I ng’ei ma Yesu utho, jalonyo moko ma nyinge Yosefu upenjo Pilato nia uwek elor avuj Yesu kud iwi yen. Yosefu uboyo avuje ku bongu ma leng’ man ma nwang’, e ekethe i odliel moko ma nyen. Eng’ielo kidi ma dit eumo ko dhu odlielne. Julam ma dongo uyero ni Pilato kumae: ‘Wabelworo nia julub pare gibin giting’ avuje man giwac nia ecer.’ Pieno, Pilato uyero igi kumae: ‘Wucik dhu odliel ku kidi man wukure.’

I ng’ei nindo adek, jumamon moko ucidho pir kugweno kaka ma liel ni ie man ginwang’u jung’ielo kidi kud i dhu odliel. Malaika moko ubino i odlielne man eyero igi kumae: ‘Lworo kud unegwu. Yesu udaru cer. Wucidh wuyer ni julub pare nia gicidh giromb kude i Galilaya.’

E Maria Magdalene uringo pio i bang’ Petro giku Yohana, man ewok ewacu igi kumae: ‘Ng’atu moko uting’o avuj Yesu!’ E Petro giku Yohana giringo kaka ma odliel ni ie. Kinde ma giwok gineno nia ie udong’ thwolo, giloko gidok i pacu migi.

Maria uloko kendo kaka ma liel ni ie, ewok eneno jumalaika ario i odliel man eyero igi kumae: ‘Ang’eyo ngo kaka ma giketho Rwoth para i ie.’ I ng’eye, eneno ng’atu moko ma co man eparu nia tie jakur, egam epenje kumae: ‘Rwoth, timba keyer ira kaka ma wukethe i ie.’ Ento saa ma ng’atune ulwong’e nia, “Maria!” e enyang’ nia tie Yesu. Ekok ma tek kumae: “Japonji!” man egwake. E Yesu uyero ire kumae: ‘Cidh iwac ni umego para nia inena.’ Ndhu ndhu nica, Maria uringo i bang’ julub man ewacu igi nia eneno Yesu.

I ng’eye, nindo ma rom eca, julub ario ma giai kud i Yerusalem gibecidho i Emao. Ng’atu moko ucaku wotho kugi bende man epenjogi nia gibeweco iwi lembang’o. Gidwoko ire kumae: ‘Iwinjo ngo? Nindo adek udaru kadhu niai ma julam ma dongo ginego Yesu. Ento kawoni jumamon moko ubeyero nia etie kwo!’ E ng’atune upenjogi kumae: ‘Wuyio ngo jubila? Jubila uewo nia Kristu bitho man i ng’eye ebicer.’ Ng’atune umedere nikoro igi i  Lembagora. Kinde ma gitundo i Emao, julub ukwayu ng’atune nia gibed kugi. I dhu cam mir uthieno, kinde m’erwo iwi mukathi, ginyang’ nia eca ubino Yesu. E egam erwinyo.

Julub ario maeno giloko pio i Yerusalem i ot ma jukwenda gicoko dhoggi i ie man gikoro igi lembe m’utimere. Kinde ma fodi gini i die ot keca, Yesu ugam uwok i wang’gi ceke. Ku kwong’a, jukwenda giyio ngo nia utie Yesu. E eyero igi kumae: ‘Wunen cinga e, man wumul kuma. Egorere nia Kristu bicer kud i kind ju m’utho.’