Paulo ujigo woth pare mir adege mi tic mi rweyo lembanyong’a i Yerusalem. Kuca, juwok jutwie man jubole i kol. I ginmawokiwang’ moko m’eneno ku diewor, Yesu uyero ire kumae: ‘Ibicidho i Roma man ibirweyo lembanyong’a kuca.’ Jugam juting’o Paulo kud i Yerusalem jutere i Kaisaria; kuca ewok etimo oro ario i kol. Kinde ma Paulo ubino i wang’ kom mi pokolembe p’ubimo Festo, eyero kumae: ‘Ayenyo Kaisari m’i Roma re m’upok lembe para.’ Festo uyero ire kumae: “Calu iyenyo Kaisari re m’upok lembe peri, e ibicidho i bang’ Kaisari.” Juketho Paulo i yei man jutere i Roma; umego mange ario, niwacu Luka gikud Aristarko gicidho gikugi.

Kinde ma gini wi nam, avuvu ma tek ugam utuk i wigi man ekoto pi nindo dupa. Dhanu ceke ma gini i yei giparu nia gibiboth ungo. Ento Paulo uyero igi kumae: ‘Jurimona, malaika moko uyero ira i lek kumae: “Lworo kud unegi Paulo. Ibitundo i Roma, man dhanu ceke ma wubedo kugi i yei maeni gibiboth.” Cwinywu bed tek watho ngo.’

Avuvu maeno ukoto pi nindo 14. I ng’eye, gigam gineno ng’om moko. Ebino cula mi Melita. Kinde ma gidhingo nyiko, yei ugudo ng’om man eng’eny dra, ento dhanu ceke m’ubino i ie giboth, gibino dhanu 276. Jumoko ukwang’ akwang’a nitundo i dhu wat, ento jumange umoko i kum dund bau. Dhanu mi Melita uwok ugwokogi man gipangu igi mac kara gioi.

Dwi adek i ng’eye, juaskari giketho Paulo i yei mange man gicidho kude i Roma. Kinde ma gituc kuca, umego gibin gijole. Saa ma Paulo unenogi, edwoko foyofoc ni Yehova man amora udwogo i kume. Kadok nwang’u i saa maeno fodi jung’olo ngo lembe pa Paulo nia etie agonya de, re juyio ire nia ebed i ot m’ebino pangu man jaaskari moko ubed ukure kuca. Ebedo i ot maeno pi oro ario. Dhanu ubed ubin unene man ebed erweyo igi lembanyong’a mi Ker pa Mungu man eponjogi ku lembe iwi Yesu. I saa maeno, Paulo ukiewo bende waraga ni cokiri ma dupa mir Asia ma nok man mi Yahudi. Yehova utio ku Paulo lee mandha pi nirweyo lembanyong’a ni thek dhanu ma tung’ tung’.