Jadit mir askari moko mi Roma ma pire tek ma nyinge Kornelio ubed ukwo i Kaisaria. Kadok nwang’u ebino ngo Jayahudi de, re Juyahudi gibed giwore. Ebed emio piny pare ku berocwinye pi nikonyo jucan man dhanu ma gitie i yeny. Kornelio uyio Yehova man ebed erwo nja i bang’e. Ceng’ acel malaika uwok ni Kornelio man uwacu ire kumae: ‘Mungu uwinjo rwo peri. Or dhanu kawoni i adhura mi Yopa, kaka ma Petro ni i ie man yer ebin i beng’i.’ E ndhundhu nica, Kornelio uoro dhanu adek i Yopa, ma tie adhura ma nwang’ere i kilometre ma romo 50 yo piny.

I saa ma rom eno i Yopa, Petro de uneno ginmawokiwang’. Eneno yedi ma Cik uyio ngo nia Juyahudi gicam, man ewinjo dwal moko ubeyero ire nia ecamgi. Petro ukwero, eyero kumae: ‘Fodi acamu ngo nyanok de yedi m’ucido i kwo para.’ E dwal uyero ire kumae: ‘Kud ilwong’ yedi maeni gin m’ucido. Mungu udaru dwokogi leng’.’ Dwalne uyero bende ni Petro kumae: ‘Dhanu adek ni wang’ dhugola peri; wucidh wukugi.’ Petro ucidho i wang’ dhugola man epenjogi nia pirang’o gini keca. Gidwoko ire kumae: ‘Kornelio ma jadit mir askari mi Roma re m’uorowa. Kwayu ibin i ot pare i adhura mi  Kaisaria.’ Petro ugam ujologi man emio igi ot ma givuto i ie diewor nica. Urwonde, gicidho ku dhanu maeno i Kaisaria, karacelo kud umego moko mir adhura mi Yopa.

E kinde ma Kornelio uneno Petro, egam epodho aruma conge. Ento Petro uyero ire kumae: ‘Ai malu! An de a dhanu calu in. Mungu uyero ira nia abin i ot peri, kadok nwang’u Juyahudi gimondo ngo i ot mi thek mange de. Dong’ ka copere yer ira nia ioro dhanu i bang’a pirang’o.’

Kornelio udwoko ni Petro kumae: ‘Nindo ang’wen udaru kadhu m’abino rwo i bang’ Mungu man malaika uyero ira nia aor dhanu i beng’i. Ka copere ponjwa ku lembe pa Yehova.’ Petro uyero kumae: ‘Anyang’ nia kara Mungu umbe kud akoyakoya. Eyio ng’atu moko ci m’ubemito niwore.’ Petro uponjogi ku lembe dupa iwi Yesu. E tipo maleng’ ubino iwi Kornelio ku ju m’ubedo kude keca, man gin ceke gigam gilimo batizo.