Yohana ubino rweyo kumae: ‘Ng’atu moko ma dit nisaga ubebino.’ Kinde ma oro pa Yesu udoko ceng’ini 30, eai kud i Galilaya ebino i kulo Yordan kaka ma Yohana ubemio batizo ni dhanu i ie. Yesu ubino mito nia Yohana umii ire batizo, ento Yohana uyero kumae: ‘Aromo ngo amii iri batizo. In re m’ukwayu imii ira batizo.’ Yesu udwoko ire kumae: ‘Yehova ubemito imii ira batizo.’ E gimondo i pii mi kulo Yordan man Yohana uroyo Yesu zoo i pii.

I ng’ei ma Yesu uwok kud i pii, egam erwo. E wang’ acel, polo ugam uyabere man tipo pa Mungu uloro i wie calu akuru. Yehova uweco niai kud i polo kumae: “In i Woda ma jamerna; ma mutoro nega i kumi.”

Kinde ma tipo pa Yehova uloro iwi Yesu, egam edoko Kristu kunoke Masiya. Kawoni dong’ eromo caku tic ma Yehova uore ebin etim i ng’om.

Ndhundhu i ng’ei ma Yesu ulimo batizo, egam ecidho i langa man etimo ceng’ 40 kuca. Kinde m’edwogo, ecidh eneno Yohana. Saa ma Yesu ubebino i bang’e, Yohana uyero kumae: ‘Eni tie Nyathi rombo pa Mungu ma bikabu dubo mi ng’om.’ Wec maeni ma Yohana uyero, utie pi niketho dhanu ging’ei nia Yesu tie Masiya. Nyo ing’eyo lembe m’ugam utimere ni Yesu kinde m’ebino i langa? Dong’ wakenen lembene i wic m’ulubo.