Jukwenda giworo lembe ma Yesu ung’olo igi nia girwei lembanyong’a i ng’om zoo. I oro 47 R.M., umego mi cokiri mir Antiokia gioro Paulo giku Barnaba gicidh girwei lembanyong’a i adhura ma tung’ tung’. Jurwei lembanyong’a ario maeno ma weg amora giwotho nitundo i Asia ma nok i kabedo ma calu ve Derbe, Lustra man Ikonio.

Paulo giku Barnaba girweyo ni ng’atu moko ci, nik’ebed jalonyo, jacan, aradu kunoke judongo. Dhanu ma dupa gigam giyio lemandha iwi Kristu. Kinde ma Paulo giku Barnaba girweyo lembanyong’a ni Sergio Paolo ma tie jabim mi Kupro, ajoga moko umito cerogi. E Paulo uyero ni ajogane kumae: ‘Yehova bimio iri matira.’ E ndhundhu nica ajoga maeno udoko abinga. Kinde ma Sergio Paolo ma jabim uneno lembe maeno, edoko jayic.

Paulo giku Barnaba gibed girweyo lembanyong’a kaka moko ci: ot kubang’ ot, i soko, i gengi man i kacokiri. Nindo moko, kinde ma gikeyo kum wonabala moko i adhura mi Lustra, dhanu ma gineno udu maeno giparu nia Paulo giku Barnaba gitie mungu man gimito githier igi lam. Ento Paulo giku Barnaba gijukogi man giyero kumae: ‘Wuwor Mungu kende! Wan de wa dhanu ve wun!’ I ng’eye, Juyahudi moko gibin gicung’o lembe i udul dhanu man gicwayugi i kum Paulo. Pieno, udul dhanu ung’ure ku kidi, giwaye gitere woko i ng’ei adhura ma gibino paru nia etho. Ento lembe ma ber, Paulo ubino kwo! Ndhundhu nica, umego gibin gilare man gikome gidok kude i adhura. I ng’eye, Paulo udok i Antiokia.

I oro 49 R.M., Paulo ucaku kendo woth mir ario mi rweyo lembanyong’a. I ng’ei m’eliewo umego mir Asia ma nok, ecidh erweyo lembanyong’a i kabedo ma bor, niwacu i Europe. Ecidho nitundo i adhura mir Athene, mir Efeso, mi Filipi, mi Tesaloniki man i kabedo mange  bende. Sila, Luka, man jalawobi moko ma nyinge Timoteo gicidho giku Paulogi i woth maeno. Gitimo tic karacelo pi nicaku the cokiri ma tung’ tung’ man gikonyo umego ku nyimego mi cokiri maeno kara giteng’ini i thenge mi tipo. Ku lapor, Paulo ubedo pi oro acel ku nusu i cokiri mi Korinto pi nitielo cwiny umego ku nyimego ma keca. Ebed erweyo lembanyong’a, eponjo dhanu man egoro waraga ni cokiri moko. Ebed etimo bende tic mi yiko hema. I ng’eye, edok i Antiokia.

I oro 52 R.M., Paulo ucidho kendo i woth mir adek mi rweyo lembanyong’a, ecaku i Asia ma nok. Ecidho nitundo yo malu i adhura mi Filipi man edok eloro yo piny i adhura mi Korinto. Kinde ma Paulo utundo i adhura mir Efeso, ewok etimo oro ma lee keca. I saa maeno ebed eponjo umego ku nyimego, ebed ekeyo kumgi man ebed ekonyogi. Bende, ebed emio korolembe ni dhanu kubang’ ceng’ i ot dharaza moko. Dhanu ma dupa gijolo lembe m’eponjo man giloko kura migi. Tokcen ne, i ng’ei ma Paulo urweyo lembanyong’a i ng’om ma tung’ tung’, edok ecidho i Yerusalem.