Timoteo ubino umego moko m’aradu mi cokiri mi Lustra. Won ubino Jagiriki man min ke ubino Nyayahudi. Min ma Eunike giku wang’umire ma Lois gicaku ponje ku lembe pa Yehova niai m’e nyathin.

Kinde ma Paulo utundo i cokiri mi Lustra i woth pare mir ario mi rweyo lembanyong’a, ewok eneno nia Timoteo umaru umego lee man etie ayika nikonyogi. E Paulo ulwong’e nia gicak wotho kude pi nirweyo lembanyong’a. Nok nok, jakwenda Paulo ugam uponjo Timoteo kara ebed jarwei lembanyong’a man japonji ma ber.

Tipo maleng’ utelo wi Paulo giku Timoteo kaka ceke ma gicidho i ie. I diewor acel, Paulo uneno jalwo moko i ginmawokiwang’, man ebelwonge nia ebin i Makedoni pi nikonyogi. E Paulo, Timoteo, Sila man Luka gicidho kuca pi nirweyo lembanyong’a man nicaku the cokiri ma tung’ tung’.

I Tesaloniki ma tie adhura mi Makedoni, jumaco ku jumamon ma dupa gidoko Jukristu. Ento Juyahudi moko gibino ku kumira i kum Paulo man juwodhe. Gicwayu udul dhanu ma kwiny i kumgi man gimaku umego giterogi i wang’ jubim mir adhura ma gibekok kumae: ‘Dhanu maeni gibejai i kum bimobim mi Roma!’ Calu ma kwo pa Paulo giku Timoteo ubino i ariti, e giringo ku diewor i Beroya.

Dhanu mi Beroya gibino kud ava mi winjo lembanyong’a, e Jugiriki ku Juyahudi ma pol mir adhura maeno gidoko juyic. Ento kinde ma Juyahudi moko m’uai i Tesaloniki ubin unyayu yakini i adhura mi Beroya, Paulo ugam uweko adhura maeno ecidho i Athene. Timoteo giku Sila ke gidong’ i Beroya pi nitielo cwiny umego ku nyimego. I ng’eye, Paulo uoro Timoteo udok kendo i Tesaloniki pi nikonyo umego kara gicir ragedo ma tek ma gibenwang’iri ko kuca. I ng’ei kare, Paulo udok uoro Timoteo pi niliewo cokiri ma tung’ tung’ man nitielo cwiny umego ku nyimego mi cokiri maeno.

 Paulo uwacu ni Timoteo kumae: ‘Dhanu ma gimito gitim ni Yehova jubinyayu ragedo i kumgi.’ Jugam junyayu ragedo i kum Timoteo man jutwie pi yioyic pare. Ento ebino kud anyong’a pilembe ragedo maeno umio ire kaka mi nyutho ni Yehova nia ebegwoko bedoleng’ pare ire.

Paulo uyero ni Jukristu mi Filipi kumae: ‘Abeoro Timoteo i beng’wu. Ebinyutho iwu lembe ma wutim kara wuwothi i lemandha man ebiponjowu ku bodho mi rweyo lembanyong’a.’ Paulo ung’eyo nia Timoteo tie ng’atu ma jugeno. Pirang’o? Pilembe gibino jurimo man gitimo tic pa Mungu karacelo pi oro ma dupa.