jumoko m’i kindgi ubino ju m’ugamiri.
Yakobo ma wod Alfayo, Yuda Iskariote, Thadayo, Simon
Jukwenda gibino bende dhanu ma gikoso bedoleng’ man gibed gitimo kosa. Saa moko gibed giweco m’umbe niparu i lembe man gibed gitimo ng’iong’ic ma cuu ngo. Bende gibed giciro ngo lembe, gibed giteliri nia ng’a ma pire tek nisagu. Ento gibino dhanu ma beco m’umaru Yehova. I ng’ei ma Yesu bidok i polo, gibibedo ju ma kwong’a ma bitimo lembe ma pire tek i cokiri mi Jukristu.
“Alwong’owu jurimo; kum gin ceke m’awinjo ba Vwa aketho wung’eyo.”—Yohana 15:15
Nen bende
YESU EN E YO, LEMANDHA MAN KWO
Yesu ung’io jukwenda pare apar ario
Tung’ tung’ ang’o m’utie ikind jalub ku jakwenda?
YESU EN E YO, LEMANDHA MAN KWO
Erweyo i Galilaya man etendo jukwenda pare
Wec ma nia ‘Ker m’i polo udhingo’, thelembene tie ang’o?
