I kind dwi mir ang’wen mi oro 30 R.M., Yesu ucidho i Yerusalem. Nwang’u dhanu dupa de gibino i adhura pi Kadhukuwijo. I foc maeno, jubed juthiero lim i hekalu. Pieno dhanu moko gibino ku lim migi, ento jumange giwok ging’iewo i Yerusalem keca.

Kinde ma Yesu ucidho i hekalu, ewok enwang’u dhanu ubelworo lim keca. Gibino timo kuloka pi niwang’u sente i ot ma jutimo i ie thier ni Yehova! Yesu utimo ang’o? Ekiedo thol ni del, eleko ko rombe ku lim mange ceke kud i hekalu. Eredho meza mi ju m’uwilo sente man eoyo sente migi mi tongolo i ng’om. Yesu  uyero ni ju m’ubino lworo akuru kumae: ‘Wuwodh gin maeni cen ku keni! Kud wudwok ot pa Vwa ni soko!’

Dhanu m’ubino i hekalu igi wang’ lii i kum gin ma Yesu utimo. E julub pare gigam gipoi i kum lembila ma e m’uweco pi Masiya: ‘Abibedo kud amora pi ot pa Yehova.’

I ng’eye, i oro 33 R.M., Yesu udwoko hekalu leng’ wang’ mir arionde. Eromo weko ngo nyanok de nia ng’atu moko ukos woro i kum ot pa Won.