I ng’ei nindo apar ma Yesu udok i polo, julub pare gigam ginwang’u tipo maleng’. Lembene utimere i Pentekoste mi oro 33 R.M., man nwang’u dhanu uai kaka ma tung’ tung’ ubino i Yerusalem pi nitimo foc. Ento julub pa Yesu ma romo 120 gicoko dhoggi karacelo i kusika moko ma malu. E mbwang’ kumeni, lembe moko mi zungo ugam utimere. Piny moko ma calu lebmac uwok iwi ng’atuman acel acel m’i kind julub man gin ceke gicaku weco ku dhok ma tung’ tung’. E dwal moko ma tek ma calu mir avuvu uromo ot zoo.

Welo ma tung’ tung’ m’uai i ng’om mange m’ubino i Yerusalem giwinjo dwal ma tek maeno man giringo i bang’ ot pi nineno lembe m’ubetimere. Igi wang’ lii kinde ma giwinjo nia julub gibeweco dhok ma tung’ tung’. E giyero kumae: ‘Dhanu maeni gi dhanu mi Galilaya. Ka dong’ gibeweco ku dhok mwa e nenedi?’

Petro ku jukwenda mange gigam gicungo i wang’ udul dhanu maeno. E Petro ukoro ni dhanu pi nek ma junego ko Yesu man ayi  ma Yehova ucere ko ku kind ju m’utho. Petro uyero kumae: ‘Kawoni Yesu ni i polo yo ku cing’ Mungu ma yor acwic man ekonjo tipo maleng’ ma jular jung’olo pire. Eno re m’uketho wuneno man wuwinjo thangu maeni.’

Wec pa Petro umulo adunde dhanu lee mandha uketho gipenje kumae: “Wabitimo ang’o?” Edwoko igi kumae: ‘Wuyew dubo mwu man wulim batizo i nying’ Yesu. E wubinwang’u bende giramia pa tipo maleng’.’ Cing’ nica ci, dhanu ma romo 3 000 gigam gilimo batizo. Niai eca wend julub ucaku medere pio pio mandha i Yerusalem. Pieno, ku kony pa tipo maleng’ jukwenda gicaku the cokiri dupa, wek kara gibed giponj julub ku lembe ceke ma Yesu ugam ung’olo igi.