PONJI MI 84
Yesu uwotho iwi pii
Yesu ubed ukeyo kum dhanu man ebed ecero ju m’utho, bende ebino ku copo iwi yamu man iwi koth. I ng’ei ma Yesu ucidh urwo iwi got, eloko wang’e man eneno avuvu ubekoto iwi nam Galilaya. Jukwenda pare gibino i yei, man gibeii ku goyo ngai kud i kind yamu ma tek. Yesu uloro piny man ecaku wotho iwi pii pi nibino i bang’ yei migi. Kinde ma jukwenda gineno ng’atu moko ubewotho iwi pii, lworo umakugi ma rac. Ento Yesu uwacu igi kumae: ‘Tie an. Lworo kud unegwu.’
Petro uyero ire kumae: ‘Rwoth, tekene tie in andha, yer ira abin i beng’i.’ Yesu uwacu ire kumae: ‘Bin i bang’a.’ E Petro ulor kud i yei man ewotho ku wi pii i kind avuvu pi nicidho i bang’ Yesu. Ento kinde ma Petro uwok ceng’ini ku Yesu, eneno avuvu man lworo umake. E ecaku mwony. Petro ukok kumae: ‘Rwoth, lara do!’ Yesu ugam umaku cinge man ewacu ire kumae: ‘Pirang’o iweko jiji umondo i ii? Yioyic peri ni kani?’
Yesu giku Petro gigam giidho i yei, e avuvu ucungo wang’ acel. Iparu nia jukwenda giwinjiri nenedi? Giwacu kumae: “In i Wod Mungu andha.”
Tie ngo i saa maeno kende re ma Yesu unyutho nia etie ku copo iwi yamu. Nindo mange de, kinde ma Yesu karacelo ku jukwenda pare gibekadhu loka nam, ecidh evuto i the yei. Kinde m’enindo, avuvu ma tek ugam utuk. Angongo pii ucorere i yei man pii ugam upong’o yei bik. Jukwenda gicewo Yesu ma gibekok kumae: ‘Japonji, wabetho! Konywa do!’ E Yesu uai man eyero ni nam kumae: “Bed ling’!” E ndhundhu nica yamu man nam ugam ucungo ting’. Yesu upenjo jukwenda kumae: ‘Yioyic mwu ni kani?’ E giweco i kindgi kumae: “Cil yamu ku nam de giwore.” Jukwenda gigam ginyang’ nia ka giketho genogen migi ceke iwi Yesu, gin moko mbe m’ucikere ninyayu lworo i igi.
‘Tek wubedo ku yioyic ma rom ku nying atingli . . . gin moko mbe de ma bicopere iwu ngo.’—Matayo 17:20