Kinde ma jakwenda Yohana ubino i kol i cula mi Patmo, Yesu uketho eneno ginmawokiwang’ 16 mi lembe ma bitimere i nindo m’ubino. Ginmawokiwang’ maeno unyutho nia Yehova bidwoko nyinge leng’, nia Ker pare bibino, man nia yeny pare bitimere i ng’om calu m’ubetimere i polo.

I ginmawokiwang’ne acel, Yohana uneno Yehova ubedo iwi komker pare mi dwong’ i polo, man judongo 24 ma gikendo bongu ma tar man jamkermiwic mi mola ma kwar i wigi gitwode tingili. Lukoth man dwal mi morpolo ubewok kud i komkerne. Judongo 24 maeno girum i wang’ Yehova man gibetimo ire thier. I ginmawokiwang’ mange, Yohana uneno udul ma dit m’uai kud i thek ceke, kodhidhanu, man dhok ceke ubetimo thier ni Yehova. Nyathi rombo, niwacu Yesu ubekwayugi man ebeterogi i dhu pii mi kwo. I ng’eye, i ginmawokiwang’ mange, Yesu ucaku bimo i polo karacelo ku judongo 24. I ginmawokiwang’ m’ulubo maeno, Yohana uneno Yesu ubekiedo lwiny i dhu ng’ec, niwacu Sitani karacelo ku pajogi pare. Yesu ugam ubayugi kud i polo, e gipodho iwi ng’om.

 I ng’eye, i ginmawokiwang’ mange, Yohana uneno Nyathi rombo ucungo iwi got Sayuni karacelo ku dhanu 144 000. Eneno bende malaika moko m’uberingo i kor polo man ebeyero ni dhanu ceke mi ng’om nia gilwor Mungu man gimii ire dwong’.

I ginmawokiwang’ mange, Yohana uneno jubekiedo lwiny mir Armagedon. I lwiny maeno, Yesu karacelo kud adul mony pare ginyotho ng’om ma rac maeni ma Sitani ubebimo wie. I ginmawokiwang’ ma tokcen, Yohana uneno nia i polo kud i wi ng’om zoo jubekwo i kwiocwiny. Junyotho Sitani ku dhanu ceke m’ubetimo yeny pare. I saa maeno, ng’atu moko ci dok ebed i polo kunoke i ng’om, bidwoko nying’ Yehova leng’ man bitimo thier ire kende.