Julam ma dongo gitero Yesu i pacu pa jabim. E Pilato uwok upenjogi kumae: ‘Adote ma kani ma wukelo i kum ng’atuni?’ Gidwoko ire kumae: ‘Ebekethere nia en ubimo!’ Pilato upenjo Yesu kumae: “In i Ubimo mi Juyahudi?” Yesu udwoko ire kumae: “Ker para en e mi ng’ombuni ngo.”

E Pilato ugam uoro Yesu i bang’ Herode m’utie jabim mi Galilaya pi nineno ka nyo ecopo nwang’u kosa moko iwi Yesu. Herode unwang’u ngo lembe moko ma rac iwi Yesu man edwoke kendo i bang’ Pilato. I ng’eye, Pilato uyero ni dhanu kumae: ‘Nik’ebed Herode, kadok an de anwang’u ngo kosa moko iwi ng’atuni. Abigonye.’ Udul dhanu ukok kumae: ‘Nege, anega!’ Juaskari gifodo Yesu ku del, ging’ulo lau i kume man gigoye. Bende gidolo uthac mir ukudho man giroyo i wiye, e gicaku caye kumae: ‘Moth iri, Ubimo mi Juyahudi.’ Pilato uwacu ni udul dhanu kendo kumae: ‘Anwang’u ngo lembe ma rac i ng’atuni.’ Ento gikok kumae: “Gure [iwi yen]!” Pieno, Pilato ugam umie i cing’gi kara ginege.

Gigam gitero Yesu kaka ma julwong’o Golgotha, e gigure iwi yen man giting’e malu. Yesu urwo kumae: ‘Vwa, wek igi, kum ging’eyo ngo lembe ma gibetimo.’ Dhanu ucayu Yesu kumae: ‘Bodhiri giri, tek in i Wod Mungu, lor piny ku wi yen!’

Acel m’i kind jukwo ma juguro i ng’et Yesu uwacu ire kumae: “Poi pira kan imondo i Ker peri.” Yesu ung’olo ire kumae: ‘Wabibedo wakudi i Paradiso.’ I saa mi reto, mudho ugam uumo ng’om pi saa adek. Jumoko m’i kind julub gicungo ceng’ini ku yen ma juguro Yesu i wie, man Maria ma min de ubino keca. E Yesu uyero ni Yohana nia edok egwok Maria calu ve min ma buu.

Tokcen ne Yesu uyero kumae: ‘Edaru timere!’ E ekulo wiye man egamu ng’ete wang’ ma tokcen. I saa nica, digidi ma tek ugam uyengo ng’om. I hekalu ke bongu ma nwang’ m’upoko kind Kamaleng’ ku Kamaleng’ m’usagu, ugam ukak dra niai i  wie nitundo i there. Jadit mir askari uyero kumae: ‘Eni ubino Wod Mungu andha.’