Jufarisayo gidagu Yesu man gibed gisayu thelembe moko kara gitwie. Giyero nia kud ekei kum dhanu i ceng’ Sabatu. Re i ceng’ Sabatu moko, Yesu unwang’u ng’atu moko ma wang’e tho ubekwayu piny i dhu gengi. Eyero ni julub pare kumae: ‘Wunen ayi ma tego pa Mungu bikonyo ko ng’atu maeni.’ E Yesu unyobo ng’om ku law dhoge, eyike ni ulobo man ewire i wang’ ng’atune. I ng’eye, eyero ire kumae: ‘Cidh ilwok weng’i i pii m’atong’a mi Siloam.’ Ng’atune ucidh ulwoko wang’e, e wang’ ma kwong’a i kwo pare, ecaku neno piny.

I dhanu uwang’ lii man gipenjo kumae: ‘Eni tie ng’atu ma bebedo i dhu gengi man bekwayu piny e ngo? Kunoke nyo eni tie ng’atu moko m’urombo kude?’ Ng’atune uyero igi kumae: ‘Tie an!’ E dhanu penje kumae: ‘Ka dong’ weng’ine uyabere nenedi?’ Kinde m’eyero igi lembe m’utimere, gigam gitere i bang’ Jufarisayo.

Ng’atune uwok uyero ni Jufarisayo kumae: ‘Yesu uwiro ulobo i wang’a, ci eyero ira nia acidh alwoke. E acidh alwoko man kawoni abeneno piny.’ Jufarisayo giyero kumae: ‘Ka Yesu ukeyo kum i ceng’ Sabatu, nwang’u tego pare uai ungo i bang’ Mungu.’ Ento jumange lundo giyero kumae: ‘Ka tego pare uai ungo i bang’ Mungu, nwang’u eromo bedo mbe ku copo mi keyo kum ng’atu moko.’

 Jufarisayo ugam ulwong’o junyodo pa ng’atu maeno ma wang’e tho man gipenjogi kumae: ‘Wodwu ucaku beneno piny kawoni nenedi?’ Junyodo pare gibino ku lworo pilembe Jufarisayo uyero nia ng’atu ma tek biyio Yesu ci jubirieme cen kud i kacokiri. Pieno, gidwoko kumae: ‘Wang’eyo ngo. Wupenj en.’ Jufarisayo gicego ng’atune ku penji nitundo ewacu igi kumae: ‘Adaru yero iwu lembe ceke m’ang’eyo. Wudeba ku penji asu nedi?’ Kwinyo umaku Jufarisayo, e gigam gibaye woko.

I ng’eye, Yesu ucidh unwang’u ng’atune, man epenje kumae: ‘Nyo iyio Masiya de?’ Edwoko kumae: ‘Aromo yie kan ang’eyo nia etie ng’a.’ Yesu uyero ire kumae: ‘An a Masiya.’ Andhandha Yesu unyutho bero ni ng’atu maeno. Ekeyo kume akeya kende ngo, ento ekonye bende kara ebed ku yioyic i Masiya.