Tap i wang’ Kadhukuwijo mi oro 32 R.M., jukwenda gigam giloko kud i woth mi lembanyong’a. Giol, e Yesu uketho giidho yei pi nicidho i Bethsaida, kara gicidh giyom kuca. Ento kinde ma yei udhingo nyiko i dhu wat, Yesu uneno dhanu elufu ma lee ubelubo tokgi. Kadok nwang’u Yesu ubino mito ebed kende ku jukwenda pare de, re ejolo dhanu ma ber. Ekeyo ju ma kumgi uberemo man ecaku ponjogi. Yesu uponjogi duu iwi ker pa Mungu. Kinde ma uthieno udhingo, jukwenda pare gibino i bang’e man giyero ire kumae: ‘Kec ubenego dhanu. Lalgi kara gicopo nwang’u piny moko ma giromo camu.’

Yesu uyero kumae: ‘Gimbe ku cam. Wumii igi gin ma giromo camu.’ Jukwenda penje kumae: ‘Ibemito nia wacidh wang’ieu cam igi?’ Filipo ma tie acel m’i kind jukwenda uyero kumae: ‘Kadok nwang’u watie ku sente lee de, wacopo ng’iewo ngo cam ma romo udul dhanu maeni.’

Yesu upenjogi kumae: ‘Wutie ku lungu kwen adi?’ Andrea udwoko ire kumae: ‘Watie ku lungu kwen abic ku rec ario ma thindho. Re eni kende tie gin moko ngo.’ Yesu uyero igi kumae: ‘Wukel lungu kwen ku recne i bang’a.’ Egam eyero ni dhanu nia gibed iwi lum man gicok dhoggi i ungu mi dhanu 50 man 100. Yesu ugam uting’o lungu kwen ku recne, e eng’ayu wang’e i polo man erwo. I ng’eye, emio camne i cing jukwenda man jukwenda gipoke ni dhanu. Dhanu ma co 5 000 man  jumamon kud awiya ceke gicamu nitundo giyeng’. I ng’eye, jukwenda gicoko donge m’udong’ pet kara piny moko acel de kud unyothere mananu. Donge m’udong’ne upong’o katoko 12 bik! Ma jiji mbe, eno ubino udu ma yerere ngo!

Dhanu uzungo lembe maeno lee dit, uketho gimito giketh Yesu ni ubimo migi. Ento Yesu ung’eyo nia eno tie ngo saa ma Yehova ubemito edok ubimo. Pieno, egam elalu udul dhanu man eyero ni jukwenda pare nia gikadh loka nam mi Galilaya. Giidho yei migi man Yesu ke ucidho pare iwi got eni kende. Pirang’o? Pilembe ebemito erwo i bang’ Won. Kadok nwang’u Yesu ubino ku lembe dupa m’ukwayu etim de, re ebed ekoyo saa mi rwo.