Yesu ubino i ng’om pi nirweyo lembanyong’a mi Ker pa Mungu. Yehova umio tipo maleng’ ni Yesu pi nitimo udu dupa man eno unyutho lembe m’ebitimo kinde m’ebibedo Ubimo. Ebed ekeyo kit twoyo ceke. Kaka moko ci m’ebed ecidho i ie, dhanu ma kumgi remo ubed ubino i bang’e pi ninwang’u kony man ebed ekeyo kumgi. Eyabu wang’ abinga, ekeyo ju ma ithgi dhing’, ekeyo weg goro man ewodho pajogi kud i dhanu. Saa moko gibed gimulo dhu bongu pare kende ci de kumgi ubed ukei. Dhanu ubed ulubo tok Yesu kaka moko ci m’ecidho i ie. Ebed eriemo ngo ng’atu moko m’ucidho i bang’e, kadok saa m’ebed emito ebed i ie kende.

Nindo moko, jukelo ng’atu ma tie ku tho ma nego kumjo nding’ i ot ma Yesu ubedo i ie. Ento dhanu upong’o ode bik, uketho mondo ubino tek. Pieno, gigam gituco wi ot man giluro ng’atune ku wang’ ot i bang’ Yesu. Yesu uyero ire kumae: ‘Ai iwothi.’ Kinde m’eai malu, i dhanu uwang’ lii.

Nindo mange kinde ma Yesu ubino mondo i pacu moko, dhanu apar ma giweg dhobu, gicungo ku bor man gikok kumae: ‘Yesu, konywa!’ I nindo maeca jubed juyio ngo weg dhobu gicor ceng’ini i kum dhanu mange. Yesu uyero igi nia gicidh i hekalu, calu ma Cik pa Yehova ung’olo ni weg dhobu nia gitim ka kumgi ukei. Kinde ma gibecidho, kumgi uwok ukei kud i gengi. Saa ma ng’atu acel m’i kindgi unyang’ nia kume kei,  eloko i bang’ Yesu man epaku Mungu. Kud i kind dhanu apar, ng’atu acel maeno re m’ugam ufoyo Yesu.

Dhaku moko m’utwoyo pi oro 12, ung’eyo ngo ka nyo kume romo kei nindo moko. Egam elurere kud i kind udul dhanu yor i ng’ei Yesu man emulo dhu kendi pare. E ndhundhu nica, kume ukei. Kinde ma Yesu unyang’, epenjo kumae: “Ng’a m’umulo kuma?” Lworo umaku dhaku maeno, ento ebino i bang’ Yesu man eyero ire kamaleng’. Yesu ujuko cwinye ku wec ma e: ‘Nyara, cidh ma cwinyi kwio.’

Jadit moko mi sinagog ma nyinge Yairo ukwayu Yesu kumae: ‘Bin yo para! Kum nyara uberemo ma rac.’ Ento nyathin ne ular utho nwang’u fodi Yesu utundo ngo i pacu pa Yairo. Kinde ma Yesu utundo, enwang’u dhanu dupa ubino pi niwak ku juruot maeno. Yesu uwacu igi kumae: ‘Kud wuwaki; ebenindo aninda.’ Egam emaku cing’ nyakune man ewacu ire kumae: “Nyaku, ai malu!” E eai wang’ acel man Yesu uyero ni junyodo pare nia gimii ire piny moko ecam. M’umbe jiji, lembe maeno uketho junyodo pare gibino kud anyong’a ma yawe mbe.